¹ Ihalu erre hunia owon eyom ono Yudea bwo olo Yesu many Yerusalem. ² Ati owon atafar Yerusalem an ilyaha ikat hidye. Iloŋoi Ebrei inyi Beteseda. Owon inyi iko abalihyen miet. ³ Imasik huna itaferehitai isi aati aŋwak arryai, aŋodok, aŋurak, iko aati hul orrohojari’to itilari efolyahita hari. ⁴ Nyo ottuta anjelo olo Hobu to obo oloŋ itafar itafolyahyere aari. Ihalu efolyahita hari lya al isurok’to itwa hari ahosyere ette ŋidari ta aŋwai honyi. ⁵ Ati owon obo atulo dia ol oŋwai ta aŋasi atomwana hunihoi hohottohunik. ⁶ Ninya igonyu Yesu inyi oferyo dia bwo fe omijak inyi owon inyi dia beryen, ojo jihonyi, Iwak iye aŋidari?'' ⁷ Itarraŋ aŋwani ojo, Hobu, obeŋ tulo ani akafak itwa hari al ifolyahita aari. Al ajo ni esurok ihari ette obo isuronia to hosyere hoŋ. ⁸ Ojo Yesu jihonyi, Totte, akafu ejotit hoi, adahai. ⁹ Teyya kokwak ette atulo lya ŋidari ette inyi kafuna ejotit honyi ette daha. Oloŋ nya inyi oloŋ sabato. ¹⁰ Tania ojori Yudea jyo atulo al itaŋida Yesu jo, Ara ahana oloŋ sabato, tania odwa jihoi ikafuniere ejotit hoi. ¹¹ Itarraŋ inyi jihosi ojo, Atulo al itaŋida’to ani inyi ani iramak jo, Akafu ejotit hoi bwo adahai. ¹² Ifiye isi inyi ojori, ngai atulo lya ol ojo’to jihoi, Akafu ejotit hoi, adahai? ¹³ Ati obeŋ atulo lodwo itaŋidari omijak ŋai lya nyo olo Yesu addi nyo owoni eluluŋ wati jyo amaji nya. ¹⁴ Ihalu orumak Yesu inyi ihaji imojit eneittok ette ikyana jihonyi ojo, Imijye, iŋida iye. Henyyak leten iyyauna ŋadi obo ariŋ on orroho’to agalik ottu jihoi. ¹⁵ Olo atulo lya ette iramana Yudea ojo, Yesu dwadi lodwo itaŋida’to ani. ¹⁶ Tania ette Yudea itteryo ittigemyo Yesu nyo ihanio inyi erre huna to sabato. ¹⁷ Ati itarraŋ inyi jihosi ojo, Hodulo Monyoŋ igyama many iko ahana bwo fe ni hegyama. ¹⁸ Te eram ana ottifyai Yudea bebe ittohori inyi nyo obeŋ ara te etarrohojo honyi sabato hama, ati bwo fe nyo iloŋo inyi Hollum Monyonyi itarrijohiniere ahwan honyi iko Hollum. ¹⁹ Ette Yesu itarraŋ jihosi ojo, Ahode eramak ni itai jo obeŋ Lonyi oremik ihanio obo ariŋ ta ahwan honyi arari al igonyu inyi ariŋ an ihanio Monye. Nyo erre daŋ hun ihanio Monye, ihanio adi bwo fe Lonyi honyi. ²⁰ Nyo ta amuno Monye Lonyi itahutak inyi erre daŋ hun ihanio inyi ta ahwan honyi. Bwo fe itahutak adi Monye erre hun obolori’to agalihini huna jo oŋida itai illillihati. ²¹ Nyo ihwa itubuhu Monye ayak bwo inyyak isyarana isi nesu, isyo bwo fe Lonyi nesu jyo hul onyimu inyi. ²² Obeŋ Monye oŋot obo eram ono obo atulo ati isyo inyi aŋoco hirre daŋ jyo Lonyi honyi, ²³ jo oŋida laati daŋ itahabuye Lonyi ihwa itahabuye isi Monye. Lya ol obeŋ’to itahabuyo Lonyi obeŋ bu inyi itahabuyo Monye al ifahu’to Lonyi. ²⁴ Eramak ni itai ahode ahode, lya al itaniŋyo’to nekyanita hoŋ bwo fe iruk jyo lya al ifahu’to ani owon iko nesu on osyo fur. Obeŋ adi Hollum oŋot aye jihonyi ’tuŋ ati ollwa inyi to ye lisu. ²⁵ Ahode eramak ni jihatai ojo, ottu oloŋ, afany dwadi ihwania an itaniŋunierek ayak ekyanita huno Lonyi Hollum bwo hya hul itaniŋuni’to isui adi. ²⁶ Ihwa owon Monye iko nesu ihwan honyi, tania isyo inyi Lonyi nesu hatawana ihwan honyi. ²⁷ Bwo isyo inyi Lonyi adwaran iŋocere arami nyo inyi Lonyi tulo. ²⁸ Hellillihati te eram ana nyo ottu adi oloŋ an itaniŋyerek hutte lumyo nekyana honyi, ²⁹ bwo ette fwanna addi t’elumyo. Hya hul ihanie’to on oyyu, ofwonni adi jyo nebuhuna ono nesu bwo fe hya hul ihanie’to oŋitek daŋ on orroho ofwonni adi jyo nebuhuna ono aŋoco hirre. ³⁰ Abeŋ ni aremik ihanio obo ariŋ ta ahwan hoŋ. Aŋot ni ihwa etaniŋu ni bwo fe obis aŋoco hoŋ. Nyo abeŋ ni attifya awahan hoŋ ati ara awahan ono lya al ifahu’to ani. ³¹ Al eramak ni etamijani ta ahwan hoŋ obeŋ etamijani hoŋ oremik. ³² Iramak obo etamijani toni, ette ni mijana jo ara etamijani ania ahode. ³³ Ifahina nya itai omuk laati jyo Yoane bwo iramak inyi itai etamijani an ara’to ahode. ³⁴ Ati abeŋ ni efwotu etamijani ono obo atulo. Ekyana ni ihwania jo oŋida italahuniete tai. ³⁵ Ara nya Yoane ihwa allomo on oswahini ette wulori, bwo imunoti nya itai itoŋori ifaŋan honyi. ³⁶ Ati awon ni iko etamijani on obolo agalik ono Yoane, nyo ara egyama an isyo Monyoŋ jihoŋ etamijani jo ifahu Monye ani. ³⁷ Bwo fe Monye al ifahu’to ani inyi ahetamijanani hoŋ. Hobeŋ obo alatai itaniŋu ekyanita honyi to obo oloŋ bwo fe hobeŋ obo igonyu inyi. ³⁸ Obeŋi nekyanita honyi ’totwajin hatai nyo ibyaŋata tai iruhoto alya al ifahu inyi. ³⁹ Iheniete tai egyerita nyo igigiloti tai jo irumana adi itai nesu on osyo fur dia. Ati ara abuk ania etamijani toni. ⁴⁰ Bwo fe ibyaŋata tai ifwanna jihoŋ irumaniere nesu. ⁴¹ Abeŋ ni efwotu etahwo wati. ⁴² Ati amijak ni itai jo ibyaŋata tai imunoti Hollum ta atajya hatai. ⁴³ Attu ni ta afure ono Monyoŋ. Bwo ibyaŋata tai ani irrehuna. Kuyya ottu obo ta afure honyi irrehuna adi itai lya. ⁴⁴ Aŋai iremehina tai iruk al ittifyati tai etahwo wati, bwo ibyaŋata tai ittifyati etahwo on ottu’to jyo Hollum? ⁴⁵ Hegigiloti jo etisyak adi ni itai jyo Monye. Mose inyi etisyahani hatai bwo iyihina tai jihonyi. ⁴⁶ Nyo al iruhoto tai Mose ahode ittata adi itai iruk ani nyo igyoro nya inyi toni. ⁴⁷ Ati al ibyaŋata tai iruhoto egyerita honyi, aŋai attadi iruhoto tai ekyanita hoŋ?