¹ Zema Yesua ma talamiz tou gerib be Urselim wa ja le Bethphage, fi Jebel Zetun, baad dak Yesua rasulu itnin talamiz, ² kelimu le umon, ''Ruwau fi beled al tani de, wa intum tawali bi ligo himar robutu hinak, wa himar abu ragil ma himar al antaya. Fiku umon wa jibu umon le ana. ³ Izakan zol tani kelimu le intum ai kalam an himar itnin del, intum bi kelimu, ' Rabuna deir umon,' wa zol dak tawali bi rasulu umon ma-ak.'' ⁴ Hasa de ja fi zaman al wonusu kan be wasat anbiya ashan bi kamil nefsu. Huwo gal, ⁵ ''wori le biniya ta Zion, 'Aiynu, Melik taki jai le inta, huwo Nezilu nefsu wa rikib himar- fi ras himar suker al rajil.'' ⁶ Baad dak talamiz ruwa amulu nefsu kalam zema Yesua kelimu le umon. ⁷ Umon jibu himar al antaya wa suker al rajil de wa umon kutu gumasat tomon fi ras hamir del,wa Yesua geni fi ras gumasat del. ⁸ nas al limu tanin wazau gumasat tomon fi sika, tanin gata furu ta shejera wazau fi sika. ⁹ Baad dak jamahir al ruwa gidam Yesua wa del al ruwa wara huwo kan bi wonusu be shot fok, ''Hosana le ibin Daud! Baraka le de al bi ja fi isim ta Rabuna! hosana fi al aahli!'' ¹⁰ Fi zaman Yesua ja fi Urselim, kulu nas al fi medina moksutin wa bi gul, ''De munu?'' ¹¹ Nas al limu del juwabu, ''De huwo Yesua nebi al min nazerata fi jelil.'' ¹² Baad dak Yesua dakal fi haikal. Huwo turudu kulu nas al bi esteri wa bi biyu hajat fi haikal, wa galabu terbezat ta nas al bi geiru gurus wa kursiyat ta nas al kan bi biyu hamam. ¹³ Huwo kelimu le umon, Huwo moktub, ' Bet tai bi nadi bet ta salawat,' lakin intum amulu mahal ta haramiah.'' ¹⁴ Baad dak nas al amiyanin wa nas abukerenagt ja le huwo fi haikal, wa huwo aliju umon. ¹⁵ Lakin fi zaman ruasa ta kuhana ainu hajat al ajib al huwo amulu, wa fi zaman umon asuma iyal bi kelim be asuat fok fi haikal wa gal, Hosana le Ibin Daud,'' umon tala zalanin. ¹⁶ Umon kelimu le huwo, ''Nam! Lakin intum ma agara, 'Min kasumat bita iyal suhar wa iyal al bi rada intum jahizu tasabi'?'' ¹⁷ Baad dak Yesua sibu umon wa ruwa bara min medina le Bethany wa geni bilel kulu hinak. ¹⁹ Fi sabah zema huwo raja le medina, huwo biga jiyan. ¹⁸ Huwo aiynu shejera tin fi taraf sika, huwo ruwa le shejera de wa ma ligo ai haja ile ursal. Huwo kelim le shejera, Keli ma yekun ai samar min inta tanimara,'' wa shejera tin de abiz. ²⁰ Fi zaman talamiz aiynu shejera de, umon istagarab wa kelimu, ''Shejera tin de yabiz seri ze de kef?'' ²¹ Yesua juwabu wa kelim le umon, Ana bi kelim le intum hagiga, Iza kan indakum iman wa mafi shukuk, intum ma bi amulu haja al hasal le shejera tin de bes, lakin intum bi kelim hata kan le jebel de, 'Gum wa jadau nefsak fi bahar,' wa bi hasil. ²² Ai haja al intum bi asalu be salawat, be iman, intum bi ligo.'' ²³ Fi zaman Yesua ja fi haikal, ruasa ta khahana wa siyuk al kan mosulin min nas ja le huwo zema huwo kan bi derisu wa gal, ''Be yatu sulta al inta bi amulu hajat del, wa munu yau wodi le inta sulta de?'' ²⁴ Yesua juwabu wa kelimu le umon, ''Ana kaman bi asalu intum wahid suhal. Iza kan intum wori le ana, Ana bi wori le intum be yatu sulta Ana bi amulu hajat del. ²⁵ ta Yuhana ja min wen? Min samah wele min al ard?'' Umon nakisu be nufusum, gal, ''Iza kan nina kelimu 'Min samah,' huwo bi kelimu le nina, 'Le intum Lee intum ma amin?' ²⁶ Lakin iza kan nina kelimu, 'Min nas,' nina bi kafu nas al limu, le-anu kulu umon amin be-inu Yuhana nebi.'' ²⁷ Baad dak umon juwabu Yesua wa gal, ''Nina ma arufu.'' Huwo kelimu le umon, ''Ana kaman ma bi wori le intum be sulta yatu Ana bi amulu hajat del. ²⁸ Lakin intum bi fekir sunu? Zol tani indu itnin awulad. Huwo ruwa le weled al awel wa gal, Weledi, ruwa istakal alela fi mazra.' ²⁹ Weled de juwabu wa gal, ' Ana ma bi ruwa,' lakin huwo ja geiru muk tou wa huwo ruwa. ³⁰ ''Baad dak zol de ruwa le weled al tani de wa kelimu nefsu kalam. Huwo juwabu wa gal, 'Ana bi ruwa, ya seid,' lakin huwo ma ruwa ³¹ Yatu min iyal al itnin amulu irada ta abu tou?'' Umon gal, ''weled al awel.'' Yesua kelimu le umon, '' Ana bi kelimu le intum hagiga, nas ta limu daraib wa ta zina bi dakalu fi molokut ta Allah gidam intum. ³² Yuhana ja le intum fi sika al hagiga lakin intum ma sedeku. Lakin intum, hata kan intum aiynu de, intum ma tubu wa sedeku. ³³ Asuma le amsal tani. Fi kan zol, mosul fi watan, Huwo indu jinena inab, huwo abinu hoz haulu, huwo afuta hufra dakil karam al bi asuru inab ashan bi tala kamur. huwo abinu buruj, wa ajiru le muzariyin ta inab. Baad dak huwo ruwa fi doula tani. ³⁴ Wokit zaman ta hasat wosulu, huwo rasulu khudam tou le muzariyin ashan bi jibu samar tou. ³⁵ Lakin muzariyin del gobudu khudam tou, umon dugu wahid, katulu tani, wa darubu tani. ³⁶ Zol al mosul de tanimara rasulu khudam tanin, aktar min al awel, lakin muzariyin del amulu nefsu kalam le umon. ³⁷ Baad dak Zol al mosul de rasulu weled tou le umon, gal, Umon bi ehterimu weled tai.' ³⁸ Lakin fi zaman muzariyin del aiynu weled de, umon kelimu le nufusum, 'de zol al bi warisu hajat del. Tali takum, keli nina katulu huwo wa estelemu al miraz.' ³⁹ Baad dak umon shilu huwo, jadau huwo bara min jinena inab wa umon katulu huwo. ⁴⁰ Fi zaman mosul ta jinena inab de ja, huwo bi amulu sunu le muzariyin ta inab del?'' ⁴¹ Umon kelimu le huwo, ''Huwo bi demiru muzariyin del be teriga al kaab, wa bad dak huwo bi ajiru jinena inab de le muzariyin tanin, ya nas munu yau bi wodi khuta ta samar tou le huwo fi wokit ta hasad.'' ⁴² Yesua kelimu le umon, Intum ma agara min kitab al mukadas, 'Hajer al binayin rafadu kutu biga hajer al zawiya. De kan min Rabuna, wa biga zahar 'haja kwes fi uyun ta nina? ⁴³ Ashan kida Ana bi kelimu le intum, Molokut ta Allah bi shilu bara min intum wa bi wodi le doula al bi antij samar tou. ⁴⁴ Ai zol al waga fi ras hajer de bi kasuru heta heta. Lakin ai wahid al hajer waga fi ras tou bi kasuru zol de.'' ⁴⁵ Fi zaman ruasa ta khahana wa pharisiyn del asuma amsal tou, umon fahimu be-inu huwo bi wonusu an umon. ⁴⁶ Umon bi fetisu ashan gobudu huwo, umon kaifin min nas al limu, le anu nas del amin huwo nebi