¹ Umon ja le tija tani ta bahar de, fi iklim ta Gerasenes. ² Zaman Yesua bi tala bara min murkab, zol moskun be aruwah serir tuwali ja le umon min magabir. ³ Zol de aiz fi magabir. mafi zol agder robutu huwo hata be genzir. ⁴ Leanu robutu huwo ketiir marat bi kalbasat ma genzirat. huwo gata genzirat de wa huwo kasuru kalbasat de kulu. mafi zol al bi agder gobudu huwo. ⁵ Kulu yom bilel wa nahar huwo fi magabir wa jebal, , howo bi kore bi sot shedid wa bi gatau nefsu bi hujar al seniin. ⁶ Zaman huwo aiynu Yesua min masafa beid, huwo jere le huwo wa dengir gidam tou. ⁷ Huwo kore be sot fok, "Inta deru min ana sunu, Yesua, Ibin Allah al Aali? Ana bi asalu inta be isim ta Allah, mata azibu ana." ⁸ Huwo kelimu le huwo ya roho al sherir tala bara min zol de. ⁹ Huwo asalu zol de, " Isim taki munu? " Huwo juwabu, " isim tai Legion, leanu nina kutar." ¹⁰ Huwo asalu Yesua tani wa tani ashan ma rasulu umon bara min ikelim dak. ¹¹ Wa kan fi adad kebiir ta koduruk gi akulu ges fi ras jebel, ¹² Wa umon asalu Yesua gali, " rasulu nina le kodurukat dak; keli nina dakalu fi jisim tomon." ¹³ Yesua sedeku le umon; aruwah al sherir de tala bara wa dakalu fi kodurukat. wa umon bada jere min ras jebel le bahar, wa kan gerib alfen min kodurukat katis fi juwa bahar. ¹⁴ Baad dak nas al kan gi harasu kodurukat del jere ashan bi wori kabar ta haja al hasil de fi medina wa fi kulu beled. wa biga nas ruwa ashan bi aiynu haja al hasil de. ¹⁵ Baad dak umon ja le Yesua wa umon aiynu zol al kan moskun be aruwah al sherira, al kan huwo moskun be legion, huwo lebisu wa gi geni wa kan mugkh tou biga kwes, wa umon kan kafu. ¹⁶ Nas al aiynu sunu hasil le zol al moskun be aruwah al sherira de wori le umon kalam de be tafasil, wa nas de kaman kelim le umon an haja al hasil le kodurukat. ¹⁷ Baad dak umon bada asalu huwo ashan bi sibu beled tomon. ^{20 18} Zaman howo gi arkab murkab, zol al kan moskun bi aruwah al sherira de asalu huwo ashan huwo bi ruwa ma Yesua. ¹⁹ Lakin Yesua ma rudu le huwo, lakin kelimu le huwo, " Ruwa fi bet taki le usura taki wa wori le umon an haja al Rabuna amulu le inta, wa huwo zahiru le inta rahma." Biga zol de ruwa fi Decapolis wa bada wori haja al kebiir al Yesua amulu le huwo, wa ai zol kan istagrab. ²¹ Zaman Yesua gata be murkab tanimara le tija tani de, nas kutar lemu hauwli huwo, wa ze ma huwo kan fi taraf bahar. ²² Biga wahid min ruwasa ta majma ja isim tou Jairus, wa zaman huwo aiynu Yesua, huwo dengir gidam Yesua. ²³ Wa huwo asalu tani wa tani, gali, " Biniya tai gerib bi mutu Ana bi asalu inta ashan, bi ja kutu idab taki fi ras tou ashan hiya bi kun kwes wa bi ish." ²⁴ Biga Yesua ruwa ma huwo, wa nas ketir ruwa wara huwo wa kan mahal biga deyig le huwo. ²⁵ Kan fi mara hinak indu nezif ta dom le fetera ta itnashar sena. ²⁶ Hiya kan taban min gabilu Dakatir ketiir wa ai haja al hiya indu kalasu, bidal hiya bikun kwes hala tou gi zidu kaab. ²⁷ Zaman hiya asuma kabar an Yesua, hiya ja wara Yesua wa lemesu gumas tou. ²⁸ Hiya kelimu, " Iza kan ana lemesu sala gumas tou, ana bi ligo ilaj." ²⁹ Zaman hiya lemesu huwo, nezif de wogif, wa hiya ashur fi jisim tou inu hiya ligo ilaj ta ayan al kan gi taabu hiya. ³⁰ Tuwali Yesua lahisu fi nefsa tou inu guwa tala min jesim tou. Huwo bada lefet le nas wa kelimu, " De munu yau lemesu gumas tai?" ³¹ Talamiz tou kelimu le huwo, " Inta aiynu yau nas ketiir hawili inta, wa inta gi kelim, ' Munu yau lemesu inta?" ³² Lakin Yesua kan gi fetisu zol al amulu kalam de. ³³ Mara de, zaman hiya arufu haja al hasil le hiya, hiya kan kafu wa jisim tou rogus. hiya ja wa dengir gidam Yesua wa wori le Yesua kulu hajat al kan hasil. ³⁴ Yesuah kelimu le hiya, "Biniya tai, Imaan taki aliju inta. Ruwa be salam wa keli inta ligo ilaj min ayan taki. ³⁵ Wa zaman kan huwo gi wonusu, fii baad min nas ja min reis ta mujama, gali, " Biniya taki mutu kalas. malu inta gi taabu Mualim?" ³⁶ Lakin zaman Yesua asuma kalam al umon wonusu de, Huwo kelim le reis ta mujama de, " mata kafu, amin bes." ³⁷ Huwo ma shilu ai zol ma huwo ila Butrus, Yakub wa Yuhana, aku ta Yakub. ³⁸ Umon ja fi bet ta reis ta mujama wa huwo aiynu nas gi kore shedid; umon kan gi kore wa bi asuwat fok shedid. ³⁹ Zaman huwo dakalu fi bet de, huwo kelim le umon, " Malu intum haznaniin wa intum gi kore? jena de ma mutu lakin hiya gi num." ⁴⁰ Umon bada ataku le Yesua. Lakin Yesua sibu umon bara wa huwo shilu Abu ta jena ma uma ta jena de wa nas al kan ma huwo, wa huwo ruwa fi mahal al kan jena de fogo. ⁴¹ Huwo amsuku ida ta jena de wa kelimu le hiya, " Talitha, Koum!" al mana tou gal, " Ya Binya suker, ana kelimu le inta, Gum fok." ⁴² Wa tuwali jena gum fok wa bada douru (wa hiya kan indu 12 itnashar sena). wa umon tuwali tala mustagarabin shedid. ⁴³ Biga huwo anziru umon shedid ashan kede umon ma wori kalam de le nas taniin. yala huwo kelim le umon wodi haja ashan hiya bi akulu