¹ Huwo ja fi zaman al Yesua kalasu kalamat del, huwo tala min Jelil wa ja le iklim ta Judea wara nahar Ordon. ² Jamahir ruwa warau, wa huwo aliju umon hinak. ³ Pharisiyin ja le huwo, bi jeribu huwo, bi kelimu le huwo, '''Hal huwo ganuni le rajil ashan bi talagu mara tou be ai sabab?'' ⁴ Yesua juwabu wa gal, Hal intum ma agara be-inu huwo al kalagu umon min bidaya kalagu umon rajil wa mara? ⁵ Huwo al kalagu umon kaman gal, 'Be sabab de rajil bi sibu abu tou wa uma tou wa bi limu ma mara tou, wa al itnin bikun jisim wahid; ⁶ Umon ma bikun itnin lakin wahid jisim. Ashan kida haja al Allah limu mafi zol keli ferigu.'' ⁷ Umon kelimu le huwo, Lee baad kida Musa wodi wosia le nina ashan bi wodi waraga talag wa baad dak bi turudu hiya?'' Huwo kelimu le umon, ⁸ ''ashan gulub takum al gowi, Musa sedeku le intum ashan bi talagu nusuwan takum, lakin fi bidaya kan ma be teriga dak. ⁹ Ana kelimu le intum, ai zol al bi talagu mara tou, ile bes be kalam zina, wa zowuju mara tani, huwo amulu zina; wa rajil al zowuju mara al talagu huwo amulu zina.'' ¹⁰ Talamiz kelimu le Yesua, Iza kan de yau muskila ta zol dak ma mara tou, huwo ma kwes ashan inta bi zowuju.'' ¹¹ Lakin Yesua kelimu le umon, '' Maa ai zol bi rudu dirasa de, lakin ile del al bi sedeku le umon ashan bi rudu. ¹² fi nas al ma indu Kisia min fi batna ta umahat tomon, wa fi nas al talau kisia tomon be nas tanin, wa fi nas al fekir ashan ma bi zowuju bi sabab ta molokut ta samah. Ai zol al bi gabil dirasa de, keli huwo gabilu.'' ¹³ Baad dak iyal tanin jibu le huwo ashan huwo bi kutu idan tou le umon wa bi seli, lakin talamiz abusu umon. ¹⁴ Lakin Yesua gal, keli iyal suhar del, wa mata abusu umon ashan ja le ana, molokut ta samah huwo le iyal al suhar.'' ¹⁵ Huwo kutu idan tou fi ras iyal de, wa baad dak huwo tala min hinak. ¹⁶ Asuma, zol ja le Yesua wa kelimu, ''Mualim, Yatu hajat kwes al ana bi amulu ashan ana biligo haya al abadiya?'' ¹⁷ Yesua kelimu le huwo, Lee inta bi asalu ana an hajat al kwes? Wahid bes yau kwes, lakin iza kan inta deiru haya, hafisu wosaya.'' ¹⁸ Zol kelim le Yesua, ''Wosaya yatu?'' Yesua kelimu, '' mata katulu, mata amulu zina, mata seregu, mata kun sahid al kizib, ¹⁹ Ihterim abu taki wa uma taki, wa hibu jiran taki ze nefsak.'' ²⁰ Shab de kelimu le huwo, '' hajat del ana hafisu kulu. Sunu tani al ana deir?'' ²¹ Yesua kelimu le huwo, ''Iza kan inta deir ashan bikun sale, ruwa biyu hajat al inta indak, wa wodi le masakin, wa inta bi indu kazina fi samah; wa tal, wara ana.'' ²² Lakin zaman shab de asuma kalam al Yesua kelimu, Huwo ruwa hazin, le-anu huwo indu mumutalakat ketir. ²³ Yesua kelimu le talamiz tou, ''Ana bi kelimu le intum hagiga, huwo gowi le zol al ghaniyan ashan bi dakalu fi molokut ta samah. ²⁴ Ana bi kelimu le intum tanimara, huwo besit le jemel bi ruwa be wasat hufra ta ibira bidal zol al ghaniyan bi dakalu fi molokut ta Allah.'' ²⁵ Fi zaman Talamiz asuma kalam de, umon estagarab wa kelimu, ''Munu yau biga bi ankizu?'' ²⁶ Yesua ainu le umon wa kelimu, ''Ma nas kalam de ma besit, Lakin ma Allah huwo besit.'' ²⁷ Bada dak Butrus juwabu wa kelim le Yesua, ''Aiynu. nina sibu ai haja wa ja wara inta. Nina baad kida be indu sunu?'' ²⁸ Yesua kelimu le umon, Ana bi kelim le intum hagiga, Fi zaman al jedid Izakan ibin al insan geni fi kursi tou, Intum al kan douru wara ana bi geni kaman fi itnasar karasi, bi hakimu itnasar gebila ta Israel. ²⁹ Ai zol al sibu biyut, Akwanu, ikiwatu, abu, umu, iyal, au watan ashan ana bi akhudu miya marat wa kifaya wa bi ligo haya al abadiya. ³⁰ Lakin kutar al kan awel bikun akhir, wa al akhir bikun awel.