¹ Iyya hiriŋo nia esiarahini to rijorihien. Eyyen iyyohoi hijo lawuana iyyohoi illo elofere attati hitidara binno to hilofere. ² Ojo mune eyyani golon na taji. Holobe tuŋani hiyyen hirro niyya oremik higigilo hijo ayyen inyie ojo hidonyie obe oyyen. ³ Ojo lo omune lobo tuŋani Hollum, oremik Hollum hiyyen tuŋani inyia. ⁴ Iyyania to hiram no honyie no hisiorita inne esiara hiyyo to rijorihien, le eyyen iyyohoi hijo obe rijorihien ara Hollum, nyo ara Hollum lobotie jia. ⁵ Anyar ida eyyen iyyohoi hijo owuon saŋ inia ellilloŋo hiyyo hijo johin inni ta fau kuyya te ido. Owuon johin inia iko habollok inno hosie arriai. ⁶ Ojo tohoi ara Hollum lobotie jia ojo hirro iko wuaran nohoi afanu tara honyie. Owuon hidofe Habu lohoi Yesu Kristo ille ara wuaran to hoi iko hirro daŋ te inyia. ⁷ Ati inni, holobeŋ illak hiyyo hiyyen hirro inia; Helejufuta isia hirro inno rijorihien hijo, la adumu isia hiriŋo atta haŋotok atta isia honya, etuhutek hijo esio isia hisiorita to rijorihien. Ati etihar isia tajia innohosie to higigilita inia, ati enyie golon tara hosie. ⁸ Ati etaluk hiriŋo etihutu iyyohoi to Hollum, obe orru ta hahonyari kuyya hidofe orru to daha to hohoi. ⁹ Ati ihuma riŋa ŋaso higigilita hunna etipal lobo illo obe owuon iko golon no hiruk tara itai. ¹⁰ Kuyya legonyu lobo itai, iyye lia ewuon iko ofioroho, ta adahari ho hiriŋo ta haji himojit no rijorihien, ekuyya mahu hijo, nyo etihonya nayya hisiorita hunna ho rijorihien? ¹¹ Niyya, etihar itai tuŋani lia obe golon no hamijak to honye, hilik na halasi iko no hanasi hoi nafa oyori Kristo. ¹² Le eyyau iyye te ilasi hoi to hikoi nia, etihar iyye golon na tajia nohoi. Eyyau iyye daŋ to hosiere ho Yesu Kristo. ¹³ Ati kuyya lara honya nanaŋ hiriŋo ahipali te hilasi hanaŋ, abe iso naŋ enyiak honya hiriŋo hijo tuŋ, anyar ebe etipal ilasi hanaŋ.