¹ Ekyana ni nelahode to Kristo, abeŋ ni agesem. Iramyo ataji hoŋ etamijani to Oloyiri ol Olibo jo abeŋ ni agesem. ² Nyo awon ni iko ejiriŋa on obolo, bwo fe odulo adyaha on obolo itaji hoŋ ta illarak hoŋ lonyirok Israele. ³ Aremik ni wahan apyaharo jyo Kristo addi ihima imaji illarak hoŋ. ⁴ Arai isi laati Israele. Iloŋo Hollum isi lonyirok honyi bwo isyo jihosi nakwatan iko emuniti, efahita, ehumita, iko necoriti. ⁵ Owoni bwo fe hohonyok hutto woyo hosi hinya isuruniere Yesu Kristo. Ijara itahabuye Hollum al agalik’to erre daŋ tulaŋ. Amen. ⁶ Ati abeŋ ni ajo jo, opwahi ecoriti Hollum, nyo hul isuruni’to to Israele obeŋi isi daŋ arai lonyimot hulo Hollum. ⁷ Bwo fe hul isuruni’to to Abramo obeŋi isi daŋ arai lonyirok honyi, nyo ocorok nya Hollum ojo, “Ihenuni adi edetit hoi jyo Isako hama.” ⁸ Itahutak ana ojo obeŋi lonyirok hulo ahwan daŋ arai lonyirok Hollum, ati ihenio Hollum lonyirok hulo ecoriti hama ahulonyi. ⁹ Nyo ocorok Hollum ojo, “Al attubai oŋitek, acohuno adi ni attadi Sara isiuna eito.” ¹⁰ Bwo fe oyedu nya Rebeka lonyirok arrihai jyo hohonyi hohoi Isako. ¹¹ Hobeŋi dwadi bu isi isiuni bwo fe hobeŋi ihanie omuk erre hun oyiji kuyya hun orrohoji onyimu Hollum alahalu, ette jaran jyo Rebeka jo, “Igyama adi oloŋeu jyo alahalu.” ¹² Nyo awak Hollum itahutana anyimuna honyi jo obyaŋara te egyamita hosi ati ara ta awahan honyi. ¹³ Ihwa igyoroni, “Amuno ni Yakobo bwo aliwari Isau.” ¹⁴ Anyo attadi ejo hohoi? Oŋoco Hollum on orroho? Obeŋ ’tuŋ. ¹⁵ Ojo nya inyi jyo Mose, “Amehino adi ni jyo lya al awak ni mehino, bwo fe ehanio adi ni on oyyu jyo lya al awak ni ihanio on oyyu.” ¹⁶ Obeŋ ara ta awahan tulo kuyya te egyama honyi on omehiniere Hollum, ati ara ta awahan ono Hollum. ¹⁷ Nyo ojori egyerita jyo Faro, “Etadet ni iye ahobu eleittok itahutaniere adwaran hoŋ bwo fe itakwacere afure hoŋ ifau daŋ.” ¹⁸ Tania omehino Hollum jyo hul awak inyi bwo fe itadwa inyi ataji ono lya ihwa awak inyi. ¹⁹ Ijatta adi itai jihoŋ, Nyo oŋot Hollum atulo? Ŋai ol oremik’to itik awahan honyi? ²⁰ Ŋai iye atulo al itarraŋ’to jyo Hollum? Obeŋ atobok on oyyeuni ifiyo ayyani honyi ojo, Nyo ihuhum iye ani ihwania? ²¹ Obeŋ so layyani oremik ’yeuna atobwaha ihwa awak inyi? Jyo efwoto abotye oyyeu inyi obo te erre hun oyiji bwo obo te erre hun orrohoji. ²² Awak dwo Hollum itahutana ajore honyi iko adwaran, ati odulo nya inyi itila ta adihan on obolo eyyeti hun orrohoji’to hun osiruni ta abahyo honyi. ²³ Nyo awak inyi italeyehina nakwatan honyi on obolo jihohoi, tania ihuhum inyi hohoi beryen ifwotuniere amehino honyi iko akwatan. ²⁴ Obyaŋara Yudea hama hunya iloŋo inyi, ati paganohyen bwo fe. ²⁵ Ihwa igyoroni ibuk ono Osea ojo, “Ojo Hollum jo, Hul obeŋi’to arai awati hoŋ, Eloŋo adi ni awati hoŋ. Bwo hulya hinya abeŋ ni amuno, Amuno adi ni. ²⁶ Ojo nya Hollum jyo paganohyen ojo, Ibyaŋata tai irata awati hoŋ; Ati ihwania ojo inyi iloŋoi isi olonyirok hulo Hollum leswoni.” ²⁷ Ojo nya Isaya ta laati Israele ojo, “Olwaji dwadi bu lonyok Israele ihwa asuluŋayo hutuk owore ati italahuni adi minoŋ. ²⁸ Nyo oŋot adi Hobu erre wati te efiriwa kokwak bwo fe ette tuhonia egyama honyi ifau.” ²⁹ Ihwa ojo Isaya beryen, “Kuyya dwo obeŋ Hobu idehi hohoi omuk edetiti, Dwo mana era hohoi ihwa Sodoma iko Gomora.” ³⁰ Tania anyo adi ejo hohoi? Paganohyen hunya obeŋi’to ijifatye alibori, inefuni isi ihwania alibori an ara’to alibori ono neruk ahode. ³¹ Ati Israele hinya ottifyai’to nefahita huno alibori obeŋi isi inefuni inyi. ³² Nyo ati obeŋi isi onyurani? Obeŋi isi onyurani nyo obeŋi isi ottifyai ta neruk ati ottifyai isi te egyamita. Ikosoroi isi jyo namorwo an ikosotyarik. ³³ Ihwa igyoroni igyerita ojo, “Imijyete ehanak ni amorwo imiji Sion itikosyere aati itakwahyere isi, Ati lya al iruk’to jihonyi obeŋ adi okwaharo.”