¹ Illarak hoŋ, awak ni bebe ta ataji hoŋ jo oŋida aati hutta fau hohoi italahuni. Amojo ni bebe jyo Hollum tesi. ² Nyo ara ni etamijani hosi jo igyamai isi bebe jyo Hollum ati obyaŋara to olofyoro. ³ Nyo obeŋi nya isi omijani alibori ono Hollum ati ottifyai isi igyamari alibori hosi ta ahwattek hosi. Obeŋi isi ifahai alibori ono Hollum. ⁴ Nyo iyaŋuno Kristo esidi ono efahita tania olibori adi hul iruhi’to daŋ jihonyi. ⁵ Nyo igyorok Mose jo, atulo ol onyurak alibori te efaha ono efahita isu adi te efahita. ⁶ Ati inyuraniere alibori ono neruk obeŋ awak obo atulo odok idou iyaŋuniere Kristo ifau. ⁷ Obeŋ bwo fe awak obo atulo olo imaji hayak itubuhuniere Kristo to ye. ⁸ Ati ojori asayyo hun oyiji jo, Onyiha nekyana Hollum jihatai, owon inyi ihutuhe hatai iko itajya hatai. Ara inyi nekyana ono neruk ahode en ettiyenio hohoi. ⁹ Kuyya ikyanati tai te etuhe hatai jo ara Yesu a Hobu bwo fe iruhoto tai ta atajya hatai jo itubuhu nya Hollum inyi to ye, italahuni adi itai. ¹⁰ Nyo ara ta ataji an iruhori atulo ifwotuniere alibori bwo fe te etuk an iwwahari inyi inyuraniere etalahuna. ¹¹ Nyo ojori egyerita jo, “Al iruk’to jihonyi obeŋ adi iloriri.” ¹² Obeŋ alufaji ihiji Ayudetanani iko apaganotanani nyo ara Hobu hosi daŋ abotye bwo fe omehino inyi jyo hya daŋ hul omojoi’to ta afure honyi. ¹³ Nyo ojori egyerita jo, “Lya ol omojo’to ta afure Hobu italahuni adi.” ¹⁴ Aŋai attadi omojoi isi jihonyi kuyya obeŋi isi iruhi? Bwo fe aŋai adi iruhi isi kuyya hobeŋi isi itaniŋuni eram ono Hollum? Bwo fe aŋai adi itaniŋuni isi kuyya obeŋ ettiyanani? ¹⁵ Tania aŋai oremehini isi ittiyenio kuyya obeŋi ifahuni isi? Ihwa igyoroni ojo, “Ahode ilamani ejek wati hulya hul iyaŋunie’to asayyo hun oyiji.” ¹⁶ Ati obeŋi isi daŋ iruhi asayyo hun oyiji. Nyo ifiyo Isaya ojo, “Hobu, ŋai al iruk’to ekyana hohoi?” ¹⁷ Tania ottu neruk te etaniŋyo ekyana, bwo fe ottu nekyana jyo nettiyenio hiram ono Kristo. ¹⁸ Ati efiyo ni jo, Obeŋi nya isi itaniŋuni? Itaniŋuni isi ahode. Ojori egyerita jo, “Itaniŋuni laati daŋ ettiyenita hosi, Afanyi ekyanita hosi isidita huno afau.” ¹⁹ Ati efiyo ni jo, Obeŋi nya Israele omijani? Ahosyere ojo Mose, “Etahain adi ni itai iko eluluŋ wati hul arai’to asai. Etiloŋo adi ni itai iko eluluŋ wati hul ibuyaŋai’to.” ²⁰ Igyoro Isaya ibuk honyi te eŋere jo, “Ojo Hollum, Hul obeŋi’to ottifyai ani onyurani isi. Aleyo ni jyo hul obeŋi’to iloŋoi ani.” ²¹ Ati jyo Israele ojo inyi, “Adulo ni ihalamyo ahas hoŋ jyo aati hul omesye’to iko hul odwari tajya.”