¹ Keli intum kun harisin ashan bi wori amail takum al kwes gidam nas ashan umon bi aiynu, wele intum ma bi ligo makafa min abu takum al fi samah. ² iza inta bi wodi haja le meskin, mata afuku buruju gidamak ze ma nas al bi mesilu fi biyut ta salawat wa fi shawari. ashan umon bi ligo tesji min nas. Hagiga ana bi kelim le intum, umon kalas istelim makafa tomon. ³ Lakin iza inta bi wodi haja le meskin, keli ida taki ta samal ma arufu ida taki al yemin bi amulu sunu. ⁴ Ashan hadaya taki bi wodi be siri. Wa Abu taki al bi aiynu be siri bi wodi le inta makafa. ⁵ Kan inta bi seli, mata kun ze nas al mumesilin, Umon bi hibu ashan bi wogif wa seli fi biyut ta salah wa fi rukun ta shawari, ashan nas bi aiynu umon. Hagiga Ana bi kelim le intum, umon kalas istelim makafa tomon. ⁶ Lakin inta, kan inta bi seli, dakalu fi mahal kas. gofulu bab, wa seli le Abu taki al fi mahal siri. Wa Abu taki al bi aiynu inta fi siri bi wodi le inta makafa. ⁷ Kan inta bi seli, mata keriru kalamat al manafi ze ma nas geir yahudiyin bi amulu, Umon bi fekir be-inu bi asmau umon ashan kalamat tomon al ketir. ⁸ Ashan kida, mata kun ze umon, Abu taki arufu hajat yatu inta deiru gubal inta ma asalu. ⁹ Seli zede: Abu ta nina al fi samah, keli isim taki kadisu. ¹⁰ keli molokut taki ja. keli meshia taki yekun fi ard ze ma fi samah. ¹¹ Wodi le nina alela akil al yomi. ¹² Akfir katiya ta nina, ze ma nina kaman bi akfir nas al amulu le nina batal. ¹³ Mata dakalu nina fi tajarib, lakin naja nina min sherir. ¹⁴ Kan inta bi afi nas min batal tomon, Abu taki al samawi kaman bi afi inta. ¹⁵ Lakin kan inta ma bi afi batal tomon, Wele Abu taki bi afi batal taki. ¹⁶ Kan inta bi sum, keli inta ma zahiru wusa taki al hazin ze ma nas mumesilin bi amulu, fa umon ma bi kasulu wusa wele touru shar tomon ashan umon bi zahir le nas be-inu umon saimin. Hagiga an bi kelim le inta, umon istelim makafa tomon. ¹⁷ Lakin inta, kan inta saim, masa zed fi ras taki wa kasulu wusa taki, ¹⁸ Ashan ma bi zahir le nas tanin be-inu inta saim, Lakin bes le Abu taki al huwo fi mahal siri; wa Abu taki al bi aiynu fi siri, be wodi le inta makafa. ¹⁹ Mata kazinu le nesfak mali fi ardi ali sus wa hajat al bi segeru bi demiru, wa haramiya bi dakalu juwa wa bi seregu. ²⁰ Lakin, Kazinu le inta mali fi samah, al wele sus au hajat al gi segeru bi demiru, wa Haramiya ma bi dakalu juwa wa bi seregu. ²¹ Fa fi mahal al mali taki fogo, hinak fikra taki bikun fogo kaman. ²² Ena huwo yau lamba le jisim. ashan kida, kan ena taki kwes, Jisim kulu bikun malyan be nur. ²³ Lakin kan ena taki batal, Jisim taki kulu bikun malyan be duluma. ashan kida, kan nur al fi juwa inta hagiga duluma, duluma de bikun kebir, Duluma de bikun kebir shedid godur sunu! ²⁴ Mafi zol bi kadimu itniin seid, Au huwo bi karahu wahid wa bi hibu al tani, wele huwo bi wodi nefsu le wahid wa bi aba al tani. Inta mabi khadimu Allah wa mali. ²⁵ Ashan kida Ana bi gul le inta, Mata fekir an haya taki, inta bi akulu sunu wele inta bi asrubu sunu- wele an jisim taki, inta bi libisu sunu. Haya ma afdal min akil, wa jisim ma afdal min gumasat? ²⁶ Suf le tiyur al fi jou. Umon ma bi azra wele bi hasidu wele limu fi gugu, lakin Abu takum al fi samah bi akilu umon. Hal intum ma mohimin min umon? ²⁷ Munu min intm bi fekir ashan bi zidu sinin le haya tou? ²⁸ Le intum bi fekir an libsa? Zekir an zuhur al fi mazra, Kef umon bi raba. Umon ma bi istakal, wa ma bi salahu malabis. ²⁹ Lisa Ana bi gul le intum, hata Suliman fi kulu mejid ma libisu ze wahid min zuhur del. ³⁰ Kan Allah libisu zuhur al fi mazra, al bi zahir alela wa bukra bi jadau fi nar, godur sunu huwo bi libisu intum, intum al iman takum suker? ³¹ Ashan kida mata fekir wa gul, ' Nina bi akulu sunu?' 'wele nina bi asrubu sunu?' wele nina bi libisu sunu?' ³² Fa nas al geir Yahudiyin bi fetis hajat del, wa Abu tak al samawi arufu be-inu inta deir umon. ³³ Lakin fetis Molokut ta Allah awel wa biir tou wa kulu hajat del bi wodi le inta. ³⁴ Ashan kida mata fekir le bukra, fa yom ta bukra bi fekir an nefsu. Ai yom indu masakil tou.