¹ Zaman Yesua nazal min jebel, adad kebir min nas al limu ruwa wara tou. ² Zol ayan bi juzam ja le huwo wa dengir gidam tou, ''Rabi, kan indak niyah, aliju ana.'' ³ Yesua medu ida tou wa lemesu huwo, gal, Indi niyah. kun nedif.'' Nefsu zaman aliju huwo min ayan ta juzam. ⁴ Yesua kelimu le huwo, ''keli inta ma wori le ai zol. Ruwa sika taki, wa wori nefsa taki le khahana wa gedimu hadaya al Musa kan wasi, bi kun shuhudah le umon.'' ⁵ Zaman Yesua dakalu le Capernaum, kaid ta miya jesh ja le huwo wa asalu, ⁶ gal, ''kadam tai naim fi bet moshulul wa fi waja shedid.'' ⁷ Baad dak Yesua kelimu le huwo ''Ana bi ja wa aliju huwo.'' ⁸ Kaid de juwabu wa kelimu, ''Rabi, Ana ma istehik ashan inta bi dakalu fi bet tai, bes kelimu kalam wa kadam tai bi ligo ilaj. ⁹ Fa Ana kaman zol al tehet sulta ta zol tani, wa Ana indi jesh tehet ana.Ana bi kelim le wahid, 'Ruwa,' wa huwo bi ruwa, wa le wahid tani, 'ta-al,' wa huwo bi ja, wa le kadam tai, 'amul de,' wa huwo bi amul.'' ¹⁰ Zaman Yesua asuma kalam de, gelbu kasuru wa kelimu le nas al kan bi ja warau, hagiga Ana bi kelim le intum, Ana ma ligo ai zol be iman de fi Israel. ¹¹ Ana bi kelim le intum, Kutar bi ja min sherik wa gharib, wa umon bi num jambu terbeza ma Ibrahim, Ishak, wa Yaghub, fi molokut ta samah. ¹² Lakin iyal ta molokut bi jadau bara fi duluma, Fi mahal al fogo kore wa adi sunun.'' ¹³ Yesua kelimu le kaid de, ''Ruwa! ze inta amin, bi amulu le inta.'' wa kadam de aliju nefsu saa. ¹⁴ Zaman Yesua ja fi bet ta Butrus, Huwo aiynu uma ta mara ta Butrus naim ayan be huma. ¹⁵ Yesua lemesu ida ta hiya, wa huma sibu hiya. Hiya gam wa kadimu huwo. ¹⁶ Zaman biga misa, nas jabu le Yesua nas kutar al muskunin ma roho ta sherir. Huwo amiru arua keli tala bara be kilma wa aliju kulu nas al kan ayanin. ¹⁷ Fi teriga de kamilu kalam al kan kelimu be Nebi Isaiah, gal ''huwo be nefsu shalu ayan ta nina wa amrad ta nina." ¹⁸ Zaman Yesua aiynu nas al limu hawli huwo, huwo wodi tojihad ashan bi ruwa fi tija tani ta bahar Galileya. ¹⁹ Wahid min kataba ta ganun ja le huwo gal, ''mualim, Ana bi ruwa wara inta fi ai mahal inta bi ruwa fogo.'' ²⁰ Yesua kelimu le huwo, ''Sailib indum hufar, wa tiyur al fi jou indum biyut, lakin ibin al insan ma indu mahal ashan bi num fogo.'' ²¹ Wahid min telmiz kelimu le huwo, ''Rabi, keli ana ruwa awel ashan dofunu abui.'' ²² Lakin Yesua kelimu le huwo, ''Taal warai, wa sibu meitin keli dofunu meit tomon.'' ²³ Zaman Yesua dakalu fi murkab, talamiz tou ruwa wara tou. ²⁴ Hawa kebir haza bahar, ashan kida murkab kan kati be amuaj. Lakin Yesua kan naim. ²⁵ Talamiz ja le huwo wa goumu huwo, gal, ankizu nina, Rabi; nina gerib ma mutu!'' ²⁶ Yesua kelimu le umon, ''malu intum bi kafu, intum al deifin fi iman?'' Wa huwo gam fok wa wobiku hawa wa bahar. Bad dak hinak jou biga adi. ²⁷ Nas del istagrabu wa gal, ''Zol de sikil yatu, al hawa wa bahar ihterim huwo?'' ²⁸ Zaman Yesua ja fi tija tani bita bahar wa le doula ta Gadarenes, itnin nas moskunin be arua sherira gabilu huwo. Umon ja bara min mugabir wa umon kan takiyanin, ashan zol musafir ma bi futu be sika dak. ²⁹ Wa umon kore wa gali, inta deir sunu min nina, Ibin Allah? Hal inta ja hina ashan azibu nina gubal zaman?'' ³⁰ Kodurukat kan bi akulu hinak, ma beid shedid min umon. ³¹ Arua sherira del kelimu le Yesua gal, ''Kan inta turudu nina, Rasulu nina le kodrukat dak,'' ³² Yesua kelimu le umon, ''ruwa!'' Arua sherira del tala bara wa dakalu le kodrukat; wa biga kodurukat del jere min mahal al nazil de le bahar wa umon matu fi moya. ³³ Nas al kan bi haresu kodrukat del jere wa ruwa le medina wa wodi taharir kamil, Kasatan haja al hasal le nas al kan moskunin be aruwah. ³⁴ Nas al kan fi medina ja ashan gabilu huwo. Zaman umon aiynu huwo, umon asalu huwo ashan bi sibu iklim tomon.