¹ Ata inya hiro to hitiriamita to hosie to hiram no mojo, hijo hotobiaŋa isia oŋuŋusia, ² Ata inya hijo, "Owuon ifa lobo haŋotoni to bore gala nobo lo obe eruk to Hollum ojo hidofe obe abaŋ hiyo. ³ Owuon ifa nobo ihidak no ŋorwo to bore gala inya, no odule lotton to honye, ‘Helwak naya tara tuŋani lo orosok naya hipalita.‘ ⁴ Obe ifa inya awak hilwak inya, ati ta halu, ata inya hijo to wan to nohonye, 'Abe ida hido naya eruk to Hollum abe hidofe abaŋ hiyo, ⁵ ati odule ihidak ina hitigiama naya bi no, aluak iso naŋ inya to okhe bolioŋ, hijo hotobiaŋa inya etigiem naya to loton nohonye ta hanaŋ holoŋitek daŋ.''' ⁶ Ata Habu hijo, "Itira to haŋotoni lo oru. ⁷ Obe iso Hollum eyyani ŋoto to onyimot ilohonye ile oyio to honye ta far he ta harie? Odule iso mahu inya hiliŋa to hosie? ⁸ Ajo naŋ ta hatai hijo eyyani iso inya ŋoto no obis to hosie kokwak. Ati lojo onyi Tuŋani lotu, hotu iso inya arumu huruk ta fau?“ ⁹ Ata inya hinyak hiro hitiriami ina te ilak ile etahuo wati hijo ebis isia ojo hidofe omiana ilak hiyo, ¹⁰ “Efie ifa liawa ohorik omojori a kelesia, ara ifa lobotie la Farisei ojo lobotie ara heduduhani ho mosuru. ¹¹ Odioto la Farisei ata mojo to hiro ino wan nohonye, ‘Hollum, ajo naŋ to hoi humo hijo abe naŋ lara iya ilak hiyo ila ara hahalak, hiyo ilo obe obis, hasomok, iya heduduhak ho musuru ilia. ¹² Eya naŋ hinyahita arik te isabit daŋ. Esiara naŋ hisiorita daŋ ino hiro ina arrumu naŋ.‘ ¹³ Ati oweta heduduhani omusuru ta alamarai lo obe awak hikaf honyehite ino honye ido Ata hillum suhe nohonye hijo, ‘Hollum, tomehini ta hanaŋ heyyani.‘ ¹⁴ Ajo naŋ to hoi, eno hallaŋ lia ahaŋ honye lo olibo hiram no honye agalik lafa lobotie, nyo tuŋani la ahafita wan nohonye einyaha iso, ojo tuŋani le enyak wan nohonye ahafa iso inya.“ ¹⁵ Eyyani ifa hiyo to honye iŋeyyaha, hijo anyar honye otir inya isia, ati ifa ewolo hetiyenak isia, ata hiriŋ isia. ¹⁶ Ata Yesu eliloŋu isia to honye, hijo, “Ibusak dure hafanu ta hanaŋ, hotobiaŋa itai eyyimo isia. Nyo ara lobie no Hollum nohosie. ¹⁷ Dede ajo naŋ ta hatai, hijo lobe lobo efotu lobie no Hollum iya hito obe iso ojiŋak ade.” ¹⁸ Efi lobo etok inya, hijo, “Hetiyanani lo obis, nyo iso egiem naŋ anyar arrumu naya wuaran no odule? “ ¹⁹ Ejo Yesu to honye, “Hijo jiai lelliloŋ iye naya hijo lo olibo? Obe lobo tuŋai lo obis, ati Hollum hame. ²⁰ Eyen iye hifahita - baŋa ara ahasomoni, baŋa ottohe, baŋa lahahala, baŋa ara loteller, ta baŋa monyohoi he hotonyohoi.” ²¹ Ojo etok lia, “Hiro ino bidaŋ eruk naŋ man halara naŋ la nyarhalu.” ²² Ifa etiru Yesu daŋ ania, Ata inya to honye, "Owuon nobo sihin ne ebuha to hoi. Itiinyaŋak ibariti inohoi daŋ Ata iye aharak to lociaŋak, anyar honye erumu iye ibariti te ido, Ata ti iye awoŋ hujufuta naya.'' ²³ Ifa etiru hasamani hiro inia Ata inya hijoria bi no, nyo asam ifa inya bi no. ²⁴ Ifa ewolo Yesu inya ejoria bi no Ata hijo to honye, "Ogol iso to hiyo ila asam hajiŋahini to obie no Hollum! ²⁵ Ati eyyak iso to konheni hajiŋari te itulit ne irifit, agalik tuŋani la asam hajiŋari obie no Hollum.'' ²⁶ Ata Ilafa etira hijo, “Ŋai ati oremik etilohini?” ²⁷ Etiraŋ Yesu hijo, “Hiro ino logol to hiyo obe ogol to Hollum.” ²⁸ Ojo Peturu, “Anyar, ebusak iyohoi hiro daŋ ino owon tohoi ata iyohoi ejufuni iye.” ²⁹ ojo Yesu to hosie, “Dede, ajo naŋ ta hatai hijo obe lobo ebusak haji he oŋorwo kuya hilasira kuya hilahaŋ kuya dure, to hiram to no obie no Hollum, ³⁰ Ŋai iso lobe efotu arriai ta fau ina, ojo ta fau inya otu, wuaran nolodule fur.” ³¹ Tahalu ho hattubak nohonye hejufutak ilohonye to honye, ata inya hijo to hosie, "Itiwolo, efii Iyania a Yerusalem, anyar ofwo hiro inafa egiorohini to onyi Tuŋani tubai. ³² Esiarahini iso inya to halufak, ociama iso hiyo inya, no oru to irri, ata amitak to honye hamilak. ³³ Tahalu ho baha nohosie inya, ottohe iso isia inya, ojo to holoŋ hitahunihi, enyak iso ebuhu.'' ³⁴ Obe isia oyen hiro inia, nyo eŋofo ifa hiro ino tara hosie, ata isia enyai oyen hiro inafa ero inya. ³⁵ Iya ta nafa awoŋ Yesu aŋati ho Yerhe, etole ifa lobo tuŋani lo oŋodo aŋati ikohoi le emimojo. ³⁶ Ata inya etiru iluluŋ no hiyo lofwo aŋati honye. Ata inya hifi nyo owon. ³⁷ Ata isia elimak inya hijo Yesu lo Nasarit lia olot. ³⁸ Ata tuŋani lo oŋodo lia hiliŋo bi no hijo, “Yesu, onyi Davide, tomehini ta hanaŋ.” ³⁹ Ata ilafa ofwo to hosiere hiriŋ loŋodo lia, ata elimak inya hotodwai. Ata inya yio bi no, “Onyi Davide, tomehini ta hanaŋ.” ⁴⁰ Arasa Yesu weta ta mai lia Ata elimak hijo iyani halaŋ lia to honye. Ifa eliaha loŋodo lia, Ata Yesu hifi inya, ⁴¹ “Hewak iye hijo hegiama naŋ nyo to hoi?” Ojo inya, “Habu, awak naŋ riŋai.” ⁴² Ata Yesu hijo to honye, “Toriŋai, etilibo huruk nohoi iye.” ⁴³ Kokwak ata inya riŋai, ata ejufari inya ojo hidofe etihabwo Hollum. Ifa legonyu iluluŋ no hiyo hiro ino ledwoŋ, ata isia daŋ hisio humo to Hollum.