¹ Tanimara huwo bada derisu fi taraf bahar, wa nas ketir lemu jambu huwo, huwo nutu fi juwa murkab al kan fi bahar, wa huwo geni tehet fogo,nas kulu kan bi geni fi taraf bahar jambu murkab. ² Huwo alimu umon hajat ketiir be amsila, wa fi talim tou de yau hajat al huwo kelimu le umon. ³ asuma, Muzari ruwa ashan zara tirab tou. ⁴ Ze ma huwo gi rusu tirab, baad min tirab waga fi sika, wa tiyur ja wa akulu. ⁵ Baad min tirab waga fi mahal hujar al mafi fogo turab ketir, umon gum be sura , leanu mahal de ma indu turab ketiir. ⁶ Lakin Zaman shemis tala, umon yabis, ashan umon ma indu juzur, umon yabis. ⁷ Baad min tirab waga fi nus ta shok. shok de raba wa kanagu umon, wa umon ma weledu ai dura. ⁸ Baad min tirab waga fi tin al kwes wa umon raba wa jabu intaj wa gi zidu wa umon raba kwes tanin teletiin, sitiin wa taniin miya marat. ⁹ Baad dak huwo kelimu, "ai zol al indu adana ashan bi asuma, kede huwo asuma!" ¹⁰ Zaman Yesua biga barau, nas al kan gerib ma huwo sawa ma talamiz asalu huwo an amsila de. ¹¹ Huwo kelim le umon, "Wodi le intum sir ta malukut ta Allah. Lakin le nas al bara hinak ai haja be amsila, ¹² Ashan kan umon aiynu, naam umon bi aiynu, lakin umon ma bi suf, wa kaman kan umon asuma, lakin umon ma bi fahim, au umon bi rija wa Allah bi afi umon." ¹³ huwo kelimu le umon, " Intum ma gi fahim amsila de? Biga kef intum bi agder fahimu bagi amsila taniin de?" ¹⁴ Muzari de bi zarau injil, ¹⁵ del yau nas al fi sika al injil bi zarau. Kan umon asuma, Sitan bi ja tuwali ashan silu kilma al bashiru le umon de. ¹⁶ Wa del yau tirab al waga fi mahal ta hujar; munu, Zaman umon asuma kalam de umon tuwali istakbil be farah. ¹⁷ Lakin umon ma indu juzur fi nefsa tomon lakin umon amin fi zaman besit. Baad dak zaman taab wa mashakil ja be sabab kalam de, umon waga be sura. ¹⁸ Wa taniin al zarau fi nus shok. Umon yau del al asuma kalam, ¹⁹ Lakin humum ta duniya wa niya ta shokol ganiyan wa shahwat wa hajat taniin bi ja wa bi kanagu kelima de, wa ma weledu samar. ²⁰ Wa tirab al waga fi tin al kwes, de yau al asuma kelima, wa istakbil kelima wa weledu samar teletiin sitiin wa tanin miya. marat ²¹ Yesua kelim le umon, " hal inta bi jibu lamba fi juwa bet wa bi kutu tehet gufa au tehet seriir? inta bi jibu wa bi kutu fi ras tarabiza ta lamba. ²² Mafi haja al bi dusu al ma bi agder arufu, wa mafi siir al ma bi tala bara ashan bi arufu. ²³ Iza kan ai wahid indu adana ashan asuma, kede huwo asuma!" ²⁴ Huwo kelim le umon, " kutu bala fi haja al intum asuma, be mizan al inta wozinu bi huwo yau bi wozinu le inta, wa ketir bi zidu le inta. ²⁵ Leanu zol al indu, bi wodi le huwo ketir, wa le zol al ma indu, hata haja huwo indu bi shilu." ²⁶ Huwo kaman kelim, " Molokut ta Allah geni ze zol zara tirab tou fi turab. ²⁷ huwo bi num bilel wa bi gum be nahar, wa tirab de bi gum wa bi raba, hata kan huwo ma arufu raba kef. ²⁸ Ardi bi weledu dura be nefsa tou: awel nabat yala awrak, yala biga dura fi awrak. ²⁹ kan dura de kalas nigitu, huwo tuwali bi rasulu ashan bi jibu seresere leanu zaman ta hasad ja." ³⁰ Huwo kelimu tanimara," Nina bi karinu molokut ta Allah be shunu, au amsila yatu al nina bi istakdimu ashan bi sharau kalam de? ³¹ Huwo ze haba ta khardal, Iza, kan zarau, huwo bizra al suker fi duniya. ³² Lakin, iza kan zarau. huwo bi raba wa bi tala kebir min kulu buzur, wa bi kutu furu kubar, ashan tiyur al samah bi abinu biyut tomon fi dul tou." ³³ Bi amsal ketir ze de huwo kelima de le umon, ashan kef umon bi agder fahim, ³⁴ Wa huwo ma wonusu le umon bidun amsal, Lakin iza kan huwo barau, huwo bi bada wori ai haja le talamiz tou. ³⁵ Fi yom dak, zaman biga misah, huwo kelim le umon, " Keli nina ruwa bi tija dak." ³⁶ umon sibu nas al limu de, umon shilu Yesua ma umon, ze ma huwo kan, fi murkab. fii kan marakib tanin gi ruwa sawa ma umon. ³⁷ Hawa bada ja shedid, wa moya dakal fi murkab gerib bi malau murkab. ³⁸ Lakin yesua be nefsu kan fi akir murkab, bi num fi makada. umon goumu huwo, " ya mualim, inta ma arufu nina kalas gi ruwa mutu? " ³⁹ Huwo gum fok, wa wobiku hawa de, wa huwo kelim le bahar, " keli yekun fi salam! kun hadi" Baad dak hawa de wogif, wa biga kan fi hudu. ⁴⁰ Baad dak huwo kelimu le umon, " Lee intum bi kafu? hal intum lisa ma indu iman?" ⁴¹ Umon kan kafu shedid wa kelimu le baad tomon, ?"Zol de munu, hata hawa wa bahar gi ihterim huwo.