¹ Mata hakimu, wa ma bi hakimu inta. ² Fi teriga al inta bi hukumu, bi hakimu inta, wa be wozin al inta wozinu, bi wozinu le inta. ³ Lee inta bi aiynu wasaka al fi ena ta aku taki, lakin inta ma zekiru wasaka al fi ena taki? ⁴ Kef inta bi gul le aku taki, 'keli ana tala wasaka al fi ena taki,' lisa wasaka fi fii juwa ena taki? ⁵ Intum al mumesilin! tala awel wasaka bara min ena taki, wa biga inta bi aiynu kwes ashan talau al fi ena ta aku taki. ⁶ Mata wodi haja al mukadas le kilab, wa mata jadau hajat jemil gidam khodrukat. umon bi dusu be kurayin tomon, wa bi aglib wa sheretu inta le gita gita. ⁷ Asadu, bi wodi le inta. fetisu, inta bi ligo. Dugu bab, wa bi fatau le inta. ⁸ Fa le kulu zol al asadu, bi ligo; kulu zol al fetisu, bi ligo; wa le zol al bi dugu bab, bi fatau le huwo. ⁹ Wele munu min intum, kan weled tou asadu esh, bi wodi le huwo hajer? ¹⁰ Wele kan huwo asadu samak, bi wodi le huwo debiba? ¹¹ Ashan kida, kan intum al sheririn aruf kef bi wodi hadayat kwes le iyal takum, godur sunu Abu takum al fi samah bi wodi hajat kwes le nas al asalu huwo? ¹² Ashan kida, kulu hajat al inta deir nas bi amulu le inta, inta kaman keli amulu le umon, fa de yau gawanin al Musa wa anbiya katabu. ¹³ Dakalu be bab al deik. Fa bab al wase wa kebir huwo yau sika al bi wodi nas le demar, wa hinak nas kutar bi ruwa fogo. ¹⁴ Lakin bab huwo deik wa sika de huwo sa-ab al bi silu nas le haya, wa besitin al bi ligo. ¹⁵ Keli intum kun harisin min anbiya al kazabin, al bija le intum be jilid ta korufan lakin umon morfoinat al hagiga. ¹⁶ Be semar tomon intum bi aruf umon. Hal nas bi limu inab min kasabin ta shok wele jemeza min alig? ¹⁷ Fi nefsu teriga, kulu shejer al kwes bi antij semar al kwes, lakin shejer al batal bi antij semar al batal ¹⁸ Shejera al kwes ma bi antij semar al batal wele shejera al batal bi antij semar al kwes. ¹⁹ Ai shejera al ma bi antij semar al kwes bi gatau wa bi jadau fi nar. ²⁰ Ashan badin intum bi arufu umon be semar tomon. ²¹ Ma ai wahid al bi kelimu le ana, 'Rabi, Rabi,' bi dakulu fi molokut ta samah, lakin ile del al bi amulu meshia ta Abu tai al fi samah. ²² Nas kutar bi kelimu le ana fi yom dak, ''Rabi, Rabi, nina kan ma nabau fi isim taki, fi isim taki nina turudu sitan, wa fi isim taki nina amulu hajat ketir?' ²³ Wa Ana bi kelim le umon, 'Ana ma bi arufu intum! ruwa beid min ana, intum al bi amul amail sherir. ²⁴ Ashan kida, ai wahid al asma kalam tai wa kutu fi sokol bi kun ze zol al negit al abinu bet tou fok hajer. ²⁵ Matara bi nezil, feidanat bi ja, wa hawa bi ja wa bi dugu bet, lakin ma bi waga, ashan abinu fok hajer. ²⁶ Lakin ai wahid al asma kalam tai wa ma kutu fi sokol bi kun ze zol al belit al abinu bet tou fok rumula. ²⁷ Matar bi nezil, feidanat bi ja, wa hawa wa bi dugu bet, wa bet bi waga, wa bi demir kulu kulu.'' ²⁸ De ja baat zaman Yesua kalasu wonusu kalam del, nas al limu kan istagrab be dirsa tou, ²⁹ fa huwo derisu umon ze wahid al indu sulta, wa ma ze ulama tomon.