¹ Yesua wonusu be amsal tanimara le umon, gal, ² ''Molokut ta samah ze melik tani al jahizu ihtifal ta iris le weled tou. ³ Huwo rasulu khudam tou ashan bi nadi nas al kan nadi ashan bi ja le iris, lakin umon ma ja. ⁴ Melik de tanimara rasulu khudam tanin, gali, 'Wori le del al nadi, ''Aiynu, Ana jahizu asha tai. Dabau teiran wa abugar tai al sumanin, wa jahizu hajat kulu taalu le ihtifal ta iris.''' ⁵ Lakin umon ma kutu bal tomon wa umon ruwa, Wahid le mazra, wa tani le tijara tou. ⁶ Nas tanin del gobudu khudam ta Melik, umon amulu amalia batal le khudam, wa katulu umon. ⁷ Melik tala zalan, wa huwo rasulu jesh tou wa katulu del al kan mukatilin wa haragu medina tomon. ⁸ Baad dak huwo kelimu le khudam tou, 'Iris de jahis, lakin del al kan rahibu le iris ma kwesin. ⁹ Baad de rua takun fi tagatu ta sikat kubar wa nadi nas kutar ali intum ligo ashan ja hadir iris.' ¹⁰ Khudam del ruwa le sikat kubar wa umon limu nas kulu ali umon ligo, nas al batalin wa al kwesin. Mahal al kan ta iris de biga malyan be diyuf. ¹¹ Lakin fi zaman melik de ja le diyuf, huwo aiynu zol al ma libisu gumas ta iris. ¹² Melik de kelimu le huwo, ' Sabi, inta ja kef hina bidun gumas ta iris?' Lakin zol de kan ma agder wonusu. ¹³ Baad dak melik de kelimu le khudam. 'Robutu kura wa idan ta zol de, wa jadau huwo fi duluma, fi mahal al bikun fi kore wa adi sunun.' ¹⁴ Nas kutar bi nadi, lakin besitin yau bi azilu.'' ¹⁵ Baad dak Pharisiyin masha wa katitu kef umon bi sherigu Yesua fi kalam al huwo wonusu. ¹⁶ Baad dak umon rasulu le huwo talamiz tomon, ma nas al min hizib ta Herodos. Umon kelimu le Yesua, ''Mualim, nina arufu inta sah, wa inta bi derisu sika ta Allah be haigiga. Inta ma bi kutu bal taki le raya ta zol tani, wa inta ma bi ferigu nas. ¹⁷ Baad kida wori le nina, inta bi fekir kef? Hal ganuni bi asuma le nina ashan bi dafa deriba le Ceisar?'' ¹⁸ Lakin Yesua fahim fikra tomon al sherir wa gal, Lee intum bi jeribu ana, intum al mumesilin? ¹⁹ Wori le ana al giris.'' Baad dak umon jibu le huwo dinar. ²⁰ Yesua kelimu le umon, Sura wa kitaba de ta munu? ²¹ Umon juwabu le huwo ''ta keisar.'' Baad dak Yesua kelimu le umon, ''wodi le keisar hajat ta Keisar, wa wodi le Allah hajat ta Allah. ²² Fi zaman umon asuma kalam de, umon tala mustagrabin, Baad dak umon sibu huwo wa ruwa. ²³ Fi nefsu yom Saddukiyin tanin, al bi kelimu gali mafi giyama, ja le huwo. Umon asalu huwo, ²⁴ bi gul, ''Mualim, Musa gal, 'Iza kan zol mat, ma indu iyal, aku tou lazim bi zowuju mara be isim tou wa bi weledu iyal le aku.'huwo ²⁵ Kan fi saba akwan. Al awel zowuju wa baad dak mat. Ma sibu iyal, huwo sibu mara tou le aku tou. ²⁶ Bad dak aku nimra itnin amulu nefsu kalam, baad dak nimra talata, lahadi wosulu le aku nimra saba. ²⁷ Baad umon kulu matu, mara de kaman mat. ²⁸ Hasa fi giyama, mara de bikun ta munu min saba akwana de? Fa umon kan kulu zowuju mara de.'' ²⁹ Lakin Yesua juwabu wa kelimu le umon, ''Intum galtanin le a-anu intum ma arufu kitab al mukadas au guwa ta Allah. ³⁰ Fa fi giyama umon ma bi zowuju wele bi wodi zol tani le zuwaj. Ashan kida umon bikun ze malaikat fi samah. ³¹ Lakin le giyama ta meitin, intum ma agara kalam ali Allah wonusu, gal, ³² Ana Allah ta Ibrahim, Allah ta Isaka, wa Allah ta Yakobo'? Allah ma Allah ta meitin, lakin ta nas al hayin.'' ³³ Fi zaman nas al limu asuma kalam de, umon tala mustagrabin be dirasa tou. ³⁴ Lakin fi zaman Pharisiyin asuma be inu Yesua sakitu Saddukiyin, Umon limu fi mahal wahid. ³⁵ Wahid min umon, shatir fi ganun, asalu huwo sual, bi jeribu huwo- ³⁶ Mualim, wasaya yatu al akbar fi ganun?'' ³⁷ Yesua kelimu le huwo, '''Hibu Rabana Allah taki be kulu gelbak wa kulu nefsak, wa be kulu fikra taki.' ³⁸ De yau wasaya al wel wa kebir. ³⁹ Wa wasaya al tani huwo ze de- 'hibu jeran taki ze nefsak.' ⁴⁰ Itnin wasaya del yau asas ta kulu gawanin wa al anbiya katibu.'' ⁴¹ Fi zaman ali Pharisiyin lisa bi limu baad tomon, Yesua asalu umon sual. ⁴² Huwo gal ''Intum bi fekir sunu an al Mesih? Huwo weled ta munu?'' Umon kelimu le huwo, ''weled ta Daud.'' ⁴³ Yesua kelimu le umon, ''Baad de kef Daud bi nadi huwo fi Roho Rabana, Gali, ⁴⁴ Rabuna kelimu le Rabuna tai, geni fi yemin tai, lahadi Ana bi kutu adu taki fi tehet kura taki'''? ⁴⁵ Izakan Daud bi nadi Al Mesih 'Rabana,' Huwo bi kun weled ta Daud kef?'' ⁴⁶ Mafi zol al bi agder juwabu huwo, min yom dak le gidam mafi zol tani al deir asalu huwo ai sual tanimara..