¹ Biga zaman Yesua kamilu kulu kelimat del, huwo kelimu le talamize tou, ² intum arufu inu baad intiin yom bikun id ta paska, wa iben al insaan bi selimu ashan bi selibu. ³ Biga ruwasa al khahana wa al shiyuk al shaab kan limu fi bet ta reis ta khahana al isim tou caiaphas. ⁴ Umon amulu maamara ashan bi gubudu Yesua fi siir wa katulu huwo. ⁵ Lakin umon kelimu keli ma kun fi id, ashan kede muzaharat ma gum fi nus ta nas ⁶ wa zaman Yesua kan fi Bethany fi bet ta Samaan al indu juddam , ⁷ wa ze ma huwo kan bi geni wa bi akudu raha, jambu tarbiza, fi mara ja le huwo ma jak ta dehan al gali shedid, wa heya kubu dehan de fi ras ta Yesua, ⁸ Lakin zaman talamiz aiynu kalam de umon ta zalaniin wa umon kelimu, de kasara ta shunu zede? ⁹ De kan bi beyu ma gurush al ketir wa bi wodi le masakin ¹⁰ Lakin Yesua kan arufu kalam de, wa huwo kelimu le umon, malu intum bi taabu mara de? hiya amulu haja al jemil le ana. ¹¹ Nas al masakiin bi geni ma intum kulu wokit, lakin ana ma bi geni ma intum kulu wokit ¹² Leanu hiya kubu riha fi jesim tai, hiya amulu de ashan dufunu tai. ¹³ al hagiga ana gi kelimu le intum, kulu mahal al gi bashiru injil fi alam, haja al mara de amulu bi wonusu le zikira ta hiya. ¹⁴ Biga wahid min al itnashar al isim tou Yahuza Iscarioti, ruwa le reis ta al khahan ¹⁵ wa kelimu, ''intum bi wodi le ana shunu ashan ana bi selimu huwo le intum?'' umon jahizu teletiin gurush min feda le huwo. biga ¹⁶ min zaman dak huwo bi fetesu teriga ashan kef huwo bi selimu Yesua le umon. ¹⁷ Wa fi awel ayam ta id al fetir talamiz ja le Yesua wa kelimu. inta deiru keli nina jahizu le inta ashan bi akulu id ta paska wen?'' ¹⁸ huwo kelimu, ruwa takum fi medina le zol tani wa kelimu takum le huwo, mualim kelimu, zaman tai gerib, ana bi akulu id paska fi bet taki ma talamiz tai ''''' ¹⁹ al talamiz amulu ze ma Yesua kelimu le umon, wa humon jahizu akil ta paska. ²⁰ Zaman wata biga misah, huwo geni tehet ashan bi akulu ma talamiz al itnashar. ²¹ Ze ma umon bi akulu, huwo gal hagiga ana bi kelimu le intum inu wahid min intum bi beyu ana, ²² umon kan mustagarabiin shedid, wa kulu wahid bada bi asalu huwo, hal de bikun ana ya Rab?'' ²³ Huwo juwabu, zol al bi beyu ana de, zol al bi akulu ma ana fi sahan. ²⁴ Ibiin al insaan bi ruwa, ze ma moktub an huwo. lakin taab le zol al beyu ibini al insaan! kan bi kun kwes le zol de iza kan ma weledu huwo. ²⁵ Yahuza al bi ja beyu huwo de kelimu, hal de bi kun ana ya Rabbi? Yesua kelimu le huwo, inta kelimu bi nefsa taki. ²⁶ Wa ze ma umon bi akulu, Yesua shilu esh wa baraku, kasuru, huwo wodi le talamiz wa gal, shilu takum, akulu takum, de jesim tai. ²⁷ Wa huwo shilu kubaya, wa reja shukuran, wa wodi le umon, wa huwo gal, asurub takum, intum kulu, ²⁸ leanu de yau dom tai al ta tifagiya al jedid al kubu ashan nas ketir al huwo le afii ta katiya. ²⁹ lakin ana bi gul le intum, ana ma bi asrubu tani mara min asiir ta karma de, lahadi yom dak ana bi asrubu al jedid ma intum fi molokut ta abu tai. ³⁰ Zaman umon guna , umon ruwa fi jebel Zeitun. ³¹ Biga Yesua kelimu le umon, "Fi bilel de intum kulu bi jere min Ana, huwo moktub, Ana bi dugu al rai wa mojmu ta korufan de bi shetetu. ³² Lakin baad ma Ana kan gum, Ana bi ruwa gidam min intum fi Jelil. ³³ Lakin Butrus kelimu le huwo, hata kan nas kulu jere min Inta, ana kulu kulu ma bi jere. ³⁴ Yesua kelim le huwo, hagiga Ana bi kelim le inta. Bilel de gubal dik ma kore inta bi anguru Ana talata marat. ³⁵ Butrus kelim le huwo, hata kan ana mutu ma inta, ana ma bi anguru Inta. Wa kulu talamiz kelimu nefsa haja. ³⁶ Baad dak Yesua ruwa ma umon fi mahal al isim tou Gethsemane wa huwo kelimu le talamiz tou, geni takum hini Ana lisa bi ruwa seli hinak. ³⁷ Huwo shilu Buturus wa itnin iyal ta Zebedi ma Huwo, yala biga huwo bada tala wa bi fekiru shedid. ³⁸ Biga huwo bada kelimu le umon Roho tai haznan shedid, le dereja ta mutu. Geni takum hini wa sahir takum ma Ana. ³⁹ Huwo ruwa shuweya gidam, wa huwo dengiri usa tou tehet, wa seli huwo kelimu, Ya Abui, iza mumkin shilu kas de min ana, lakin ma hasab irada tai. lakin hasab irada taki ⁴⁰ Huwo ja le talamiz wa huwo ligo umon bi num wa huwo kelimu le Buturus, lee intum ma bi agder ashan bi sahir ma Ana wahid saa? ⁴¹ Sahir takum wa seli takum ashan intum ma bi waga fi tejiriba fi hagiga Roho deiru, lakin jisim deiif. ⁴² Huwo ruwa tani mara ashan bi seli, Huwo kelimu, "Ya Abui kan Inta ma bi agder ashan bi shilu kas de min Ana ile kan ana ashrubu, kede irada taki timu. ⁴³ Huwo ja tani mara wa ligo umon bi num, wa umon kan Nasanin. ⁴⁴ Huwo sibu umon tani mara, de biga nimira talata al Huwo ruwa ashan bi seli, Huwo kelimu nefsa kelimat. ⁴⁵ Baad dak Yesua ja le talamiz wa kelim le umon, Sei intum lisa bi num wa bi akudu raha? Aiynu takum, zaman kalas ja gerib wa ibin insan bi selimu fi idan ta nas al ta katiya. ⁴⁶ Gum takum, kede nina ruwa, aiynu takum, zol al bi ruwa selimu Ana de biga gerib." ⁴⁷ Zaman huwo lisa bi wonusu, Yahuza, al wahid min talamiz al itnashar, Ja. Nas ketir ja ma huwo min mahal ta reis ta al khahana wa sheyuk ta shab. Umon ja bi seyuf wa asayat. ⁴⁸ Biga zol al bi ruwa selimu Yesua de wori le umon alama, gal, " Zol al ana bi amulu le huwo gubla de yau huwo. Gubudu huwo. ⁴⁹ Huwo ja be sura le Yesua wa kelimu, " Salamat, Rabbi!" wa huwo amulu gubla le Yesua. ⁵⁰ Yesua kelimu le huwo, " Ya Sabi, amulu haja al inta ja ashan bi amulu." Biga umon ja, wa kutu iden tomon le Yesua, wa gubudu Huwo. ⁵¹ Biga, wahid min nas al kan ma Yesua medu iden tou, wa tala sef ta tou wa dugu kadam ta reis ta al khahana, wa gata adana tou. ⁵² Biga Yesua kelimu le huwo, "Kutu sef taki de wara fi mahal tou, le nas kulu al bi shilu sef umon bi mutu bi sef. ⁵³ Hal intum bi fekir inu ana ma bi agdeir nadi Abu tai wa huwo bi rasulu le ana aktar min itnashar jesh min malaikat? ⁵⁴ Lakin biga kef hajat al muktub de bi kamilu, inu lazim de bi hasil?" ⁵⁵ Fi zaman dak Yesua kelimu le nas, " Hal intum ja ma seyuf wa asayat ashan bi gubudu ana ze harami? Kulu yom ana gi geni wa gi derisu fi Haikal, wa intum ma gubudu ana. ⁵⁶ Lakin de kulu gi hasil ashan bi kelimu kutub ta al anbiya." Wa fi zaman dak talamiz kulu sebu Huwo wa umon jeri. ⁵⁷ Nas al gubudu Yesua de umon jibu Yesua le Caiaphas reis al khahana, Fi mahal al kataa wa sheyuk limu fogo ma baad. ⁵⁸ Lakin Buturus bi ja fi wara tou min beyit lahadi fi beit ta reis ta al khahana. huwo dakalu juwa wa geni tehet ma huras ashan bi aiynu nehaya ta haja al bi hasil. ⁵⁹ Biga ruwasa al khahana wa al mejelis kulu kan bi fetisu shuhud al ta kezib did Yesua ashan umon bi katulu huwo. ⁶⁰ Be rakam Shuhudiin ta kezib ja gidam ketir, ila umon ma ligo ayi galat le Yesua. Lakin fi akir fi itniin shuhudiin tala gidam. ⁶¹ Wa umon kelimu, " Zol de kelimu gal, 'Ana bi demiru Haikal ta Allah, wa Ana bi abinu fi talata ayam.'" ⁶² Reis al Khahana gum fok wa kelimu le huwo, hal inta ma indu juwab? De shunu yau umon bi shahidu did inta? ⁶³ Lakin Yesua kan askut. Reis al Khahana Kelimu le huwo, ana bi alifu le inta bi isim ta Allah al hai, wori le nina, hal inta al Mesih ibin Allah". ⁶⁴ Yesua juwabu le huwo, inta kelimu be nefsa taki, lakin ana bi kelimu le intum, min hasa intum bi aiynu ibin al insan bi geni fi ida yemin ta guwa, wa bi ja fi sehaf min samah. ⁶⁵ Biga reis al khahana seretu gumas tou wa kelimu," Kalam al huwo kelimu de tejdif! Wa nina lesa deiru shuhudiin ashan shunu? Aiynu takum hasa intum asuma tejdif." ⁶⁶ Itakum gi fekeru shunu? Umon juwabu wa kelimu," huwo bi istahig mutu." ⁶⁷ Baad dak umon tufu buzak fi wusa ta tou wa dugu huwo, wa darabu huwo be asayat al kan fi iden tomon, ⁶⁸ wa umon kelimu," Naba le nina, inu inta al mesih, de munu yau darabu inta?" ⁶⁹ Kan Butrus bi geni bara fi bet ta reis al khahana, wa kan fi beniya al khadam hinak ja le huwo wa kelimu, "inta kama kan ma Yesua ta Gelilee." ⁷⁰ Lakin huwo kan anguru fi gidam tomon kulu, huwo kelimu, ana ma arufu kalam al inta bi kelimu de"." ⁷¹ Zaman huwo ruwa fi buwba, beniya al khadam tani aiynu huwo wa kelimu, le nas al kan hinak," zol de kaman kan ma Yesua ta Nazareth." ⁷² Huwo tani mara anguru bi halifa., " Ana ma bi arufu zol de!" ⁷³ Yala baad suwiya keda, nas al kan gi wogifu hinak ja wa kelimu le Butrus, "be kulu takid inta kaman wahid min umon, ashan gi beinu min teriga ta wonusa taki." ⁷⁴ Biga huwo bada gi laanu wa gi halifu ,"ana ma bi arufu zol de", wa be sura keda diik kore. ⁷⁵ Butrus zekiru kelimat al kan Yesua kelimu. " Gubal Diik ma kore inta bi anguru ana talata marat." Biga huwo tala bara wa kore shedid.