¹ Zaman kalas yom sebit kalasu, Mariam Magdalin, wa Mariam uima ta Yacob, wa Salome, jibu riha ashan bi kutu fi jisim ta Yesua. ² Fi sabah bedri fi yom al aweil ta usbu, umon ruwa fi gubur zaman shemish lisa gi tala. ³ Umon gi wonusu ma baad tomon, " Munu yau bi arufa hajir ta bab ta gubur de le nina?" ⁴ Wa zaman umon lisa gi fetisu , umon aiynu hajir de shilu bara, wa kan hajir de kebir shedid. ⁵ Umon dakalu fi gubur, wa umon aiynu zol lebisu gumash abiyad, geni fi safa yemin, wa umon kan istagarab. ⁶ Huwo kelim le umon, " ma takum istagarab. intum gi fetisu yesua, Al nasiri, Al kan selibu. Huwo gum! Huwo mafi hini. Aiynu takum mahal al kan kutu huwo fogo de. ⁷ Lakin ruwa takum, wa kelim takum le talamiz tou, wa kaman le Buturus, ' huwo gi ruwa gidam takum le Galileya, hinak intum bi ligo huwo ze ma huwo kelimu le intum.'" ⁸ Umon tala bara wa gum jeri min mahal gubur; wa kan umon gi kafu wa mustagarbiin. Umon ma kelimu le ai zol leanu umon kan gi kafu. ⁹ Baad ma huwo gum min mutu, fi sabah bedri ta aweil usbu huwo zahir awel le Mariam Magdalin, Al kan huwo turudu min hiya saba aruwah ta sitan, ¹⁰ Hiya kan ruwa wa kelim le nas al kan ma huwo, wa kan umon gi kore wa haznaniin. ¹¹ Umon asuma gal huwo hai wa hiya kan aiynu huwo, Lakin umon ma sedek. ¹² Baad hajat del hasil huwo zahir fi shikil tani le itniin nas al kan gi douru fi sika. ¹³ Umon ruwa wa kelimu le bagi talamiz, Lakin umon ma sedek. ¹⁴ Fi akir Yesua zahir le talamiz al itnashar fi zaman al kan umon gi akulu fi terabiza, wa huwo wobiku umon ashan adam iman tomon wa gulub tomon al kan gowi, ashan umon ma deiru sedek nas al kan ainu huwo zaman huwo gum min mutu. ¹⁵ Huwo kelimu le umon, " Ruwa takum fi duniya kulu wa bashiru takum injil le nas ta duniya kulu. ¹⁶ Kulu zol al amin wa amidu bi ligo kulasa, wa kulu zol al ma amin bi hakimu. ¹⁷ Alamat de bi ruwa ma nas al amin: Fi isim tai umon bi turudu siyatiin bara. Umon bi wonusu be rutanat al jedid. ¹⁸ Umon bi gobudu dabaib bi iden tomon, wa iza kan umon asharabu ai haja al gi katulu, Ma bi amulu le umon haja. Umon bi kutu iden fi ras ta nas al ayaniin, wa umon bi kun kwesiin." ¹⁹ Wa baad ma Rabuna wonusu ma umon, shilu huwo fi samah wa huwo geni fi ida al yemin ta Allah. ²⁰ Talamiz ruwa wa bashiru fi kulu mahal wa kan Rabuna gi ishtakal ma umon wa sabitu kelima be alamat al kan umon gi amulu.