¹ Illarak hoŋ, ekyana ni jyo hul omijani efahita, ati, itimoti tai jo ifitani efahita atulo hesu inyi? ² Nyo ifitani aŋotte te efahi jyo habi honyi hesu inyi. Ati al aye habi honyi ohohini inyi jyo efahi ania. ³ Tania iloŋoi adi inyi aharotoni al owoni inyi iko obo alle bwo habi honyi hesu. Ati al aye habi honyi ohohini inyi jyo efahi ania. Owoni dwadi bu inyi iko obo alle obeŋ adi iloŋoi inyi aharotoni. ⁴ Ihwania bwo fe illarak hoŋ iyeti nya itai jyo efahi ta aye ono Kristo jo oŋida inosoni itai iko obo. Inyi alya al ibuhu’to to ye tania oŋida hohoi eŋiju aŋer jyo Hollum. ⁵ To ninya hemanya hohoi te ewahiti hwattek hohoi, igyamai ewahiti hun orrohoji’to aŋer huno naye ihwattek hohoi te efahita. ⁶ Ati ihwania ohohini hohoi jyo efahi nyo eye nya hohoi jyo efahi inya ifitanierek hohoi. Tania ebeŋ hohoi egyama te efahi an imarwak’to ati egyama hohoi ta nesu aŋejuk ono Oloyiri. ⁷ Ejo adi hohoi aŋai? Iyaŋunie efahita eyyau? Obeŋ ’tuŋ. Itahutani efahita ani eyyata. Abeŋ dwo ni amijak jo orroho adaya hirre ara dwo on obeŋ efahi ilyet, “Hewahata asaŋ huno obo.” ⁸ Te efahita orumak eyyau adwaran ette iyaŋuno jihoŋ ewahiti hun orrohoji’to. Nyo al obeŋi efahita obeŋ adwaran jyo eyyau. ⁹ Esu nya ni habeŋ ni amijak nefahita, ati al etaniŋu ni efahita amijak ni eyyata hoŋ hun oŋoti aye jihoŋ. ¹⁰ Ati efahita hun ojori dwo iyaŋunie nesu, itabahasunie jihoŋ naye. ¹¹ Nyo orumak neyyau adwaran te efahita ette ’tohoro ani te enyobyo. ¹² Tania olibori efahita, oyiji isi daŋ bwo fe obisi. ¹³ Iyaŋunie nyati erre hun oyiji’to hunia aye jihoŋ? Obeŋ ’tuŋ. Iyaŋunie nya eyyata naye jihoŋ te erre hun oyiji’to hunia, isi efahita, jo oŋida arrohojita huno eyyata oleye. Tania itahutani efahita jo orrohoji eyyata agalihini. ¹⁴ Emijak hohoi jo arai efahita huno Hollum ati ara ni olo ahwan an ipito’to jyo neyyau. ¹⁵ Abeŋ ni amijak awoyo hiram ono ehanita hoŋ. Nyo abeŋ ni ehanio erre hun oyiji’to hun awak ni ihanio ati ehanio ni erre hun orrohoji’to hun aliwari ni. ¹⁶ Ihwania al ehanio ni erre hun abeŋ ni awak ihanio amijak ni ehanio ni on orroho bwo fe oyiji efahita. ¹⁷ Tania obyaŋara ani ehanio erre hun orrohoji’to ati neyyau on owon’to itaji hoŋ inyi ihanio. ¹⁸ Nyo amijak ni jo obeŋ obo ariŋ on oyyu’to owon ihwan hoŋ, nyo aremik ni wahan ariŋ on obis’to ati ettallik ni hanio inyi. ¹⁹ Nyo abeŋ ni ehanio ayiji an awak ni, ati erre hun orrohoji’to hun abeŋ ni awak ihanio, isi hun ehanio ni. ²⁰ Tania al ehanio ni erre hun abeŋ ni awak ehanio, obyaŋara ani ehanio ati eyyau on owon’to itaji hoŋ inyi ihanio. ²¹ Tania amok jihoŋ jo al awak ni ehanio on oyyu ehanio ni on orroho. ²² Nyo amuno ni efahita huno Hollum ta ataji hoŋ. ²³ Ati arumak ni ewahiti hutto hwan hoŋ hun imyorohi iko egigilo hoŋ, bwo ifitani isi ani jyo eyyau on owon’to ihwan hoŋ. ²⁴ Ani atulo al arroho bebe. Ngai adi ani etalwahu jyo ahwan ana an iyaro adi ani iye? ²⁵ Ati humo bebe jyo Hollum ta Yesu Kristo Hobu hohoi. Tania te egigilo hoŋ ara ni apit olo efahita huno Hollum ati ta ahwan hoŋ ara ni apit olo neyyau.