¹ Ihwania omijak Hobu Yesu jo, itaniŋuni Farisei jo onyimu inyi leyiyanak bwo fe ibatisyo isi agalik Yoane. ² Ara dwadi bu leyiyanak honyi ibatisye ati obeŋ ara Yesu ta ahwan honyi. ³ Tania obusak inyi Yudea ette caharu Galilea. ⁴ Bwo oŋida inyi olo otto fau Samaria. ⁵ Tania afany inyi imiji Sikara ono Samaria an ilyaha limana ninya isyo Yakobo jyo lonyi honyi Yosefo. ⁶ Bwo owon dia ahirri ono Yakobo. Tania itoŋo Yesu ifau iger hirri al aniama ta adaha honyi. Ara nya afanni. ⁷ Ninya ottu aŋotte Samaritanani iwohori aari ojo Yesu jihonyi, Esyo ani omuk amat. ⁸ Nyo ofwoi dwo leyiyanak honyi imiji inyyinyyaŋarai aŋiyo. ⁹ Itarraŋ aŋotte Samaritanani ojo, Aŋai imojo iye aari jihoŋ, iye Ayudetanani bwo ni Asamaritanani? (Nyo oliwarik Yudea Samaritahyen.) ¹⁰ Itarraŋ Yesu ojo, Kuyya imijak iye esyoryo Hollum bwo fe ŋai alya ol ojo dwo jihoi esyo ani omuk amat oŋida ifiyo iye inyi bwo isyo adi inyi jihoi aari hun isui’to. ¹¹ Ojo aŋotte jihonyi, Leittok, obeŋ obo ariŋ jihoi iwohuniere bwo fe owudo ahirri. Irumak adi iye aari hun isui’to aja? ¹² Igalik iye hohonyi hohoi Yakobo linya isyo’to hohoi ahirri ana bwo fe amatatyo inyi ta ahwan honyi iko lonyirok honyi bwo anyanya honyi? ¹³ Itarraŋ Yesu jihonyi ojo, Hul amatai’to daŋ jyo aari ana inyyahi adi ibwoto. ¹⁴ Ati al amata’to aari hun esyo ni jihonyi obeŋ adi inyyak ibwoto ’tuŋ. Nyo odulori adi aari hwa itwa honyi ihwa olotilik on obeŋ oyoho bwo iyaŋuno jihonyi esu on osyo fur. ¹⁵ Ojo aŋotte jihonyi, Leittok esyo ani aari hwa oŋida ani abeŋ enyyak ibwoto, bwo abeŋ enyyak daha dini iwohori. ¹⁶ Ojo Yesu jihonyi, Ilo iloŋo habi hoi bwo ifwanna dini. ¹⁷ Itarraŋ aŋotte ojo, Obeŋ ani ’le. Ojo Yesu jihonyi, Ibis iye ijari, Obeŋ ani ’le. ¹⁸ Nyo iwatta nya iye iko alyawa miet bwo alle al iwatta’to ikoye ihwania obeŋ ara habi hoi. Ara nekyana odwo ikyana iye ahode. ¹⁹ Ojo aŋotte jihonyi ojo, Leittok, amijak ni jo ira iye aheyani sayyo. ²⁰ Itahabuye hohonyok hohoi Hollum itwa doŋe ana bwo itai Yudea ijatta ara Yerusalem amaji an itahabuyerek aati daŋ Hollum. ²¹ Ojo Yesu jihonyi, Hanioŋ, iruho nekyana hoŋ nyo ottu adi oloŋ an ibyaŋari adi iye ilari itwa doŋe kuyya Yerusalem itahabuyere Hollum. ²² Itai aati Samaria, itimoti tai anyo itahabuyete tai ati emijak hohoi Yudea anyo etahabuyo hohoi nyo ottu etalahuna to Yudea. ²³ Idwoŋ oloŋ ihwania an itahabuyerek laati ahode Monye to oloyiri iko te elahode. Nyo ottifya Monye laati ihwa hya irari ahetahabwok honyi. ²⁴ Ara Hollum oloyiri bwo hul itahabuye’to inyi oŋida itahabuye inyi to oloyiri iko te elahode. ²⁵ Ojo aŋotte jihonyi, Amijak ni jo ottu adi onyimot olo Hollum al iloŋoi Kristo. Al attu inyi iramak adi inyi hohoi erre daŋ. ²⁶ Ojo Yesu jihonyi, Ani el ekyana’to jihoi, ani alya. ²⁷ Hekyana inyi ofwonni leyiyanak honyi ette illilliha nyo ikyana inyi iko aŋotte, ati obeŋ obo olosi ifiyo inyi jo, anyo iwak iye? Anyo ikyanati tai ikonyi? ²⁸ Tania ette aŋotte ania busana atobok hari honyi ette caharu itwa miji. Ette ikyana jyo laati ojo, ²⁹ Ifwanna, efwo mijo atulo al iramak’to ani erre daŋ hunya ehanio ni. Inyi adi Kristo lya? ³⁰ Ihwania odyotoi isi to miji ette fwatan imijyere inyi. ³¹ Hofwonni isi to miji, illilloŋoi leyiyanak inyi ojori, Hettiyanani, iŋiye aŋirya. ³² Ati itarraŋ inyi, Owon aŋirya hoŋ an aŋiyo ni an ibyaŋata tai imijana. ³³ Ette leyiyanak itteryo ahahaya ojori, Iyak dwo obo atulo inyi obo aŋiyo? ³⁴ Ojo Yesu jihosi, Aŋiyo hoŋ inyi ihaniere awahan ono lya al ifahu’to ani bwo fe ituhoniere egyama honyi. ³⁵ Ibyaŋata tai ijatta jo, Ihalu ayafajin aŋwan ette adyoŋo ’tuna? Eramak ni itai, imijyete, ofyalati amatta nyo adori isi bwo aremehini ta adyoŋo. ³⁶ Ifwotutta adyoŋoni aduma honyi bwo ittuttubuno aŋer jyo nesu on osyo fur. Jo oŋida layani hinyomo iko adyoŋoni omunoi arabotye. ³⁷ Te eram ana obis ekyana on ojo’to, Oyehi obo bwo obo odeŋu. ³⁸ Efak ni itai idyoŋori matta hun ibyaŋata tai igyamati. Igyamai omuk bwo itai ifwotuna erre hun igyamuni isi. ³⁹ Iruhi aati arryai to miji Samaria jihonyi nyo te etamijani ono aŋotte ania on ojo, Iramak inyi ani erre daŋ hunya ehanio ni. ⁴⁰ Tania afanyi Samaria ette isi mojo inyi itoŋori ikosi ette inyi itoŋo dia oŋitek arrihai. ⁴¹ Tania inyyahi omuk iruk arryai al itaniŋuni isi nekyana honyi. ⁴² Ette isi jaran jyo aŋotte, Ihwania ebeŋ hohoi eruk te ekyanita hoi hama nyo etaniŋu hohoi inyi ta ahwattek hohoi, bwo fe emijak hohoi ahode jo inyi alya Etalahani wati daŋ hutta fau. ⁴³ Ihalu oŋitek hunia arrihai olo Yesu teyya Galilea, ⁴⁴ nyo ikyana Yesu ta ahwan honyi jo obeŋ etahabuyo jyo eyani sayyo imiji hosi. ⁴⁵ Ninya attu inyi Galilea ette laati Galilea muno bebe ette iyaro inyi imiji nyo owoni nya isi daŋ iyom otto Yerusalem ette isi igonyuna erre daŋ hunya ihanio Yesu. ⁴⁶ Tania ottu inyi imiji Kana ono Galilea ninya maji iloicere inyi aari ahari ajalaŋi. Owon obo eleittok olo hobu dia ol oŋwai lonyi honyi imiji Kapernaum. ⁴⁷ Itaniŋu inyi jo ottu Yesu to Yudea, Galilea, ette inyi leten jihonyi bwo olwaha jihonyi jo, Waŋ, ilo itaŋida lonyi hoŋ nyo ilyaha inyi aye. ⁴⁸ Ojo Yesu jihonyi, Al ibyaŋata tai igonyuna etamijanita iko edwariti ibyaŋata tai iruhoto. ⁴⁹ Ojo eleittok jihonyi, Hobu waŋ, efwo kokwak hobeŋ lonyi hoŋ oye. ⁵⁰ Itarraŋ Yesu, Ilo ati, isu lonyi hoi. Tania ette atulo alya iruk ekyanita hun ikyana Yesu jihonyi, ette leten. ⁵¹ Hadaha inyi tekoi ette irwaŋanio iko legyamak honyi hul ojori, Isu lonyi hoi. ⁵² Ette inyi ifiyo isi, To noloŋ baya itteryo inyi aŋidari? Itarraŋi isi, Ŋoleŋole ayir oloŋ ol otoryai ette anahan hwan busana inyi. ⁵³ Tania ette monye giluna inyi amaji holoŋ ania oŋole ikyanari Yesu jihonyi ojo, Isu lonyi hoi. Ette inyi iruk iko aati hutta haŋ honyi jyo Yesu. ⁵⁴ Etamijani ana etarrihi an ihanio Yesu, lattu inyi to Yudea, Galilea.