¹ Hasa zaman saba ja, Reis ta khahana wa kulu shiyuk ta nas umon limu wa bi katitu ashan bi katulu Yesua. ² Umon gubudu huwo wa shilu huwo le Bilatus al wali. ³ Wa zaman Yahuza al Iskarioti, al selimu huwo aiynu inu Yesua kalas hukumu, huwo tub wa rija teletin gita ta fidda le reis ta khahana wa shiyuk, ⁴ wa wonusu, ''Ana amulu katiya be selimu dom al beri.'' Lakin umon kelim, ''De mana tou shunu le nina? Aiynu be nefsa taki.'' ⁵ Yala huwo jadu teletin fidda de fi kenisa, wa tala bara, wa ruwa kanagu nefsa tou. ⁶ Reis ta kahana shilu teletin gita ta fidda de wa wunuso, ''Huwo ma ganuni ashan bi kutu gurush de fi sunduk ta malia leanu de tamana ta dom.'' ⁷ Umon nakishu kalam de yala umon biyu wata al bi dufunu fugu nas al garibin. ⁸ Le sabab de kutu isim ta mahal de ''Wata ta dom'' le yom ta alela. ⁹ Yala kalam al kan nabau be nebi Armia kan timu, al bi gul, ''Umon shilu teletin gita ta fidda de tamana al kutu le huwo bewasat eyal ta Israel, ¹⁰ wa umon wodi le wata ta al fakari, ze ma Rabuna wori le ana. ¹¹ Hasa Yesua wogif gidam ta wali, wa wali asalu huwo, ''Hal inta Melik ta Yahud? Yesua juwabu huwo, Inta kelim kida.'' ¹² Lakin zaman ishteki huwo ma reis ta khahana wa shiyuk, huwo ma juwabu ai haja. ¹³ Baad dak Bilatus kelim le huwo, ''Inta ma bi asuma shokuat al did inta kulu de?'' ¹⁴ Lakin huwo ma juwabu hata be kilima wahid, ashan wali kan mustagarab kalis. ¹⁵ Hasa fi kulu id wali indu nizam ta fiku zol wahid min sijin zol al shab yau bi iktaru. ¹⁶ Fi zaman dak umon indu mujirim tani katil isim tou Barabas. ¹⁷ Yala zaman umon limu sawa, Bilatus kelim le intum ''Inti der kede Ana fiku le itakum munu? Barabas wele Yesua al isim tou al Mesih? ¹⁸ Huwo arufu umon selimu Yesua ashan umon zalanin. ¹⁹ Ligo huwo bi geni fi kuris ta hukum, mara tou rasulu le huwo kabara wa kelim, ''Mata amulu ai haja le zol al beri de. Leanu ana taban be hilim an huwo.' ²⁰ v 20 Hasa reis ta khahana wa shiyuk agnau nas al limu ashan bi asalu kede fiku Barsabas, wa kede katulu Yesua. ²¹ Wali asalu umon Yatu min itenin delin kede ana fiku le itakum? Umon kelim, ''Barsabas'' ²² Bilatus wonusu le umon, ''Ana bi amulu shunu le Yesua al isim tou al Mesih?'' Umon kulu juwabu, Selibu huwo.'' ²³ Huwo kelim, ''Malu, de yatu jerima al huwo amulu?'' Lakin umon zidu sot tomon, ''Selibu Huwo.'' ²⁴ Zaman Bilatus aiynu huwo ma bi agider amulu ayi haja, lakin muzahara der bada, huwo shilu moyo, wa kasulu eden tou gidam ta nas kulu, wa wonusu, ''Ana beri min dom ta zol de. Kede itakum aiynu be nefsa takum.'' ²⁵ Nas kulu wonusu, ''Kede dom tou rija le nina wa eyal ta nina.'' ²⁶ Yala huwo fiku le umon Barabas, lakin Huwo jeledu Yesua wa seilmu huwo kede ruwa selibu. ²⁷ Baad kida jesh ta wali shilu Yesua le raasa ta hokuma wa limu kulu jesh al fi hinak. ²⁸ Umon agila gumas tou wa dugu huwo wa libisu le huwo gumas gurmuzi. ²⁹ Umon amulu taj min shok wa kutu fi ras tou, wa wodi le huwo asaya fi eden tou al yemin. Umon dengir gidam tou alisu huwo, kelim, ''Salam, ya Melik ta Yahud!'' ³⁰ Umon tufu buzak le huwo, wa shilu asaya wa dugu huwo fi ras tani wa tani. ³¹ Baad ma umon alisu huwo, umon shilu gumas min huwo wa libisu le huwo gumas tou, wa shilu le selib. ³⁴ Ze ma umon bi tala bara, umon ligo zol min Kyrwan isim tou Samaan, umon asuru ashan bi ruwa ma umon ashan huwo bi arufa selib ta Yesua. ³³ Umon ja fi makan isim tou Gologota, al mana tou ''Mahal ta Jumjuma.'' ³² Umon wodi le huwo Kumur mulakbat be marara ashan bi ashurubu lakin zaman huwo jeribu, huwo ma bi agider ashurubu. ³⁵ Wokit umon selibu huwo, umon jada gura wa gesimu gumas tou, ³⁶ wa umon geni harisu huwo. ³⁷ Umon kutu fi ras tou luha katibu,''De Yesua, melik ta Yahud.'' ³⁸ Itnin haramia kan selibu ma huwo, wahid fii yemin tou wa tani fii shamal ta tou. ³⁹ Delin al bi mururu sitimu huwo, bi hizu ras ⁴⁰ wa bi wonusu, ''Inta al kan bi ruwa kasuru haikal wa bi abinu fi talat yom, kalisu nefsa taki! kan inta jena ta Allah, nezil tehet min selib!'' ⁴¹ Be nefsu teriga reis ta khahana sawa ma kataba ma shiyuk kan bi alisu huwo, wa bi gul, ⁴² ''Huwo kalisu nas tanin, lakin ma bi agider kalisu nefsa tou. Huwo yau Melik ta Israel. Kede huwo nezil min selib, yala nina bi amin fogo huwo. ⁴³ Huwo kutu shigha tou fi Allah, kede Allah kalisu Huwo hasa, kan Allah bi fekir ashan bi hariru huwo. Lianu huwo zatu kelim, 'Ana Jena ta Allah.''' ⁴⁴ Be nefsa teriga haramiyat al selibu ma huwo bardu bi sitimu huwo. ⁴⁵ Min saa sitta lahadi sa tissa dunia kulu kan duluna. ⁴⁶ Fi saa tissa, Yesua kore be sot fok wa kelim, ''Eli, Eli, Lima shabaktani?'' mana tou bi gul Ilahi, Ilahi, malu inta sibu ana? ⁴⁷ wokit delin al bi wogif asuma, umon kelim, ''Huwo bi nadi Elia.'' ⁴⁸ Tuwali wahid min umon jere wa shilu isfonge, maliyan be kumur, wa rubutu fi asaya, wa wodi le huwo ashan kede ashurubu. ⁴⁹ Bagi nas de wonusu, ''Sibu takum huwo barau. kan Elia bi ja kalisu huwo.'' ⁵⁰ Yesua kore tani bi sot fok wa selimu roho tou. ⁵¹ Tuwali sitara ta haikal sheretu le itnin min fok le tehet, wa wata hizzu, wa hujar kasuru kasuru. ⁵² turubat fata fata, wa goumu nas al kadisin al kan mutu. ⁵³ Umon tala bara min turubat baad ma Yesua gum, wa umon dakalu medina al mukadasa, wa zahir le nas ketirin. ⁵⁴ Kaid wa delin al kan bi haresu Yesua aiynu zalzal wa hajat al hasil , umon kafu kalis wa kelim, ''Hagiga de kan Jena ta Allah.'' ⁵⁵ Nusuwan ketir al dowru wara Yesua min Jelil wa bi kadimu huwo umon kan bi aiynu min beit. ⁵⁶ Fi nus tomon kan Mariam al Mejdelia, Mariam uma ta Yaghub ma Yusif, wa uma ta Eyal ta Zebedee. ⁵⁷ Zaman biga misah, fi zol ganiyan ja min Rama, isim tou Yusif, huwo kan telmiz ta Yesua. ⁵⁸ Huwo ruwa le Bilatus wa asalu jisim ta Yesua. Bilatus wori kede wodi le huwo. ⁵⁹ Yusif shilu jisim de, wa lifu be gumas kitan, ⁶⁰ wa kutu fi turuba tou al jedid al huwo afura fi hajer. Baad kida huwo derdek hajer fi bab ta turuba wa ruwa. ⁶¹ Mariam al Mejdelia wa Mariam al tani kan fi hinak, gaidin aksi ta turuba. ⁶² Fi yom nimra itnin, al huwo yom ta tejhiz, reis ta khahana wa Frisiin limu sawa ma Bilatus. ⁶³ Umon wonusu, ''Ya said, nina zekiru zaman zol al kadab de lisa hai, huwo kelimu, 'Baad talata yom huwo bi gum tani.' ⁶⁴ Ashan kida kede inta wodi awamir ashan bi harisu turuba de lahadi yom nimra talata, mumkin talamiz tou bi ja seregu huwo wa bi wori le nas, 'Huwo gum min mutu,' wa kidib al akir de bikun kaab min al awel.'' ⁶⁵ Bilatus kelim le umon, ''Shilu takum huras. Ruwa takum harisu kwes ze itakum bi ageder.'' ⁶⁶ Umon biga ruwa wa kutu huras fi turuba, wa gofulu hajer de gowi.