¹ Ihwania efiyo ni jo, Iha Hollum aati honyi? Obeŋ ’tuŋ. Nyo ani ta ahwan hoŋ ani olo Israele. Adetuno ni jyo Abramo bwo fe ani otto woyo ba Benjamino. ² Obeŋ Hollum iha laati honyi hunya onyimu inyi. Ibyaŋata tai imijana anyo on ojori egyerita ta Elija? Ilolya nya inyi jyo Hollum ta Israele ojo, ³ “Hobu, ottohori isi eyak sayyo hoi bwo itatturi isi amasik ehumita hoi. Ani abotye arasuno bwo fe ojori isi ani ettoho.” ⁴ Ati itarraŋ Hollum jihonyi aŋai? “Attunu ni ta ahwan hoŋ aati alif hattarik hul obeŋi origoŋi jyo ajok an ifurani Baal.” ⁵ Tania bwo fe ta asaa ana owoni ofitot hul onyimu nya Hollum ta amehino. ⁶ Ati kuyya ara anyimuna honyi ta amehino obeŋ inyyak rahan te egyamita. Nyo ŋadi amehino ofyaha. ⁷ Anyo attadi? Obeŋi Israele orumani erre hun ottifyai isi. Orumani hul onyimuni, ati hul omuk odwari atajya hosi. ⁸ Ihwa igyoroni, “Isyarak Hollum jihosi atajya hun obeŋi igigiloi. Obeŋi oŋite hosi omijye bwo fe ayyaha obeŋi itaniŋye many iko ahana.” ⁹ Ojo Davide bwo fe, “Ijara aŋiyo hosi hetera ihwa olofidik inefuniere isi, Ijara isi okwaharai bwo fe hefwotuniehe aŋoco. ¹⁰ Ijara oŋite hosi iryohi jo oŋida obeŋi igonyuni, Bwo fe irrafatai orwaŋite hosi tulaŋ te ettigemita.” ¹¹ Efiyo ni jo, Ikosoroi Yudea jo oŋida isi okwaharai? Obeŋ ’tuŋ. Ati te egyama hosi isyori etalahuna jyo paganohyen itahainiere Israele. ¹² Ihwania iyaŋuno epali hosi emuniti hun olwaji ifau, bwo fe aŋotihina hosi iyaŋuno emuniti hun olwaji jyo paganohyen. Tania olwaji adi emuniti agalik ta attubanio hosi. ¹³ Ihwania ekyana ni jihatai paganohyen nyo ara ni alefahata olo paganohyen tania etadara ni te egyama ana, ¹⁴ itahainiere illarak hoŋ Yudea bwo fe italahuniere omuk. ¹⁵ Nyo ta rwasanio hosi itimwarani laati hul omuk daŋ. Ara adi efwotuna hosi anyo, nesu imaji ye? ¹⁶ Kuyya olibo eŋodit ŋirya etteri olibo inyi daŋ, bwo fe al olibori adde olibori atanata daŋ. ¹⁷ Ati igotuni omuk atanata liwatit addi bwo itai hun isuroto’to itwa muru itulani imasik hosi ifwotuniere eŋijit ono aliwati. ¹⁸ Tania hetahwoti ahwattek hatai agalihina atanata. Omijana jo obyaŋara itai itakyeyete adde ati adde itakyeye itai. ¹⁹ Ijo adi iye, Igotuni nya atanata addi jo oŋida itulanierek ani. ²⁰ Afe obis ania, ati igotuni nya isi addi nyo ta abyaŋan hosi iruk, bwo fe iwotyati tai ta neruk hama. Tania hetadarati ati abaŋata. ²¹ Nyo kuyya obeŋ nya Hollum ofitu atanata hun oyisuni’to ahosyere obeŋ adi bwo fe inyi ofitu itai. ²² Tania imijyete amehino iko efiriwa ono Hollum. Ifiriwa inyi jyo hul ipali’to ati omehino inyi jihatai al iduloro tai imehino honyi nyo ŋadi itai bwo fe igotuni addi. ²³ Ara dwo bu hya hul igotuni addi, itulani adi isi inyyak al obeŋi isi odulori ta abyaŋan hosi iruk, nyo owon adwaran jyo Hollum itulaniere isi inyyak. ²⁴ Kuyya oyefuni nya itai to liwati otto mur bwo itulani itai iliwari ahonye liwati an idulani imiji, oyyu agalik inyyahuniere atanata hun oyisuni’to ahosyere itulaniere imaji hosi? ²⁵ Illarak hoŋ, awak ni itai imijana elahode ninya idima’to ana, jo oŋida itai ibyaŋata itadarati. Inyi ania jo ottu adwaran tajya jyo laati Israele omuk many ottubanierek paganohyen hunya onyimuni. ²⁶ Tania italahuni adi Israele daŋ. Nyo igyoroni jo, “Ottu adi Etalahani to Sion, Iya adi inyi arrohoji addi jyo Yakobo. ²⁷ Bwo ara adi ana ecorit hoŋ ikosi, Jo eya ni eyyata hosi addi.” ²⁸ Te ehara wati Yudea asayyo hun oyiji arai isi amyorok hulo Hollum, ati ara ana asiruna miji jihatai. Ati ta anyimuna hosi omuno Hollum isi ihwa ocorok nya inyi jyo hohonyok. ²⁹ Nyo obeŋi esyorita huno Hollum iko eloŋo honyi opwahitatye. ³⁰ Itai paganohyen, imesyete nya itai Hollum, ati ihwania ifwotuna tai amehino ta amesyo ono Yudea. ³¹ Omesye isi ihwania jo oŋida isi ifwotuni amehino ihwa an ifwotuniete tai. ³² Nyo ifitak Hollum laati daŋ ta amesyo jo oŋida inyi omehino jihosi daŋ. ³³ Ahode obolori ebariti huno Hollum bebe iko ofyoro bwo amijana honyi. Ngai ol oremik’to mijana eŋotiti honyi? Bwo fe ŋai ol oremik’to mijana ehanita honyi? ³⁴ Ihwa ojori, “Ngai adi omijak egigilo Hobu? Ngai oremik ittiyenio inyi? ³⁵ Ŋai al idainak’to inyi obo ariŋ Oŋida inyyahini jihonyi?” ³⁶ Nyo ofwonni erre daŋ tenyi iko ’totwa honyi ette manya jihonyi. Ijara akwatan hatawana jihonyi tulaŋ. Amen.