¹ Fi sabah bedri, ruwasa ta khahana ijtama sawa ma shiyuk wa al kataba wa kulu mejelis al yahudiin. Umon robutu Yesua wa istelim huwo le Bilatus. ² Bilatus asalu huwo, "Hal Inta Melik ta Yahud?" Huwo juwabu Bilatus, " Inta Yau Kelim." ³ Reis ta khahana kan gi ishteki huwo bi hajat ketir. ⁴ Bilatus asalu huwo tanimara, " Hal inta ma gi juwabu? Aiynu umon gi ishteki inta bi kam hajat!" ⁵ Wa Yesua tanimara ma juwabu Bilatus, wa de sibu huwo istagarab. ⁶ Yala biga fi zaman ta Id, Bilatus daiman gi fetisu le umon wahid mosjun, mosjun al umon talabu, ⁷ Wa fii zol fi sijin ma mutameridiin isim tou Barabas huwo kan amulu jerima ta katulu fi zaman ta tamarud. ⁸ Nas del ja le Bilatus wa bada asalu huwo ashan bi amulu le umon ze ma kan huwo amulu. ⁹ Bilatus asalu umon wa kelim, " Intum deiru keli ana feku le intum Melik ta Yahud?" ¹⁰ Ashan huwo kan arufu inu ruwasa ta khahana istelimu Yesua le huwo ashan hasada. ¹¹ Lakin ruwasa ta khahana wori le nas al limu keli kore kore ashan bi fiku Bararbas. ¹² Bilatus juwabu umon tani mara wa kelimu, "Yala ana bi amulu shunu ma Melik ta Yahud de?" ¹³ Umon kore kore tani mara, " Keli selibu huwo!" ¹⁴ Bilatus kelim le umon, " Huwo amulu shunu batal?" Lakin umon kore shedid wa shedid, " Keli Selibu huwo." ¹⁵ Bilatus deiru keli nas kun farhaniin, biga huwo fiku Barabas le umon. Huwo wodi asakir ashan bi jeledu Yesua baad dak bi selimu huwo ashan selibu. ¹⁶ Asakir dakalu ma huwo fi bet ta welaya ( Al huwo Re-asa ta hakuma), wa umon lemu ketiba ta Jesh kulu. ¹⁷ Umon libisu le Yesua gumas ahmar urjuani, wa kutu tegiya ta shok fi ras tou. ¹⁸ Wa umon bada wodi tehiya le huwo wa umon gal, Salam , Ya Melik Ta Yahud!" ¹⁹ Wa umon kan gi dugu ras tou be asaya wa gi tufu buzak le huwo. Wa kan umon dengir ma rukuba le huwo. ²⁰ Zaman umon alisu huwo, umon shilu gumash al ahmar al urjuani de min huwo wa umon libisu le huwo gumash tou, Yala umon shilu huwo ashan bi ruwa selibu huwo. ²¹ Wa kan fi wahid zol tani Samaan Al Ghiyrawani, kan gi ja min mahal zara( huwo kan Abu ta Alexandar wa Rufas) wa umon asuru huwo ashan bi arfa selib ta Yesua. ²² Asakir jibu Yesua fi mahal al isim tou Gologota ( Al mana tou " Mahal ta jumjuma" ). ²³ umon wodi le huwo khamur al mulakbat ma dawa ta waja jisim, lakin huwo ma ashurubu. ²⁴ Umon selibu huwo wa gesimu gumash tou bi teriga ta gumar, al kef kulu zol bi shilu. ²⁵ De kan saa talata zaman umon selibu huwo. ²⁶ Wa fi ras selib de fok umon katibu gal Melik al Yahud. ²⁷ Kan umon selibu ma Yesua itniin haramiya, wahid fi yemin tou wa wahid fi shamal tou. ²⁸ Biga kalam al kan katibu fi kitab de timu al gi kelimu gal, 'Hasibu huwo ma nas al katiyiin. ²⁹ Nas kan gi ruwa jambu huwo gi hagiru huwo wa gi hizu ras tomon wa gi kelimu, " Aha! inta zol al bi demiru haikal wa bi abinu fi talata ayam, ³⁰ Kalisu nefsak wa nezil min selib. ³¹ Be nefsa teriga ruwasa al khahana al kan gi hagiru huwo fi bein tomon, sawa ma kataba, wa umon kelimu, "Huwo kalisu nas taniin, Lakin huwo ma agdeir ashan bi kalisu nefsa tou. ³² Keli al mesih, Melik ta Israel nezil tehet min selib, ashan nina bi aiynu wa bi amin." Wa nas al kan selibu sawa ma huwo de kan kaman gi hagiru huwo. ³³ Wa kan saa sita, wata tala duluma lahadi saa tisa. ³⁴ Fi saa tisa Yesua kore be sot shedid, " Eloi, Eloi lama sabachathani?" Al mana tou gal, "Ya Rab, Ya Rab, Lee inta sibu ana?" ³⁵ Fii baad min nas al kan gi wogifu hinak asuma kalam de, umon kelimu, "Aiynu, huwo gi nadi Eli." ³⁶ Fii wahid min nas de, kutu karma fi isfunj, wa kutu fi kasab wa wodi le huwo ashan bi ashrubu. Zol de kelim, " Keli nina aiynu kan sei Elia bi ja nezilu huwo tehet. " ³⁷ Baad dak Yesua kore bi sot shedid wa mutu. ³⁸ Setara ta haikal sheretu le itniin min fok le tehet. ³⁹ Zaman kaid ta Jesh al kan gi wogifu hinak wa ainu Yesua huwo mutu bi teriga de, huwo kelim, " Hagiga zol de weled ta Allah." ⁴⁰ Wa kaman kan fi Nusuwan umon kan gi aiynu min beyid. Min umon kan Mariam Magdalina, Mariam ( Uma ta Yacob al askhar wa Joses ) wa Salome. ⁴¹ Al kan zaman huwo fi Galileya umon douwru wara huwo wa akdim huwo, wa nusuwan taniin al kaman ja ma huwo fi Urselim. ⁴² Zaman wata tala mesa, De kan yom ta tejhizat , De yom,, Al gubal sebit, ⁴³ Wa Yusif al kan min Rama kan ja hinak, huwo zol muhtaram ta mejeles, huwo kan gi intezir malukut ta Allah, huwo ruwa le Bilatus wa asalu Jisim ta Yesua. ⁴⁴ Bilatus kan mustagarab inu Yesua kan kalas mutu; huwo nadi kaid ta jesh wa asalu huwo kan sei Yesua mutu. ⁴⁵ Zaman Bilatus ligo kabara min kaid ta jesh inu Yesua kalas mutu, huwo wodi jisim ta Yesua le Yusif. ⁴⁶ Yusif ishteri gumash, huwo nezilu Yesua min selib, wa kati huwo ma kufuna, wa kutu huwo fi turuba. Yala huwo kutu hajer kebir fi bab ta .turuba. ⁴⁷ Mariam al Magdalina wa mariam uma ta Joses kan aiynu mahal al dufunu huwo fogo de