¹ Zaman Yesua aiynu nas al limu, huwo ruwa fok jebel. Zaman huwo geni tehet, talamis tou ja le huwo. ² Huwo bada wonusu wa derisu umon, gal, ³ ''baraka le del al masakin fi roho, molokut ta samah de tomon. ⁴ Baraka le del al haznanin, umon bi ligo taazia . ⁵ Baraka le del al nezil nufus tomon, umon bi warisu ard. ⁶ Baraka le del al jiyanin wa atsanin ashan hagiga, Allah bi kutu umon sabanin. ⁷ Baraka le del al indum rahma, umon bi ligo rahma. ⁸ Baraka le del al gulub tomon nedif, umon bi sufu Allah. ⁹ Baraka le del al bi asna salam, bi nadi umon iyal ta Allah. ¹⁰ Baraka le del al taabu ashan hagiga, molokut ta samah de tomon, ¹¹ Baraka le inta kan nas bi sitimu inta wa bi taabu inta, wa bi kelimu ai hajat batal al ma hagiga did inta ashan ana. ¹² kede inta kun moksut, makafa taki kebir fi fii samah. Gubal intum, taabu Anbiya al kan ish zamaan be nefsu teriga. ¹³ Intum mile ta Alam. Lakin mile kan biga ma indu ta-am, kef bi reja ashan bikun mile tani? huwo ma kwes tani le ai haja ile bes bi kubu bara wa nas bi douru fi ras tou. ¹⁴ Intum nur ta dunia. Ma bi dusu Medina al abinu fi ras jebel. ¹⁵ Nas mabi walau lamba wa kutu tehet gufa, lakin fi ras terbeza, wa bi wala le nas kulu fi juwa bet. ¹⁶ Keli nur taki wala gidam nas ashan umon bi aiynu amail taki al kwes wa bi sabihu Abu taki al fi samah. ¹⁷ Matakun fekir be inu ana ja ashan kasuru ganun wele kalam ta anbiya. Ana ma ja ashan bi kasuru umon, lakin ashan bi kamilu. ¹⁸ Hagiga ana bi kelimu le intum be inu lahadi samah wa al ard bi futu, mafi kilma wele unuwan be ai teriga bi futu bara min ganun, lahadi hajat kulu bi hasil. ¹⁹ Ashan kida kulu zol al bi kasuru wahid min wasayat wa deris nas ashan bi amul nefsu kalam ma bikun mohim kalis fi molokut ta samah. Lakin le kulu zol al bi hafisu kalam del wa derisu le umon bi kun nas kubar fi molokut ta samah. ²⁰ Lakin ana bi kelim le inta be-inu ile kan sokol hagiga taki bi futu hagaig tak kataba wa farisiin. inta be ai teriga ma bi dakalu fi molokut ta samah. ²¹ Intum kan asma be inu kelimu le umon fi zaman gedim , 'mata katulu,' wa,' kulu zol al bi katulu bikun fi katar zaman gadiya.' ²² Lakin ana bi kelimu le intum be-inu kulu wahid al bi bikun zalan ma aku tou bikun fi katar zaman gadiya.' wa ai zol al bi kelim le aku tou, ' inta ma nafi!' bikun fi katar gidam mejles,' wa ai zol kelim, inta belid' bi kun fi katar be nar ta Johanam. ²³ Kan inta bi wodi hadaya taki fi masba wa inta zekiru be-inu aku taki indu muskila ma inta, ²⁴ sibu hadaya taki fi gidam masba, wa ruwa. Awelan amulu musalaha ma aku taki, wa taal gedimu hadaya taki. ²⁵ Tafik be zol al tahamu inta be sura ze ma intum bi ruwa le mahkama, wele zol al tahamu inta bi selimu inta le gadi, wa gadi bi selimu inta le dabit, wa bi kutu inta fi sijin. ²⁶ Hagiga Ana bi kelim le inta, inta ma bi tala min hinak lahadi inta bi dafa akir gurus al inta kan shilu. ²⁷ Inta asma kan kelimu, 'mata amulu zina.' ²⁸ Lakin ana bi kelim le inta be-inu ai zol al bi aiynu wara mara be uyun ta zina huwo kalas amulu zina ma hiya fi geliba tou. ²⁹ Kan ena taki ta yemin sibu inta waga, talau bara wa jadau beit min inta. huwo bikun kwes le inta kan wahid min juzu ta jisim taki mat bidal jisim taki kulu bi jadau fi nar. ³⁰ kan ida taki ta yemin sibu inta waga, gatau bara wa jadau beit min inta. Huwo bikun kwes le inta kan wahid min juzu ta gisim taki mat bidal jisim taki kulu bi jadau fi nar ³¹ Kaman kan kelimu, 'Ai zol al turudu mara tou, keli huwo wodi le hiya waraga talak. ³² Lakin ana bi kelimu le inta be-inu ai zol al talagu mara tou, ile be sabab ta zina, bi keli hiya ashan bikun ta Zina. Ai zol al zouju hiya baad kan talagu amulu zina. ³³ Tanimara, intum asma be-inu kelimu le nas ta zaman, 'mata alifu be galad, lakin shilu alifa taki le Rabuna.' ³⁴ Lakin ana bi kelimu le inta, mata alifu kulu kulu, be samah, ashan huwo kursi ta Allah; ³⁵ wele be ardi, leanu huwo mahal ta kutu kura tou; wele be Urselim, lianu huwo medina ta Melik al Azim. ³⁶ Wele inta bi alifu be ras taki, leanu inta ma bi agder amulu shar wahid abiyat wele ashuet. ³⁷ Lakin kede kalam taki kun 'Nam, nam,' wele 'La, la.' ai haja aktar min de huwo min ashrar. ³⁸ Intum asma kan kelimu, 'ena be ena, wa shunun be shunun.' ³⁹ Lakin ana bi kelimu le inta, mata shakil ma zol al sherir, Lakin ai zol al dugu inta be kof, aglibu le huwo tija tani de kaman ⁴⁰ Kan ai zol deir ruwa ma inta le mahkama wa shalu bedela taki, keli zol dak kaman shilu aborowol taki. ⁴¹ Kan zol kelim le inta ruwa wahid mail, ruwa itnin mail ma huwo. ⁴² Wodi le zol al asalu inta, mata aba le zol al deir deyinu haja min inta. ⁴³ Intum asma kan kelimu, 'lazim keli inta hibu jiran taki wa akra adu taki.' ⁴⁴ Lakin ana bi kelimu le intum hibu adu takum wa seli le del al bi taabu intum, ⁴⁵ ashan intum bikun awulad ta Abu takum al fi samah. Huwo bi sibu shamis tou ashan wala le zol sherir wa zol al kwes, wa bi rasulu matar le del al adilin wa al ma adilin. ⁴⁶ Kan intum bi hibu del al bi hibu itakum, ajur yatu al inta bi ligo? Nas ta daraib ma bi amul nefsu hajat?. ⁴⁷ Iza inta bi selim akwana taki bes, Inta bi amulu sunu aktar min nas tanin? nas al ma Yahudiin ma bi amulu nefsu kalam? ⁴⁸ Ashan kida inta lazim keli kun tahir, ze ma Abu takum fi samah Tahir