¹ Ihwania obeŋ aŋoco ye jyo enosok iko Yesu Kristo. ² Nyo adwaran ono Oloyiri ono nesu on owon’to jyo Yesu Kristo ohohi ani jyo adwaran ono neyyau iko naye. ³ Nyo ihan Hollum ariŋ on obeŋi efahita oremehini ihanio nyo ofyahaji ahwattek. Ette inyi ifahuna Lonyi ihwa atulo el eyyau’to irari ehumi te eyyata. Tania itaye inyi adwaran ono eyyata to hwattek wati. ⁴ Tania eremik hohoi efaha efahita, hohoi hul ebeŋ’to edaha te ewahiti huno ahwan ati ta adwaran ono Oloyiri ol Olibo. ⁵ Nyo hul adahai te ewahiti huno ahwan igigiloi isi te emuniti hwattek hosi. Ati hya hul adahai’to te ewahiti huno Oloyiri igigiloi isi te erre huno Oloyiri. ⁶ Nyo hul ihanani’to egigilita hosi jyo erre hutto hwattek hosi, oyei adi, ati hul ihanani’to egigilita hosi jyo erre huno Oloyiri owoni isi iko nesu bwo nelik tajya. ⁷ Hul ihanani’to egigilita hosi jyo erre hutto hwattek hosi, arai isi amyorok hulo Hollum bwo fe ittallihi isi niŋyo efahita huno Hollum ’tuŋ. ⁸ Obeŋi hya oremehini itamuno Hollum hul igigiloi te erre hutto hwattek hosi. ⁹ Ati ibyaŋata tai irata hulo afau ati hulo Oloyiri kuyya amanya Oloyiri olo Hollum itajya hatai. Ati lya ol obeŋ iko Oloyiri olo Kristo obeŋ inyi ara aholonyi. ¹⁰ Kuyya owon Kristo itajya hatai ifuti oloyirihyen hatai iko nesu nyo ihyanani jihatai nalibori, dwadi bu oyei ahwattek hatai te eyyata. ¹¹ Kuyya amanya Oloyiri olo Hollum linya itubuhu’to Yesu to ye, itwajin hatai, isyo adi inyi nesu ihwattek hatai to Oloyiri honyi al amanya’to itwajin hatai. ¹² Ihwania illarak hoŋ, era hohoi awati horos ati ebeŋ hohoi era awati horos huno ahwattek ijifatyere emanyiti huno ahwattek. ¹³ Nyo al ijifatyete tai emanyiti huno ahwattek iyeti adi itai, ati al ittohoro tai ehanita huno ahwattek to Oloyiri iswoto adi itai. ¹⁴ Nyo hul itadihoro Oloyiri olo Hollum arai isi lonyirok Hollum. ¹⁵ Ibyaŋata tai irata apiti hul abaŋi ati irata tai lonyirok to Oloyiri al isyo Hollum jihatai ette hohoi iloŋo inyi Monye hohoi. ¹⁶ Itahutak Oloyiri honyi arabotye iko oloyirihyen hohoi etamijani jo era hohoi lonyirok hulo Hollum. ¹⁷ Kuyya era hohoi lonyirok era hohoi bwo fe aharutak. Era hohoi aharutak hulo Hollum bwo fe erutak adi hohoi iko Kristo. Al eŋiŋara hohoi ettigemita iko Kristo ehor adi hohoi akwatan ikonyi. ¹⁸ Ebeŋ hohoi eremik itarrijo ettigemita huno amanya ana iko akwatan on obolo’to an italeyeuni adi jihohoi. ¹⁹ Itilai eyyeti daŋ ta awahan on obolo etaleyeuna ono lonyirok hulo Hollum. ²⁰ Ilettohori arrohoji eyyeti daŋ, obyaŋara ta awahan hosi ati ara awahan ono Hollum al ara’to ahobu hosi. ²¹ Ati owoni eyyeti iko eyihina jo ohohini adi isi jyo efico ono arrohoji, ette fwanna manya ta akwatan ono aduri hulo Hollum. ²² Emijak hohoi jo many iko ihwania itudetai eyyeti daŋ bwo fe iburaŋatye ihwa aŋotte on ojo’to esyo. ²³ Obyaŋara eyyeti ijai ati etudeta hohoi bwo fe ta atajya hohoi, dwadi efwotu hohoi Oloyiri inya ara etteri olo esyorita huno Hollum. Etudeta hohoi bwo fe etila oloŋ an ifwotuniere adi Hollum hohoi olonyirok honyi an ara ahohina ono ahwattek hohoi. ²⁴ Nyo italahuni hohoi te eyihina. Ihwania eyihina on oleyo’to obeŋ ara eyihina, nyo ŋai al iyihi’to jyo erre hun igonyu inyi? ²⁵ Ati al eyihi hohoi jyo erre hun ebeŋ hohoi egonyu, etila hohoi ta adihan dee. ²⁶ Bwo fe olwahyo Oloyiri elihita hohoi nyo etimo hohoi imojori on oyyu ati omojo Oloyiri tohohoi ta ayirita hun obeŋ tulo oremik itaniŋuna. ²⁷ Bwo Hollum ol ottifya’to atajya wati omijak anyo igigilo Oloyiri, nyo omojo, Oloyiri ta aati Hollum ta awahan ono Hollum. ²⁸ Emijak hohoi jo igyama Hollum te erre daŋ iyaŋuniere ayiji jyo hya hul omunoi’to inyi, ojo hul iloŋo inyi ta awahan honyi. ²⁹ Hinya omijak Hollum, onyimu nya inyi isi ihuhumyere ihwa Lonyi honyi jo oŋida Lonyi honyi ara oloŋeu jyo illarak honyi hul olwaji’to. ³⁰ Bwo fe hya hinya onyimu inyi, iloŋu inyi isi daŋ. Bwo fe jyo hul iloŋo inyi itimwarak inyi isi ikonyi. Bwo fe hya hul itimwarak inyi, isyo inyi akwatan honyi jihosi. ³¹ Anyo attadi ejo hohoi jyo erre huna? Kuyya ewon Hollum ikohoi, ŋai adi oremik itarroho hohoi? Obeŋ tulo. ³² Obeŋ nya Hollum italahu Lonyi honyi iholoŋ ye honyi, ati isyo inyi tohohoi daŋ. Tania isyo adi inyi jihohoi erre daŋ ikonyi. ³³ Ngai ol oremik’to ’rasana obo eram jyo onyimot hulo Hollum? Itimwarak nya Hollum isi. ³⁴ Ngai ol oremik’to inyyak ŋot aye jihosi? Obeŋ tulo. Ara Yesu Kristo inya oye’to bwo fe ibuhu ette itoŋo ihani iŋet ono Hollum, ol omojo’to tohohoi. ³⁵ Ngai ol oremik’to itapek hohoi jyo amuno ono Kristo? Oremehini adi ettigemita, kuyya ejiriŋa on obolo, ettigemita wati, ahure on obolo, nelocaŋ bebe, arrohoji, iko arrem? ³⁶ Ihwa igyoroni igyerita ojo, “Oŋitek daŋ edaha hohoi ihiji hirre hun oyeyeri’to te eram hoi. Era hohoi daŋ ihwa akyoro hun ofwoi ŋoco.” ³⁷ Ati eyyala hohoi erre huna daŋ to lya ol omuno’to hohoi. ³⁸ Nyo amijak ni obeŋ obo ariŋ oremik itapek hohoi jyo amuno honyi; obeŋ dwadi aye, nesu, anjelohyen, eleittaha hulo ajohin, edwariti, erre hun iburi’to bur, erre hun ofwonni’to, negoliti huno ajohin, ³⁹ erre hutte dou, erre hutta fau, kuyya obo ariŋ jyo eyyeti daŋ; jyo erre huna daŋ, obeŋ obo oremik itapek hohoi jyo namuno ono Hollum on owon’to jyo Yesu Kristo Hobu hohoi.