¹ Iyyania ero nayya to hirro innafa egiorok itai ta hanaŋ: Owuon innak holoŋitek hunna olibo inne obiaŋari hiito oliawa ofirie ho oŋoruo honyie. ² Ati to hiciemiti, owuon hiyyo illak ille egiama hirro inno somon, anyar owuon hiito oliawa daŋ ho oŋorwo honyie, ojio hidofe hiito oŋorwo owuon ho oliawa honyie. ³ Anyar esio hiito oliawa to oŋorwo honyie hirro inno osiru to honyie, ojio hidofe oŋorwo esio to oliawa honyie. ⁴ Obe hiito no ŋorwo oremik ŋeletojori wan no honyie, ati ara oliawa a letok honyie. Ojio hidofe, obe oliawa oremik ŋelitojori wan no honyie, ati ara oŋorwo a letok ⁵ Ibaŋa hebo ŋattubak wati innahatai leruk itai ara nobotie hisio wati inahatai to holoŋitek niyya eruhori itai, anyar edule itai mojo holoŋitek inne ebe itai etubari. Ati ta halu atta itai afanu daŋ nobotie, anyar obe Sitan oremik esusutak itai. ⁶ Ati ero nayya hirro inia ta hatai arriai to nyo aŋatak Hollum nayya herara ojio obe ara to hifahi. ⁷ Hara ida hiyyo daŋ iyya nayya atta ida nayya mune. Ati owuon hiyyo daŋ ho hosirita innohosie hunna olufa inne esio Hollum, ociala nobo tiji ojio nobo ociala iyya nyia. ⁸ Ati ajo nayya ta hatai ille ebe iyama ojio obiloŋi olibo hittole lobotie ania iyya nayya. ⁹ Ati kuyya lobe isia oremik hittole alobotie oremik isia yama. Olibo to hosie hayamari agalik iwahiti inno wan. ¹⁰ Ati to hiyyo ille ayama wati esio nayya hifahi inna- obe ara nayya, ati Habu: ''Anyar obe oŋorwo opiahari tara oliawa honyie.'' ¹¹ Ati kuyya opiahari inyia tara oliawa honyie, anyar ettole inyia ottoduohi kuyya hidofe emwarahini ho oliawa honyie. Ojio, ''Hotobiaŋa oliawa opiaha ho oŋorwo honyie.'' ¹² Ati te illak hullo ero nayya ( Obe ara nayya Habu), hijo lowuon lobo halasi ho oŋorwo honyie inna ara pagani ojio inyia eruk hittole daŋ honyie, anyar lobe inyia opiahari tara honyie. ¹³ Ojio lowuon nobo hiito noŋorwo ho oliawa honyie ille ara pagani ojio inyia awak manya ho oliawa honyie, anyar lobe inyia opiahari tara honyie. ¹⁴ Ati ille obe eruk to Hollum etiru iso tara oŋorwo honyie, ojio lobe oŋorwo eruk to Hollum etiru iso tara oliawa. Atta durre innohosie afanu hibwot, ati lobe isia opiaha afanu durre innohosie libe. ¹⁵ Ati lawak ille obe eruk Yesu Kristo piaha, isiara inyia heno. Iyya to hiram to nia, anyar lobe hayamak orrosok wati innohosie. Ellilloŋo Hollum iyyohoi hijo anyar ettole to hilik to no tajia. ¹⁶ Heyyen iso iyye jai, hiito noŋorwo, kuyya itilwahu iyye oliawa hoi jai? Kuyya hidofe hiyyen iso iyye jai, hiito oliawa, kuyya hitilwahu iso iyye oŋorwo hoi jai? ¹⁷ Isiara hiyyo daŋ hatamanyai ta manya nafa aharak Hollum to hosie, ojio hidofe iyya ellilloŋo Hollum isia. Ara innaŋ hifa nanaŋ te ikelesiahien bi daŋ. ¹⁸ Oŋoto ifa lobo nafa ellilloŋoro hiyyo isia hijo heruhok? Hotobiaŋa lia efufuse haforo inne ŋoto. Ellilloŋ ifa Hollum lobo ille obe oŋoto to hiruk? Hotobiaŋa inyia osiaha ŋoto. ¹⁹ Ati ŋoto arik ho biaŋan no ŋoto ara sihin asai. Nyo ara binno inyia baŋi no hifahita inno Hollum. ²⁰ Isiara hiyyo bidaŋ hotodule manya iyya nafa amanyari isia to holoŋ nafa ellilloŋori Hollum isia hijo heruhok. ²¹ Era ifa itai piti to holoŋ nafa ellilloŋori Hollum itai? Obe ara hiram ne egigilo itai. ²² Ati kuyya osiru doŋe itai to ahou no wan nohoi, olibo ahou no wan. Nyo pit lafa ellilloŋ Habu ara inyia iyya ahohini tara Habu. Ara iyya ille ahoni wan tara Habu ara inyia apit lo Kristo. ²³ Enyiaŋini ifa itai te idumut, hinyiak eyyik hira apit asai to hiyyo illak. ²⁴ Ati halasirak ho hanasirak hanaŋ, anyar imanya itai daŋ gelegele itidule manya te imanyiti inna ellilloŋori Hollum itai hijo Heruhok, ati hetidule to Hollum. ²⁵ Ati to hiram to nia hiyyo illo obe ayama, obe Habu esio ta hanaŋ nobo hifahi, ati elimak nayya itai higigilita innanaŋ to nyo efwotu ifa nayya amehini na Habu erari nayya no lobis. ²⁶ Egigilo nayya hiram no hitigiemita inna afanu wati, olibo odule tuŋani rasai iyya owuon inyia. ²⁷ Kuya ayemu iyye hiito noŋoruo hesiaha piaha? Kuya holobe itai yama? ibaŋa hesiahari ŋorwo. ²⁸ Ati kuyya eyama itai, obe ara iyyau. Ati kuyya ayama lobo hoduoti obe inyia daŋ eyyau. Ati illa ayama wati owuon iso ho hitigiemita ta manya no hosie, ajo nayya ajo etik iso nayya hitigiemita daŋ tara hatai. ²⁹ Ati ajio nayya ta halasirak ho hanasirak: Oduhocio holoŋitek hulloŋ. Iyyania man ahosiere, isiara hiyyo illa ayama wati hatai manya iyya hiyyo illo obe wati ayama. ³⁰ Isiara ille atariha wati hotowuanai iyya obe atariha; ojio illo omuno wati, hotowuana iyya obe omuno; ojio illo opocio wati, hotowuanai iyya obe isamiti, ³¹ ojio illo opocio wati hirro inno fau hunna, isiara hotowuanai iyya obe isia owuon ho hirro, nyo owuon hicuŋi no hirro ta fau. ³² Awak nayya itai hata manya to biaŋan no hihawua. Tuŋani illo obe ayama egigilo inyia to hirro inno Habu, ojio tekoi to nia etimunori inyia Habu. ³³ Ojio tuŋani illeŋ ayama wan egigilo to hirro te inia fau, ojio ho oremik inyia hitumuno oŋorwo honyie jai. ³⁴ Obwanya inyia to higigilo hirro arik. Ati tuŋani no lobe hiyyo oyemu kuyya hidofe hodwoti egigilo isia to hirro inna Habu, ojio isia osiaha hijo anyar emanya isi no olibo to wati innohosie ho Oyirihien innohosie. Ati tuŋani inna ayama egigilo inyia to hirro inna fau, ojio; hetimuno iso inyia oliawa honyie jai. ³⁵ Ero nayya inna hijo anyar olwak itai, obe ara hijo anyar etihita itai, ati to hirro inne obis, anyar itimuno itai Habu ojio hidofe igiama to honyie ta tajia ara nobotie. ³⁶ Ati le egigilo lobo hijo etirwo inyia oŋorwo honyie inna otioroti to nyo ellaŋ ŋasi innohonyie, isiara inyia hatayamai inyia nyo awak ifa inyia. Obe ara iyyau. ³⁷ Ati kuyya owuon inyia ho higigilo hijo hotobiaŋa inyia ayama, ojio nobo hitisiaha obe, ojio inyia oremik hidas munoi, egiem iso na anyar lobe inyia ayama hodwoti inna otioroti. ³⁸ Ati la ayama wan hiito oŋorwo inna otioroti, egiem na anyar, ojio ille obe onyimu hiito oŋorwo otioroti egiem hidofe agalik. ³⁹ Etihok hifahi hiito oŋoruo to oliawa honyie ille owuar wan. Ati kuyya lo oye oliawa, oremik inyia hiruk lobo tuŋani illa awak inyia yama, ati anyar ara hayamani lia Akristiani. ⁴⁰ Ati to higigilo nanaŋ anyar omuno inyia agalik ojio hidofe amanya inyia ania. Ati egigilo nayya hijo awuon nayya ho Oyiri no Hollum.