¹ Ojiŋak ifa Yesu Ata eno to oko Yerhe. ² Nia, owon ifa lobo tuŋani dia lalara fure nohonye Sekeyo. Ara ifa inya habu lo heduduhak ho musuru ojo hidofe asam. ³ Awak ifa inya hiwolo hijo ŋai lia ara Yesu ati obe ifa inya oremik wolo to hide he iluluŋ, nyo osuk ifa inya. ⁴ Nia enyior inya ahosiere ho hiyo ata arek ahide ho yani aŋaboli anyar egonyu inya, nyo awak ifa Yesu eno te hei to inya. ⁵ Ifa la awoŋ Yesu amai inya ebono ahide Ata inya hijo to honye, “Sekeyo, tolu kokwak afau anyar ahu naŋ hitole ta haŋ hoi. “ ⁶ Nia efiriŋu inya ŋallu afau Ata hiboŋ Yesu alanyar. ⁷ Ifa egonyu hiyo daŋ Ata isia hiŋuŋunuta hijo, “eno hallaŋ ileŋ hira ahatomononi ta haŋ ho tuŋani heyani.“ ⁸ Ata Sakayo diote Ata hijo, “Habu toriŋai, “Habu esio iso naŋ hiro inanaŋ to lociaŋak ojo emumun naŋ lobo tuŋani te inak hiro adumak iso naŋ inya hiinyahita aŋwan. “ ⁹ Ata Yesu hijo to honye, “Ena eba etilohini ta haŋ ina nyo ara ifa inya onyi Abramo. ¹⁰ Nyo otu onyi Tuŋani osiahari hikoi ne letilahari hiyo ilo olita. ¹¹ ‘‘Ifa etiru isia hiro huna odule inya hirorita ata elimu hitiriami nyo eliaha ifa inya ho Yerusalem, ata isia higigilo hijo eliaha iso lobie no Hollum hijo alieu kokwak. ¹² Ata inya hijo, Ohu ifa lobo tuŋani anobo doŋe na alama hijo ahu inya efotu to honye obie Ata ŋaciohini. ¹³ Ata inya hililoŋ hegiemak ilo honye tomon ata hisio arobia tomon ata hijo to hose "Itiinyaŋai man aciohini naya. ¹⁴ Ati eyyalai ifa hiyo ilo doŋe honye inya ata isia efahak ilak efahat ta halu honye hijo 'Obe iyohoi ewak tuŋani lia ahabu lohoi. ‘ ¹⁵ Nia ifa efotu inya obie teya ata awoŋ eliloŋu hegiamak ilo honye Ilafa esio inya arobia afanu to honye hijo ayenari hijo hera mahu arobia jai ino etiinyaŋu isia. ¹⁶ Ata hitieri awoŋ Ata hijo, ‘Habu etiinyaŋu naŋ arobiyaha tomon te Ilafa esio iye ta hanaŋ.‘ ¹⁷ Ata inya hijo to honye "Anyar bi no. 'Ira iye hegiamani lo olibo no' iya eniefita ifa iye hiro ilo oduhucio ena lanyar ehumak iso naŋ iye le etok loboŋito ino obore gala tomon.‘ ¹⁸ Ata hegiamani hitarihi awoŋ ata hijo, 'etok, etiinyaŋu naŋ arobiyaha miet te Ilafa esio iye ta hanaŋ. ¹⁹ Ata inya hijo to honye, 'Etoŋita iso iye botin ina gala miyet.‘ ²⁰ Ata lobo awoŋ ata hijo, ‘Leitok, ibe arobiya lafa hoi. Abubunak ifa naŋ ta manir Ata naŋ atunak inya ana anyar. ²¹ Nyo abaŋ ifa naŋ hiro nohoi nyo ara iye tuŋani lo lorute. Edumu iye hiro ino lobe ara inohoi ojo edieŋitta hiro huna libe eyek.‘ ²² Atati habu hijo to honye, 'To hiro to nohoi aŋot iso naya iye, iye hegiamani le ebwot. Eyen ifa iye hijo ara naya tuŋani la arru bi no, adumuta inak ino obe ara inanaŋ, ajo adieŋu ino abe naŋ ayek. ²³ No nyo ebe iye emak arobiyaha inanaŋ to otunari, hijo la awoŋ naya ata naya ida arrumu he inak ifoniti inohosie?' ²⁴ Atati etok hijo, to hosie, 'Itiwetai dia, itidumu arobiya lia ade tara honye, isiara to lia owon ha arobiaha tomon! ²⁵ Ojo isia to honye, ‘Habu, oyita inya ha arobiaha tomon.‘ ²⁶ Ajo naŋ tahatai , hijo owon lobo hasaŋ iluluŋ ofonihini iso to honye ariaii ojo to lia lobe hiro tara honye, eyari iso ade tara honye inya lo owon to honye. ²⁷ Ojo miorok ilia hanaŋ, ilo lobe lawak naŋ hata ra naŋ etok lohosie, iyani isia ini ata itai attohe isia to hosiere hanaŋ.''' ²⁸ Ifa attohu inya hiro hiro ino, ata inya eno tohosiere, oboto man Yerusalem. ²⁹ Ifa eliaha inya aŋati ho Besfaje ho Betani, to doŋe nafa Eliloŋo hiyo hijo Olifeto, ata inya efahak hejufutak arik, ³⁰ Ata hijo, “Ifeti adoŋe nya. Ejiŋak itai, efwo iso itai arumu nobo sigira ina holobe hiyo etirek saŋ to hide. Itihek Ata itai eyyani ta hanaŋ. ³¹ Lefi lobo itai, ‘No nyo eho itai inya?’ 'itijo, ‘Awak Habu inya.’” ³² Efie Ilafa lefahak hiyo Ata arrumu Sigira iya nafa elimahini isia. ³³ Oho ifa isia sigira ata monye ho Sigira arrumu isia ata hijo to hosie, “No nyo eho itai sigira?” ³⁴ Ata isia hijo, “Awak Habu inya.” ³⁵ Ata isia eyyani inya to Yesu, Ata ebirok boŋojin inohosie ata etuhunyak Yesu to hide. ³⁶ Ata isia daŋ afiata boŋojin inohosie to hekoi nafa ohuye Yesu. ³⁷ Ifa eliaha inya aŋati te illut no doŋe no Olifeto, Ata iluluŋ no hejufutak hitiara mune ojo hidofe etihabwo Hollum, eyyorro wuoŋ wuoŋ te igiem ne etok daŋ egonyu isia Ata hijo, ³⁸ “Hotowuana jaha ta Habu lia lo otu to fure ta na Habu Hollum! Himwara te ido ojo mune he lohwo hotowuana to Hollum!'' ³⁹ Ejo ilak ilo Farisei to hiji he iluluŋ to honye, “Hetiyanani, oriŋa hejufutak ilohoi,” ⁴⁰ Etiraŋ Yesu Ata hijo, “Elimak naŋ itai hijo loremik ida hulloŋ aduehini ata moru yio ade.” ⁴¹ Nafa awoŋ Yesu aŋati ho bore ha gala, ata inya yio to Yerusalem. ⁴² Hijo, “Iya ne eyen ida itai far ina hame, kuya, hiro ino oremik ta hatai himwara! ati Iyania eŋofohini isia to honyehite inahatai. ⁴³ Ati afanu iso holoŋitek ta hatai, na ofu miorok ilahatai oduhok iwudoho aŋati hatai, ati ata amirini ahotwai to oko kal arria. ⁴⁴ Ogoŋok iso isia itai ta fau ojo dure inahatai daŋ hatai. Obe iso ebusak moru to hide ho nobo, nyo obe ifa isia ogilu hijo awak Hollum hicem hijo etilohu itai.” ⁴⁵ Niya ajiŋak inya kelesia Ata hitiara hifuhuta hiyo Ilafa etiinyaŋa dia. ⁴⁶ Ata hijo to hosie, “Egiorohini, Hijo ara iso haji hanaŋ Haji Imojit, ‘ ati ehumak itai inya a haji no hahalak.” ⁴⁷ Niya etiyana ifa Yesu motie motie ta Haji Imojit netok letaha ilo fadirihien ojo hegiorok ojo hetidihitak ilo hiyo ata isia hiwak attohe inya, ⁴⁸ ati obe isia orumu nobo hhei no oremik etisiahari inya, nyo etira ifa hiyo bi daŋ to honye dede.