¹ Ihwania owon obo atulo olo Farisei afure honyi Nikodemo. Ara inyi eleittok olo Yudea. ² Ottu atulo olo jyo Yesu ta attari ette jaran jihonyi, Hettiyanani, emijak hohoi jo ira iye ahettiyanani al ifahu Hollum, nyo hobeŋ obo atulo oremik ihanio etamijanita hun ihanio iye, arari al owon Hollum ikonyi. ³ Itarraŋ Yesu, ojo, Eramak ni iye ahode ahode jo, obeŋ adi obo atulo igonyu amaji ono Hollum al hobeŋi inyyahi isiuna inyi. ⁴ Ojo Nikodemo jihonyi, Aŋai inyyahi isiuna atulo al imarwak’to? Oremik inyi inyyak jiŋana itwa hohe honyonyi bwo inyyahi isiuna? ⁵ Itarraŋ Yesu ojo, Eramak ni iye ahode jo, obeŋ adi obo atulo ojiŋak imaji ono Hollum al hobeŋi isiuni ta aari iko to Oloyiri ol Olibo. ⁶ Esiuna ono ahwan inyi ahwan bwo fe nesiuna ono Oloyiri ol Olibo inyi oloyiri. ⁷ Hehawwa te eramita hoŋ hun eramak ni iye ojo, Oŋida isiuni itai daŋ t’edou. ⁸ Ohut oyyami amaji an awak inyi bwo iye ette itaniŋuna ati ibeŋ iye imijak ottu inyi talali kuyya olo inyi aja. Ara ihwa ania jyo atulo al isiuni to Oloyiri ol Olibo. ⁹ Itarraŋ Nikodemo ojo, Aŋai arai erre huna ihwania? ¹⁰ Itarraŋ Yesu jihonyi ojo, Ira iye ahettiyanani olo Israele bwo fe ibeŋ iye imijak erre huna? ¹¹ Ahode eramak ni iye, emijak hohoi anyo ekyana hohoi bwo fe etahutak hohoi anyo igonyuni oŋite hohoi ati ibyaŋata tai ifwotuna etamijanita hohoi. ¹² Al ibyaŋata tai iruhoto erre hutto fau hun eramak ni itai aŋai iruhoto adi itai al eramak ni itai erre hutte dou. ¹³ Ati hobeŋ tulo odok idou arari Lonyi tulo ta ahwan honyi linya ottu’to t’edou. ¹⁴ Ihwa ninya akafaniere Mose to timore amunu ihitoi, ihwa ania akafi adi Lonyi tulo ahide, ¹⁵ jo oŋida al iruk’to jihonyi owon iko nesu on osyo fur. ¹⁶ Nyo omuno Hollum aati daŋ hutta fau bebe, ette inyi isyo nya Lonyi honyi ol obotye, ojo al iruk’to jihonyi obeŋ adi oye, ati owon iko nesu on osyo fur. ¹⁷ Obeŋ Hollum ifahu Lonyi honyi ifau iŋocere erre wati, ati ifahu nya inyi jo oŋida laati italahunie tenyi. ¹⁸ Al iruk’to jihonyi obeŋi adi oŋoti jihonyi aye ati jyo lya ol obeŋ’to iruk jihonyi aŋoti jihonyi beryen naye nyo obeŋ inyi iyihi ta afure Lonyi Hollum. ¹⁹ Ara ana aŋoco jo to ninya ottuniere afaŋan lifau omunoi nya laati nedumele agalik afaŋan nyo orrohoji nehanita hosi daŋ. ²⁰ Lya al ihanio’to on orroho, oliwari inyi afaŋan bwo fe obeŋ inyi ottu ifaŋan ŋadi ehanita honyi oleye. ²¹ Ati al ihanio’to nelahode ottu inyi ifaŋan jo oŋida ehanita honyi oleye ihwa ihaniere Hollum. ²² Ihalu ana ofwonni Yesu iko leyiyanak honyi iŋati fau ono Yudea ette inyi itoŋo ikosi dia bwo fe isyoryo batisimo jyo laati. ²³ Bwo fe ibatisyo Yoane aati itwa hari Anona ilyaha Salima nyo obolo aari dia, tania ofwonni laati jyo Yoane ifwotuniere batisimo. ²⁴ Nyo hobeŋi ifitani Yoane itwa babus. ²⁵ Itarisai leyiyanak hulo Yoane iko Yudea te eram ono etaliboryo. ²⁶ Ette isi fwanna jyo Yoane ette iramana inyi ojori, Hettiyanani, atulo inya iwatta’to ikoye iŋati hari Yordano, inyi alya inya iramak iye eram honyi ta ahwan hoi. Ihwania isyoryo inyi aati batisimo, tania ofwonni aati daŋ jihonyi. ²⁷ Itarraŋ Yoane ojo, Hobeŋ tulo ifwotu obo ariŋ arari al isyori jihonyi t’edou. ²⁸ Irata tai ta ahwattek hatai ahetamijanak hoŋ to ninya ajari ni obyaŋara ani Kristo, ati efahuni nya nani ahosyere honyi. ²⁹ Lya ol owon’to iko aŋotte an hetehi yemuno inyi ayamani. Ati orryahat hayamani al itoŋo’to ikonyi bwo fe itaniŋyo jihonyi omuno bebe al itaniŋu inyi nekyanita hayamani. Ihwania efut ni iko emuniti. ³⁰ Oŋida afure Yesu okwat bebe bwo onoŋ omuta. ³¹ Lya ol ottu’to t’edou, obolo inyi agalik daŋ, ati alya ol ottu’to to fau inyi olo nafau, bwo fe ikyana inyi te erre fau. Ol ottu’to t’edou inyi al agalik’to daŋ. ³² Iramak inyi etamijanita te erre hun itaniŋu inyi bwo fe igonyu, ati obeŋ obo ifwotu etamijanita honyi. ³³ Al ifwotu’to etamijanita honyi iruk inyi te ettuŋo jo ara Hollum ahode. ³⁴ Alya al ifahu Hollum iramyo nekyanita honyi nyo itufutak Hollum inyi to Oloyiri ol Olibo. ³⁵ Omuno Monye Lonyi honyi bwo isyo ihani honyi erre daŋ. ³⁶ Al iruk’to jyo Lonyi owon iko nesu on osyo fur, ati alya ol omesyo’to inyi obeŋ adi igonyu nesu ati ijorya adi Hollum jihonyi fur.