^{2 1} Huwo tala min hinak wa ja fi belet tou, wa talamiz tou ruwa wara huwo. Fi yom sebit, huwo derisu fi mujama. Nas kutar kan asuma huwo wa umon tala mustagarabiin. umon kelim, " Huwo ligo deris de min wen?" " De yatu hikma al wodi le huwo de?" " De yatu mujizat al huwo gi amulu ma iden tou de?" " ³ Hal de ma yau najar, weled ta Mariam wa Aku ta Yakub wa ta Joses wa ta Yahuza wa Samaan? Hal Ikuwat tou ma yau ma nina hina?" Kan Yesua kore kore ma umon. ⁴ Baad dak Yesua kelim le umon , " Ma bi ihtaramu nebi, fi beled wa fi nus ta nas tou wa ahal wa nas ta bet tou." ⁵ Huwo kan ma agder ashan amulu ai shokol al gowi, ila huwo kutu iden le nas besit al ayaniin wa aliju umon. ⁶ Huwo kan istagarab min adam imaan tomon. biga huwo ruwa fi kariyat taniin ashan bi derisu. ⁷ Biga Howo nadi talamiz al itnashar wa bada rasulu homon itiin itniin wa huwo wodi le umon sulta did aruwah al sheriira, ⁸ Wa huwo wori le umon ashan ma shilu ai haja fi safar tomon, ila asaya- mafi esh, mafi shanta, wa mafi gurush fi kis tomon- ⁹ Lakin keli intum libisu shebet wa ma bi libisu itniin gumas. ¹⁰ Huwo kelim le umon, " Kan intum dakalu fi bet, geni takum lahadi intum tala min hinak. ¹¹ Iza kan fi nas ma istagbal intum au ma asuma le intum, kan intum gi tala min mahal dak, masa takum turab ta kura takum ze shuhada le umon. ¹² Umon ruwa bashiru le nas ashan tuba. ¹³ Umon turudu aruwah ketir al sherir, wa masa nas ketiir al ayaniin be zet wa aliju umon. ¹⁴ Melik Herodus asuma kabara de, Isim ta Yesua biga arufu shedid. Nas tanin gi kelim, " Goumu Yuhana mamadan min mutu, wa de yau sabab huwo gi istakal be guwa ta mujizat de." ¹⁵ Nas tanin bi kelim, " Inu huwo Elia." Tanin kaman bi kelim, " Huwo nebi, ze wahid min al anbiya ta zaman." ¹⁶ Lakin zaman Herodus asuma kabara de huwo kelim, " Goumu Yuhana, al ana gata ras tou min mutu." ¹⁷ Wa kan Herodus gubudu wa sijinu huwo fi kalam Herodias (Mara ta Aku tou Philip), Leanu huwo jouzu mara de. ¹⁸ Ashan Yuhana kelim le Herodus, " huwo ma ganuni ashan inta bi shilu mara ta Aku taki." ¹⁹ Lakin Herodias kan tala zalan wa deir katulu Yuhana, lakin hiya ma agder. ²⁰ Herodus kafu Yuhana; huwo arufu inu huwo zol adil wa zol ta kadasa, wa huwo kan hafisu huwo, Herodias bi tala zalan kan hiya asuma Yuahan bi kelim, lisa hiya gi asuma le huwo bi farah. ²¹ Baad dak yom al kwes ja zaman id melad ta Herodus wa huwo amulu asha le muazafiin wa nas al kubar ta Galilee. ²² Biniya ta Herodus ja wa alabu gidam nas, wa hiya sibu Herodus wa diyuf tou tala farhaniin. Melik kelim le biniya de, "Asalu ai haja al inta deiru ana bi wodi le inta." ²³ Huwo halifu le hiya, " Ana bi wodi le inta, ai haja al inta asalu, wa hata nus ta mumlaka tai." ²⁴ Hiya ruwa wa kelim le uma tou, " keli ana asalu shunu min huwo?" ²⁵ Hiya kelim, " Ras ta Yuhana al mamadan."Hiya reja be sura le melik, wa asalu, gali, " Ana deru keli inta wodi le ana, hasa de, ras ta Yuhana al mamadan fi sahan." ²⁶ Melik kan tala mutaasif shedid, huwo ma agder ashan aba talab ta hiya ashan halifa al kan huwo amulu wa kaman ashan diyuf tou. ²⁷ Biga melik rasulu askeri wa amiru huwo ashan bi jibu le huwo ras ta Yuhana. Haras ruwa wa gata ras tou fi sejiin. ²⁸ Huwo jibu ras ta Yuhana fi sahan wa wodi le biniya de, wa biniya de wodi le uma ta tou. ²⁹ Zaman talamiz tou asuma kabar de, umon ja wa shilu jesim ta tou wa dofunu fi turba. ³⁰ Talamiz ja ma baad le Yesua wa wori le huwo kulu hajat al umon amulu wa derisu. ³¹ Baad dak huwo kelimu le umon, " Tal takum le mahal al fadi wa akudu raha shuwiya." nas ketiir gi ja wa gi ruwa, wa umon zaatu ma indu zaman le akulu. ³² Yala umon ruwa be murkab fi mahal al fadi. ³³ Lakin umon aiynu nas del bi ruwa, wa kurtar arufu homon, wa homon jeri hinak ma kuraiin min kulu medina . ³⁴ Zaman umon ja fi taraf bahar, Huwo aiynu nas ketiir wa huwo hin le umon, leanu umon ze kuruf al ma indu sedu, biga huwo bada alimu umon hajat ketiir. ³⁵ Zaman wokit biga mutaakir, talamiz bitou ja le Howo wa kelim," ³⁶ Mahal de khala wa zaman biga mutaakiir. Rasulu ashan bi ruwa fi juwa hela ashan bi biyu hajat ta akulu tomon. ³⁷ Lakin Huwo juwabu kelim le umon, " wodi takum le umon haja ashan bi akulu." Umon kelim le huwo, " Kede nina ruwa ashan isteri esh be mitteen dinar ashan bi wodi le umon wa bi akulu?" ³⁸ Huwo kelimu le umon, indakum kam esh?" Ruwa takum aiynu. zaman umon ligo, umon kelimu, "khamsa esh wa itniin samaga." ³⁹ Huwo wori le nas kulu ashan bi geni tehet fi gesh fi mujmuat. ⁴⁰ Umon geni tehet fi mujmuat ta meyat, wa khamsinat. ⁴¹ Huwo shilu khamsa esh wa itniin samaga de, wa huwo bada aiynu fi samah wa bariku wa kasuru esh de wa wodi le talamiz ashan bi waza le nas. Huwo kaman gesimu itniin samaga de le umon kulu. ⁴² Umon akulu lahadi umon tala sabaniin. ⁴³ Umon limu esh al fadulu, mala itnasar gufa, Wa kaman samagat al fadulu, ⁴⁴ Wa nas al kan akulu de adad tomon khamsa alf. ⁴⁵ Huwo tuwali kelimu le talamiz ashan bi arkab fi murkab wa bi ruwa gidam le tija a tani ta bahar, le Bethsaida, fi wokit huwo bi ferteku nas al limu. ⁴⁶ Zaman umon kalas ruwa, Huwo ruwa fi ras jebel ashan bi seli. ⁴⁷ Fi misah, murkab kan biga fi nus ta bahar, wa huwo kan fadul barau.. ⁴⁸ Huwo kan aiynu umon tabaniin fi sugu murkab, leanu hawa kan bi ja shedid le umon. Gerib sabah huwo ja le umon, bi douru fi ras moyo, wa huwo deiru ja ashan bi ruwa jambu umon. ⁴⁹ Lakin zaman umon aiynu huwo bi douru fi ras moyo, umon fekiru inu huwo baati wa umon kore bi sot shedid. ⁵⁰ Leanu umon aiynu huwo wa umon kan kafu. Huwo tuwali wonusu ma umon wa kelimu le umon, gowi takum gelba! de ana! ma takum kafu!" ⁵¹ Huwo arkab fi murkab ma umon, wa hawa kan wogif. Umon kan mustagrabin shedid . ⁵² umon kan ma fahimu mana ta esh de sunu. wa kan, gulub tomon tala gowi. ⁵³ Zaman umon gata bahar, umon ja nezil fi Gennesaret wa garasu murkab. ⁵⁴ Zaman umon tala bara min murkab, tuwali nas arufu huwo, ⁵⁵ Wa umon bada jere hawli iklim kulu ashan bi jibu nas al ayaniin be biris min ai mahal al umon asuma Yesua fogo. ⁵⁶ Kulu ma kan huwo bi dakalu fi beled, au medina au fi doula, umon bi kutu nas al ayaniin fi suk , Umon bi asalu huwo ashan bi lemesu taraf gumas, wa nas kutar al kan lemesu huwo ligo ilaj.