¹ Anyo attadi an ejo hohoi? Edulo adi hohoi eyyauta jo oŋida amehino obolo? ² Obeŋ ’tuŋ. Aŋai eremik hohoi hul eye’to jo neyyau rasa manya jihonyi? ³ Ibyaŋata tai imijana jo inya ibatisyerek hohoi inosoniere jyo Yesu Kristo, ibatisye hohoi inosoniere liye honyi? ⁴ Onuhani nya hohoi ikonyi liye honyi ta batisimo, jo ihwa inya ibuhuniere Kristo to ye ta akwatan ono Monye, oŋida bwo fe hohoi edaha ta nesu aŋejuk. ⁵ Kuyya inosoni nya hohoi ikonyi ta aye ihwa ononyi, enoso adi hohoi ikonyi ta nebuhuna ihwa ononyi. ⁶ Emijak hohoi jo isihoni nya ahwattek hohoi amarwak ikonyi jo oŋida ahwattek hohoi hun iyyauni’to ottohori bwo fe ebeŋ adi hohoi enyyak ipito jyo neyyau. ⁷ Nyo lya al aye’to ohohini inyi to dwaran ono eyyau. ⁸ Ati al eye hohoi iko Kristo eruk hohoi jo esu adi hohoi ikonyi. ⁹ Nyo emijak hohoi jo ibuhu nya Kristo to ye bwo obeŋ adi inyyak ye ’tuŋ. Obeŋ naye oremik inyyak ilettohori inyi. ¹⁰ Ta aye inya oyeri inyi, oye inyi enyyahi abotye ijai te eyyata. Ati ta nesu an iswori inyi isu inyi to Hollum. ¹¹ Oŋida bwo fe itai igigiloti jo oyei ahwattek hatai jyo neyyau ati iswoto tai to Hollum nyo inosoni itai iko Yesu Kristo. ¹² Tania helaha eyyau ilettohori ahwattek hatai jo oŋida itai iniŋyete ewahiti hun orrohoji’to. ¹³ Hesyatta aŋaco hwattek hatai jyo eyyau ihaniere erre hun orrohoji’to. Ati isyatta ahwattek hatai jyo Hollum ihwa laati hul ibuhuni’to to ye bwo fe aŋaco hwattek hatai jihonyi ihaniere egyamita hun oyiji. ¹⁴ Obeŋ adi eyyau ilettohori itai. Nyo ibyaŋata tai irata apiti hulo efahita ati irata tai apiti hulo amehino. ¹⁵ Anyo attadi? Era hohoi apiti hulo amehino bwo obyaŋara hulo efahita, tania edulo adi hohoi eyyauta? Obeŋ ’tuŋ. ¹⁶ Ibyaŋata tai imijana jo al isyatta tai ahwattek hatai iniŋyere obo, irata tai apiti honyi? Kuyya iniŋyete tai eyyau ara esidi honyi aye, kuyya iniŋyete tai ayiji ara esidi honyi alibori. ¹⁷ Ati humo jyo Hollum nyo itai hunya irata’to apiti hulo eyyau iniŋyete tai ihwania ta atajya hatai ettiyenita hunya ittiyenie jihatai. ¹⁸ Bwo fe al ohohini itai jyo eyyau irata tai apiti hulo alibori. ¹⁹ Ekyana ni te erre miji nyo ta nafyahaji hwattek hatai. Nyo isyatta nya itai aŋaco hwattek hatai irari apiti huno eboti imesyere efahita, ati ihwania oŋida isyatta aŋaco hwattek hatai irari apiti huno alibori ihaniere ehanita hun olibori’to. ²⁰ Ninya herata tai apiti hulo eyyau obeŋ nya alibori ilettohori itai. ²¹ Anyo ayiji inya inyurana tai te ehanita hun iloririjoto tai ihwania? Obeŋ obo ayiji nyo ara aye esidi ono erre hunia. ²² Ati ihwania ahohi Hollum itai te eyyau bwo fe irata tai apiti honyi. Tania inyurana tai alibori an ara esidi honyi nesu on osyo fur. ²³ Nyo aye inyi edumit ono neyyau ati nesyoryo ono Hollum inyi nesu on osyo fur on ottu’to jyo Yesu Kristo Hobu hohoi.