¹ Kan fadulu itniin yom le id ta paska wa al Fitir. wa kan ruwasa ta khahana wa al kataba gi fetisu teriga ashan kef umon bi gubudu Yesua wa bi katulu huwo. ² Wa umon kan bi kelimu, "keli ma bi kun fi zaman ta id, ashan nas ma bi gum be muzaharat." ³ Zaman Yesua kan fi Bethany fi bet ta Simon al ta judam, wa ze ma huo gi teky fi ras terebiza, fii mara ja ma gizaza al jemil shedid wa fogo riha al taman tou ghali shedid. hiya kasuru gizaza wa kubu riha de fi ras ta Yesua. ⁴ Lakin fi baad min talamiz kan zalaniin. Umon bada kelimu fi nefsa tomon gal, " De kasara ta shunu ze de? ⁵ Kan riha de bi agder biyu bi aktar min tultumiya denar, wa bi wodi le masakiin." Yala umon kore kore ma hiya. ⁶ Lakin Yesua kelimu, " sibu takum hiya barau. Lee intum gi azibu hiya? Hiya amulu haja al jemil le ana. ⁷ Intum daiman indu nas al masakiin ma intum, wa kulu ma intum kan deiru , intum bi agder amulu kwes le homon, Lakin intum ma bi ligo ana kulu yom. ⁸ Hiya amulu haja al hiya bi agder, hiya masa jesim tai le dufunu. ⁹ Hagiga ana kelimu le intum, kulu ma gi bashiru injil fi duniya bi wonusu haja al mara de amulu le zekira ta tou. ¹⁰ Baad Yahuza al Iscariuti, wahid min talamiz, ruwa le ruwasa ta khahana ashan bi selimu Yesua le umon. ¹¹ Zaman ruwasa ta khahana asuma kabara de, huwo kan tala farhan wa huwo waad ashan bi wodi le huwo gurush. Huwo bada fetisu fursa ashan kef huwo bi selim Yesua. ¹² Fi yom al awel ta fitir, zaman umon gi gedimu koruf ta paska, talamiz tou keimu le huwo, "Inta deiru keli nina ruwa ween ashan bi jahizu, wa ashan inta bi akulu akil ta paska?" ¹³ Huwo rasulu itniin min talamiz tou wa huwo kelim le umon, " Ruwa takum fi medina, wa intum bi ligo zol gi arfa jak kebir maliyan ma moyo, ruwa takum wara huwo. ¹⁴ Kan huwo dakalu fi juwa bet, ruwa takum wara huwo wa kelim takum le sedu bet de, ' Mualim kelimu , " wenu bet al ana bi akulu paska fogo ma talamiz tai?" ¹⁵ Huwo bi wori le intum gurfa al kebir fok jahis, Yala hinak nezemu takum le nina." ¹⁶ Talamiz gum ruwa fi medina. Umon ligo kulu hajat ze huwo kelimu le umon , wa umon jahisu akil ta paska. ¹⁷ Zaman kan fi misah Huwo ja ma talamiz al itnashar. ¹⁸ Zaman umon bada akulu, Yesua kelimu, " Ana bi kelimu le intum hagiga, wahid min intum al gi akulu ma ana bi selimu ana," ¹⁹ Umon kan kulu tala haznaniin, wa kulu wahid kan gi kelimu le huwo, " Hal de ana, de ma ana?" ²⁰ Yesua juwabu wa kelimu le umon, " De bi kun wahid min al itnashar, wahid al gi dakalu esh ma ana sawa fi sahan. ²¹ Ibin al insan bi ruwa ze ma katibu an huwo. Lakin taab le zol al gi selimu Ibin al insan! kan bi kun kwes iza kan zol de ma weledu. ²² Ze ma umon kan gi akulu, Yesua shilu esh wa baraku, wa kasuru. Huwo wodi le umon wa kelimu, " shilu takum de. de yau jisim tai." ²³ Huwo shilu kubaya, wa wodi shukuran, wa wodi le umon, umon kulu ashrabu. ²⁴ Huwo kelim le umon, " De yau Dom tai ta ahad, dom al kubu min ajil nas ketir. ²⁵ Hagiga ana kelimu le intum ,ana ma bi ashrabu tani mara min asir ta shejera de, lahadi yom dak al ana bi ashrabu al jedid fi mamlaka ta Allah." ²⁶ Zaman umon guna ternima, umon ruwa fi jebel zeitun. ²⁷ Yesua kelim le umon, " Intum kulu bi jere, leanu moktub, ' Ana bi dugu raeyi wa kurfan kulu bi shetetu.' ²⁸ Lakin baad kan ana gum, Ana bi ruwa awel min intum le Galilee." ²⁹ Butrus kelimu le huwo "iza kan nas kulu jere min inta ana ma bi jere." ³⁰ Yesua kelimu le huwo, " Ana bi kelimu le inta hagiga, Alela- Naam , Fi bilel de - gubal dik ma kore maratiin inta bi anguru ana talata marat." ³¹ Lakin Butrus kelimu,, "hata iza kan ana mutu ma inta ana ma bi anguru inta." umon kulu kelimu ze de. ³² Umon ja fi mahal gi nadi Gethsemani, wa Yesua kelim le talamiz tou, " Geni takum hini lisa ana gi ruwa seli." ³³ Huwo shilu Butrus, Yacob, wa Yuhana ma huwo wa huwo bada ashuur batal wa galgan. ³⁴ Huwo kelim le umon, " Roho tai haznan shedid, hata darija ta mutu. Geni takum hini wa sahir takum." ³⁵ Huwo ruwa gidam shuweya, Yesua dengir tehet wa bada gi seli, iza kan mumkin keli saa de ruwa gidam min huwo. ³⁶ Huwo kelimu, " Abba, Ya Abui, kulu hajat mumkin le inta. shilu kubaya de min ana. Lakin ma irada tai, keli kun irada taki." ³⁷ Huwo rija wa ligo umon gi num, wa huwo kelim le Butrus, " Samaan, inta gi num? Intum ma bi agder ashan bi sahir wahid saa? ³⁸ Sahir wa seli takum ashan intum ma bi waga fi tejiriba. Fa Roho neshit, wa lakin jesim deyif." ³⁹ Huwo ruwa tanimara ashan bi seli, wa huwo istakdim nefsa kelimat de. ⁴⁰ Zaman huwo rija, huwo ligo umon gi num, uyun tomon tegil, umon ma arufu umon bi kelimu shunu le huwo. ⁴¹ Huwo ja dur nimra talata le umon wa huwo kelimu, " Hal intum lisa gi num wa gi akudu raha? Kefaya! Zaman kalas ja. Aiynu! Ibin Al insan be selimu le iden ta nas al katiyiin. ⁴² Gum takum fok; keli nina ruwa. Aiynu zol al gi ja selimu ana de biga gerib. ⁴³ Zaman huwo lisa kan gi wonusu, Yahuza wahid min talamiz Ttou, Ja, wa ma huwo nas ketir indu seyuf wa asayat, umon ja min ruwasa al khahana, al kataba wa al shiyuk.. ⁴⁴ Biga zol al gi selimu huwo de wodi le umon alama, gal, " Zol al ana amulu le gubla de yau huwo, gobudu takum huwo. wa shilu takum huwo bi hisab." ⁴⁵ Zaman Yahuza wosulu, huwo tuwali ja le Yesua wa kelim, "Rabbi," wa huwo amulu gubla le Yesua. ⁴⁶ Baad dak umon gubudu Yesua wa umon shilu. ⁴⁷ Lakin wahid min umon al kan gi wogif jambu Yesua tala seif wa gata adana ta kadam ta reis ta khahana. ⁴⁸ Yesua kelim le umon, "Intum ja gubudu ana, ze ana harami , intum ja ma seyuf wa asayat? ⁴⁹ zaman ana kan ma intum wa ana kan gi derisu fi haikal intum ma gubudu ana. Lakin de kulu hasil ashan al muktub bi timu." ⁵⁰ Kulu nas al kan ma Yesua jere wa sibu huwo barau ⁵¹ kan fi weled shab yau gi ruwa wara huwo, wa huwo libisu gumas al salau mi shejera, ashan bi kati jesim tou, Zaman asakir gubudu huwo . ⁵² huwo agila gumas tou wa huwo jere ariyan. ⁵³ Umon shilu Yesua le reis ta khahana. wa umon kan limu hinak be kulu ruwasa ta khahana, wa al shiyuk wa al kataba. ⁵⁴ Wa kan Butrus gi ruwa wara tou min beyid lahadi fi bet ta reis ta khahana. Huwo geni fi nus ta huras, al ka gi geni jambu nar ashan dafi nefsa tomom. ⁵⁵ Biga reis ta khahana wa mejeles ta Yahud kulu kan gi fetisu shuhuda did Yesua ashan umon bi agdeir katulu huwo. Lakin umon ma ligo ayi haja. ⁵⁶ Leanu fi nas ketir gedimu shuhudat al kezib did huwo, Lakin shuhuda tomon ma gi tafigu. ⁵⁷ Nas tanin wogif fok wa wodi shuhuda al kezib. did Yesua; Umon kelimu, ⁵⁸ " Nina asuma huwo gi kelim gal, Ana bi demiru haikal al abinu be iden de, wa fi talata ayam ana bi abinu tani al ma bi abinu be iden.'" ⁵⁹ Lisa shuhuda tomon ma gi tefig. ⁶⁰ Reis ta khahana wogif fok wa asalu Yesua, " Inta ma gi juwabu? Kalam al nas de gi wonusu did inta?" ⁶¹ Lakin huwo kan gi askut wa huwo ma juwabu. tani mara reis ta khahana asalu huwo wa kelim, " Hal Inta al Mesih, ibin Allah al Mubarak?" ⁶² Yesua kelim, " Ana huwo; wa inta bi aiynu Ibin al insan zaman kan huwo geni fi yemin ta guwa wa gi ja fi sihab ta samah." ⁶³ Reis ta khahana seretu gumas tou wa kelimu, " Hal nina lisa muhtajiin le shuhudiin? ⁶⁴ Intum asuma tejdif de. Karar takum shunu?" Umon kulu hukumu huwo ze zol al bi istehig mutu. ⁶⁵ Nas tanin bada tufu buzak le huwo wa kati wusa tou wa dugu huwo wa kelimu le huwo, "Naba!" Asakir shilu huwo wa dugu huwo. ⁶⁶ Zaman Butrus kan fi bet al be tehet, wahid biniya al kadam ta reis ta khahana ja le huwo. ⁶⁷ Hiya aiynu Butrus gi dafi nefsu fi nar, wa hiya aiynu Butrus tamam, wa hiya kelimu, "Inta kan ma Yesua al Nasiri." ⁶⁸ Lakin huwo anguru, wa kelim gal, " Ana ma arufu wele gi fahim kalam al inta gi kelim de." Yala huwo bada ruwa fi safa bab. Dik bada kore. ⁶⁹ Lakin biniya al kadam de aiynu huwo wa bada kelim tani mara le nas al kan gi wogif hinak, " Zol de kan wahid min umon!" ⁷⁰ Lakin huwo anguru tani mara. Wa baad shuweya keda nas al kan gi wogifu hinak de kelimu le Butrus, " Hagiga inta wahid min umon, Leanu inta kaman Gelilee." ⁷¹ Lakin huwo bada kutu nefsa tou fi laanat wa halifu, " Ana ma bi arufu zol al intum gi kelimu an huwo de," ⁷² Dik tuwali bada kore tanimara, Baak dak Butrus gam zekir kelimat al Yesua kan kelimu le huwo: " Gubal dik ma kore maraten, Inta bi anguru ana .talata marat," wa biga huwo waga tehet wa kore