¹ Molokut ta samah huwo ze zol mosul ta bet al ruwa saba bediri ashan bi ajiru nas ta sokol le jinena tou. ² Baad huwo tafik ma nas ta sokol de be wahid dinar yomiyan, huwo rasulu umon le jinena tou. ³ Huwo ruwa tanimara baad talata sahat wa aiynu nas tanin ta sokol wagifin sakit fi suk. ⁴ Huwo kelimu le umon, 'Intum kaman, amshi fi jinena, wa ana bi wodi le intum ai haja al kwes.' Baad de umon ruwa le sokol. ⁵ Huwo ruwa tanimara baad sita sahat wa tanimara baad tisa sahat, wa amulu nefsu kalam. ⁶ Huwo ruwa tanimara baad idasar sahat wa ligo tanin bi wogif sakit. Huwo kelimu le umon, Malu intum wagifin sakit nahar de kulu?' ⁷ ''Umon kelimu le huwo, le-anu mafi zol wodi le nina sokol.' Huwo kelimu le umon, 'Intum kaman ruwai fi zira.' ⁸ Zaman biga misa, zol al mosul ta jinena de kelimu le zol tou al idari, Nadi umal del wa dafa le umon gurus tomon, abda min al akir le awel,' ⁹ Zaman umal al ajiru baad idasar sahat de ja, kulu wahid min umon akudu wahid dinar. ¹⁰ Zaman umal al awel de ja, umon fekir gali umon bi akudu gurus ketir, lakin kulu wahid min umon bardu akudu wahid dinar ¹¹ Zaman umon akudu gurus tomon, umon gedimu sokwa tomon le zol al mosul ta zira. ¹² Umon gal Umal al akir del istakal bes wahid sah, lakin inta dafa le nina gurus sawa, nina al akudu tegila nahar kulu wa be shemis al sukun.' ¹³ Lakin zol al mosul de juwabu wa kelimu le wahid min umon, hal intum kan ma tafik mai be wahid dinar? ¹⁴ Shilu hajat takum wa ruwa takum. Ana azilu ashan wodi le umal al ana ajiru de sawa zema ana wodi le intum. ¹⁵ Hal Ana ma indi hak ashan ana bi amulu ma hajat al indi? Wele indakum ghira ashan ana kerim? ¹⁶ Ashan kida al akir bikun awel, wa al awel bikun akir.'' ¹⁷ Zema Yesua ruwa lahadi Urselim, huwo shilu talamiz al intnasar beid, wa fi sika huwo kelimu le umon, ¹⁸ ''Aiynu, nina bi ruwa lahadi Urselim, wa Ibin al Insan be estelimu le kebir ta khahana wa kataba ta sheria. Umon bi wonusu batal didu le mut ¹⁹ wa bi istelimu huwo le nas al geir Yahudiyiin bi ataku ma huwo, bi dugu huwo be shot, wa bi selibu huwo. Lakin fi yom a talit bi goumu min al mut.'' ²⁰ Baad dak uma ta awaulad ta Zebedayo ja le Yesua ma awaulad tou. Hiya dengir tehet gidam huwo wa asalu haja min huwo. ²¹ Yesua kelimu le hiya, inta deir sunu?'' Hiya kelimu le huwo, ''Wodi wosiya le awaulad tai del keli geni, wahid fi yemin taki wa wahid fi shamal taki, fi molokut tak.'' ²² Lakin Yesua juwabu wa gal, ''Inta ma bi arufu haja al inta bi asalu. Hal inta bi agder asurubu Kubaya al ana bi ja asurubu de?''Umon kelimu le huwo, ''Nina bi agder. ²³ Huwo kelimu le umon, ''Hagiga kubaya tai intum bi asurubu. Lakin ashan inta bi geni fi yemin tai wa shamal tai ma ana yau bi wodi, lakin huwo le del al Abu tai jahizu le umon.'' ²⁴ Fi zaman talamiz al ashara tanin del asuma kalam de, umon tala zalanin be akwana itnin de. ²⁵ Lakin Yesua nadi umon wa gal, Intum arufu be-inu hukam ta nas al geir Yahud bi hakimu umon be guwa, wa nas tomon al mohimin bi marisu sulta fi ras tomon. ²⁶ Lakin keli ma kun be teriga de fi nus takum. Afrud ai zol al tala kebir min nus takum lazim bikun kadam, ²⁷ wa ai zol al deir bi kun awel fi nus takun lazim bi kun kadam takum, ²⁸ Bes ze Ibin al Insan ma ja ashan bi kadimu le huwo, lakin ashan bi kun kadam, wa ashan bi wodi haya tou bidal nas kutar.'' ²⁹ Zema umon tala min Jericho, adad kebir ta nas al limu ruwa wara huwo. ³⁰ Fi kan itnin nas amiyanin bi geni fi taraf sika. Fi zaman umon asuma be-inu Yesua kan bi ruwa gerib ma umon, umon korek bi shot aali, ''Rabuna, Ibin Daud, arhamna.'' ³¹ nas al limu wobiku umon, kelimu le umon keli askut, lakin umon korek biga shedid, ''Rabuna, Ibin Daud arhamna.'' ³² Baad dak Yesua wagaf wa nadi umon wa gal, ''Intum deir ashan ana bi amulu le intum sunu?'' ³³ Umon kelimu le huwo, ''Rabuna, ashan uyun ta nina bi fata.'' ³⁴ Baad dak Yesua, indu hinia ,lemesu uyun tomon. Tawali umon biga bi shuf wa ruwa wara huwo.