¹ Phariseen wa baad min kutaba al kan ja min Urselim limu jambu huwo. ² Umon aiynu inu baad min talamiz tou bi akulu be iden al waskan, al, ma kasulu. ³ ( Phariseen wa yahudiin kulu ma bi akulu ile kan umon kasulu iden tomon, ashan umon bi hafisu tagalid ta sheyuk. ⁴ Kan phariseen ja min suk umon ma bi akulu, ile kan umon beredu, wa fi hajat ketir al umon gi amulu, ze kasulu kababi, aziyar, abarig, suhana ta nihas wa teribeza al umon gi akulu fogo de.) ⁵ phariseen wa kutaba asalu Yesua, " Malu talamiz taki ma gi amulu hasab tagalid ta?"sheyuk, umon gi akulu esh bedun kasulu iden ⁶ Lakin huwo kelim le umon, " Isaiah naba an kebiriya takum, Ze ma moktub, ' nas del gi ihterimu ana bes be kalam, lakin gelba tomon beyid min ana. ⁷ Ebada tomon le ana ma indu faida, umon gi alimu awamir ta nas ze akida tomon. ⁸ Intum sibu wosiya ta Allah wa intum gi hafisu tagalid ta nas shedid." ⁹ Huwo kaman kelimu le umon, "Kef intum aba wosiya ta Allah wa intum bi hafisu tagalid takum! ¹⁰ Musa kelim, ' Ihterim abu taki wa uma taki; wa, ' kulu zol al bi wonusu batal an abu au uma tou bi mutu.' ¹¹ Lakin intum kelimu, ' Iza kan zol gi kelim le Abu tuo aw Uma tuo, " Ayi musaada al inta bi ligo min de howo Ghorban"' (Al huwo bi gul, "wodi le Allah'), ¹² De bi mana inta ma sibu huwo ashan bi amulu ai haja le abu tou au uma tou. ¹³ Intum gi karabu kelima ta Allah bi tagalid takum al wodi le intum. wa fi hajat ze de al intum gi amulu. ¹⁴ Huwo nadi nas al limu tani mara wa kelim le umon, " Asuma takum le ana, intum kulu, wa keli intum fahim. ¹⁵ Mafi haja min bara al insan bi akulu al bi waskanu huwo. huwo haja al bitala min batna ta insan yau bi waskanu huwo. ¹⁶ " ¹⁷ Biga zaman Yesua tala min nas al limu wa dakalu fi bet, talamiz tou asalu huwo an amsila de. Yesua kelimu, " ¹⁸ Hal intum kaman lisa ma gi fahimu? Intum ma gi fahimu inu kulu haja al gi dakalu le insan min bara ma bi waskanu huwo, ¹⁹ Le anu ma bi agder wosulu fi gelba tou, lakin gi ruwa fi batna tou yala bi tala bara fi bakana?" wa bi kalam de Yesua kelimu inu kulu akil nedif. ²⁰ Huwo kelimu, "Huwo haja al bi tala min insan yau gi waskanu huwo. ²¹ Leanu min juwa insan, min gelba gi tala afkar al batal, daara, serga, katulu, ²² Zina, tama, sahara, kadab, shahwa, amulu hajat al batal, karabu sumaa, kibriya, shokol ahmak. ²³ Kulu hajat al batal de gi tala min juwa wa yau waskanu zol." ²⁴ Huwo tala min hinak wa ruwa fi iklim ta tyre wa sidon. min hinak huwo ruwa fi bet, wa huwo ma deir ai zol keli arufu, lakin huwo ma bi agdeir dusu nefsa. ²⁵ Hagiga, kan fi mara biniya tou indu aruwah al sherira hiya kan asuma an Yesua,hiya ja wa dengir gidam kura ta Yesua. ²⁶ Wa kan mara min Yonan, Fenikiya min Suriya. hiya asalu Yesua ashan bi turudu shetan min biniya tou. ²⁷ Huwo kelim le hiya, " kede akilu iyal de awel. Ashan huwo ma kwes ashan bi wodi esh ta atfal wa bi jadau le kelab." ²⁸ Lakin hiya juwabu wa kelimu le huwo, " Naam, Ya Rab, hata al kelab fi tehet tarbeza bi agder akulu bagi akilat al gi waga waga min iyaal suhar tehet tarabiza de." ²⁹ Huwo kelim le hiya, " Ashan kalam al inta kelimu de, ina bi agdeir ruwa. Aruwah de tala bara min biniya taki." ³⁰ Hiya raja le bet wa ligo biniya tou bi num fi ras serir, wa aruwah de faat. ³¹ Baad dak huwo tala min iklim ta Tyre, wa min Sidon le bahar ta Galileya fok le iklim ta Decabolis. ³² Umon jebu le huwo zol ataresh wa ma i wonusu kwes, wa umon asalu huwo ashan bi kutu iden fogo zol de. ³³ Baad dak huwo shilu zol de bara min mahal al nas ketir fogo de, huwo kutu asbaa tou fi adana ta zol de, wa huwo tufu buzak wa lemesu lesan ta zol de. ³⁴ Baad dak huwo aiynu fok fi samah wa kelim le huwo " Ephphatha," al huwo kelim gali, " afta!" ³⁵ tuwali adana tou kan fata, wa lesan al kan morbut de feku, wa huwo bada wonusu kwes. ³⁶ Yesua kelim le umon ashan ma wori le ai zol. wa kulu ma Yesua gi kelim le umon ashan keli umon ma wonusu, Umon gi wori aktar wa aktar. ³⁷ Umon istagarab, wa gi kelimu, huwo amulu kulu hajat kwes. Hata huwo kutu zol al ma gi suma gi asuma, wa ataresh gi wonusu