¹ Kaman Molokut ta samawat be kun ze ashara nusuwan al azra ali umon silu lamba be tomon wa ruwa ashan be gabilu aris. ² Kamsa min umon belidin wa kamsa negitin . ³ Al belidin de silu lamba be tumon umon ma silu zet ma umon, ⁴ lakin al negitin de silu bakat ta zet ma lamba tomon. ⁵ Fi zaman al aris kan akir umon kulu tala nasanin wa umon num. ⁶ Lakin fi nus belel umon asuma sot ta korekore, 'Aiynu, yau aris ja! Umon tala bara ashan be gabilu huwo. ⁷ Kaman nusuwan al azra de umon kulu gum fok wa sala lamba be tomon. ⁸ Al belidin kelim le al negitin wodi le anina suyi min zet le anu lambat ta nina bi ruwa batulu. ⁹ alnegitin de juwabu wa kelim bukun ma bi timu anina wa itakum ruwa takum le del al gi-biyu wa biyu takun le itakum ¹⁰ Zaman umon bi ruwa ashan biyu, aris wasulu, wa del al jahisin dakalu ma huwo fi iris wa bada gofulu bab. ¹¹ Baad nusuwan al azra de ja umon kelim, Ya Seid, ya seid, fata le nina. ¹² Lakin huwo juwabu wa kelim, Hagiga Ana bi kelim intum, ana ma bi arufu intum.' ¹³ Kede ena takum geni fade ashan intum ma bi arfu zaman wele saa. ¹⁴ Fa huwo bikun ze zol al deir safir le beled tani. Huwo nadi kadamin tou wa wodi le umon amuwal tou. ¹⁵ Le wahid min umon huwo wodi kamsa kis ta dahab, le tani de huwo wadi itnin, wa le akir de huwo wodi wahid kis ta dahab, kulu wahid akudu hisab tou hasab gudura tou, wa zol de safir. ¹⁶ Wahid al akudu kamsa kis de huwo ruwa amulu be tijara wa huwo ligo faida ta kamsa kis tani. ¹⁷ Kaman wahid al akudu itnin kis de huwo ligo faida ta itnin tani. ¹⁸ Lakin kadam al akudu wahid kis de huwo ruwa, hafura hufura fi wata, wa dusu gurus ta seid to. ¹⁹ Biga baad zaman towil Seid ta kadamin de huwo rija wa bada hasibu umon. ²⁰ Kadam al akudu kamsa kis de ja wa jibu kamsa kis tani. Huwo kelim, 'Seid, inta wodi le ana kamsa kis. Sof, ana amulu kamsa kis ziada' ²¹ "Seid tou kelim le huwo,' Neima le inta ya kadam al kwes wa amin! Inta kan amin fi hajat al besit. Ana bi kutu inta fi hajat al ketir. Dakalu fi farah ta Seid.' ²² Kadam al akudu itnin kis de ja wa kelim", 'Seid inta wodi le ana itnin kis aiynu ana amulu itnin tani ziada.' ²³ Seid tou kelim le huwo, Neima le inta ya kadam al kwes wa amin! Inta kan amin fi hajat besit ana bi kutu inta fi hajat al ketir. Dakalu fi farah ta Seid taki.' ²⁴ Kaman kadam al akudu wahid kis de ja wa kelim, ''Seid, ana aruf gali inta zal al batal. Inta bi silu hajat al inta ma zara, inta bi limu min al inta ma taban fogo. ²⁵ Ana kafu, yau ruwa dusu kis taki de fi tehet wata. Aiynu inta indu hini al kan fi le inta de. ²⁶ Lakin Seid tou juwabu wa kelim le huwo, Inta kadam al batal wa kasilan, inta arufu gali ana bi silu min al ana ma zara wa ana bi limu min al ana ma taban fogo. ²⁷ Inta kan bi wodi gurus tai de fi benki, wa kan ana rija ana bi silu gurus tai de ma faida ziada. ²⁸ Ashan kida shilu takum min huwo wozin de wa wodi le kadam al endu ashara wazinat de. ²⁹ Le anu kulu zol al endu, bi wodi le huwo ketir - kaman bi zidu. Lakin le ai zol al huwo ma endu ai haja hata al fi le huwo de bi shilu min huwo. ³⁰ Kadam al batal de jada takum huwo fi duluma bara, hinak bi kun fi kore wa adi sunun. ³¹ Zaman ibin al insan bi ja fi mejed tou wa kulu malaikat bi ja ma huwo, biga huwo bi geni fi kursi ta mejid tou. ³² Kulu nas bi ja fi gidam tou, wa huwo bi ferigu nas min bad tomon ze rai bi ferigu korufan min ganamayat. ³³ huwo bi kutu kurufan fi ida ta yemin to lakin ganamayat fi shamal to. ³⁴ Biga melik de bi kelim le del al fi ida ta yemin to de, taal takum al bariku min abu tai. worisu molokut al jahizu le intum min bidaya tasis ta duniya. ³⁵ Le anu ana kan jiyan intum wodi le ana akil; ana atsan intum wodi le ana moyo; ana kan garib intum shilu ana fi juwa. ³⁶ ana kan ariyan wa intum libusu ana; ana kan ayan wa intum zuru ana; ana kan fi sijin wa intum ja le ana; ³⁷ Biga nas al adilin de bi juwabu wa bi kelim, ' Rabuna , miten nina aiynu inta jiyan wa nina wodi le inta akil? au atsan au nina wodi le inta moyo? ³⁸ miten nina aiynu inta garib wa nina shilu inta juwa? au aryan wa nina libusu inta? ³⁹ miten nina aiynu inta ayan au fi sijin wa nina ja le inta?' ⁴⁰ Biga Melik de bi juwabu wa bi kelim le umon, hagiga ana bi kelim le intum, ze ma intum amulu le agala wahid akwana al sukerin de, intum amulu de le ana.' ⁴¹ Kaman huwo bi kelim le del al fi shamal tou, wasa takum min ana intum muluon, le nar al abadia al jahisu le sitan wa malaikat tou. ⁴² leanu ana kan jiyan, lakin intum ma wodi le ana akil; ana kan atsan, lakin intum ma wodi le ana moyo ; ⁴³ ana kan garib, lakin intum ma shilu ana juwa; aryan, lakin intum ma libisu ana; ayan wa fi sijin, lakin intum ma aiynu ana.' ⁴⁴ Kaman umon bi juwabu wa bi kelim, 'Rabuna, miten nina aiynu ita jiyan, au atsan, au garib, au aryan, au ayan au fi sijin, wa ma kadimu inta? ⁴⁵ Kaman huwo bi juwabu umon wa bi kelim, hagiga ana bi kelim le intum, kan intum ma amulu le agala min wahid de, intum ma amulu le ana.' ⁴⁶ del bi ruwa fi azab al abadia, lakin del al adilin de le haya al abadia."