¹ Lowuon illamuk illo aŋalafa, eremik iso iyya eno ekumori holobe hiruk toŋoto, ojo hidofe holobe awoŋ to huruk? ² Hebe mahati eyyen hijo oŋoto iso heruk fau? Ojo lara itai haŋotoni hafau, hebe mahati itai eremik hitiwiet hirro hunna obe osiru? Obe iso itai eyyen hijo eremik iyyohoi hiŋot anjilohien? ³ Hera iyya ŋari nyo binno, teyya, hebe iso iyyohoi eremik hiŋot rori inno wuaran nia? ⁴ Lewak ifa itai ehihuma ŋoto nia odule to wuaran, nyo ati elahak itai rori holobe ilia illo owueta te ikelesia? ⁵ Ajo nayya te irri innahatai. Obe mahati lobo lo owuon to hiji hatai lelofere agalik anyar etilik iŋalafiti inia owuon to hiji ilasira iko inasira? ⁶ Ati ofe iyya owueta, owu iso heruhoni lobotie etiwuahari lobo heruhoni, ojo hirorita inia osihini holobe ŋoto nno lia ille obe ara heruhoni! ⁷ Dede owuon ifa iŋalafiti dia beren to hiji ho Kristianohien innafa eyalari itai. Nyo ebe edi hittaban tara hipali? Nyo ebe itai esio wati inno hatai to hinyiaba? ⁸ Ati epala itai ejo hidofe enyiaba illamuk ojo hidoyie ilia ara ilasira hoi iko inasira! ⁹ Hebe itai eyyen hijo lia ille ebe obis obe oremik arruta obie no Hollum? Baŋa eruk to teler. To hirro inno hasomok, ta hamojok inno rijorihien ,to harotok inno oŋoruo, to liawa hullo osom, ojo te ilia hullo etiyana hiram ne isomiti, ¹⁰ hahala, iko hiŋaru, rumai, henyiabak iko harosok inno hirro inno ilamuk, te ilia daŋ obe isia oremik arutak obie no Hollum. ¹¹ ojo illamuk to hiji hatai. Ati elibo ifa itai, ati emak ifa inyia itai ahaduarak, ati etibisak ifa inyia itai ahabisak iko Hollum to fure no Habu Yesu Kristo ojo to Oyiri no Hollum lohoi. ¹² "Ara hirro hunna ta hanaŋ inno hifahita,'' ati obe hirro daŋ olibo ta hanaŋ. " Ara hiro hunna ta hanaŋ inno hifahita.'' ati abe iso nayya aremik amijak te isia. " ¹³ Ara ŋiria no hosehe, ojo hosehe ara no ŋiria"- ati eyari iso Hollum ade tara hosie ararik. Ati obe wan awak hiro inno somon, ati ara wan na Habu, ojo Habu awak hisio to wan. ¹⁴ Ojo Hollum etibuhu Habu ararik ojo iso hidofe etibuhu iyyohoi ahide to golon nohonyie. ¹⁵ Hebe itai eyyen hijo ara wati innahatai iluluŋ to Kristo? Aremik iso nayya eyari ade iluluŋ no Kristo atta nayya attubak isia to somojok? Obe nobo ara ania! ¹⁶ Hebe ida itai eyyen hijo lia ille ottubahini te isomo ara isia daŋ nobotie iko inyia? Iyya ojio Baibol, "Inia ara arik ottubahini iso atta hira nobotie." ¹⁷ Ati lia ille ottubak wan to Habu ara isia Oyiri nobotie iko inyia. ¹⁸ Irruata ade tara hirro inno somon! Inak hiyyata inia eyyau tuŋani obe ara to wan nohonyie, ati tuŋani ille ara losomo eyyau inyia to wan nohonyie. ¹⁹ Hettumo ida iyye hijo ara wan nohoi haji no Oyiri lo Olibo, nia inna amanya to hoi, inna edumu iyye tara Hollum, ejo iye obe ara hame to wan nohoi? ²⁰ Nyo enyiaŋuni ifa iyye bi. Iyyania itukwata Hollum ta wan nohoi iko to oyiri nohoi na ara no Hollum.''