¹ Ninya allaŋi oŋitek arrihai owon alomone imiji Kana ono Galilea, bwo fe owon honye Yesu dia. ² Iloŋuni bu Yesu iko leyiyanak honyi jyo alomone ana. ³ Ette aari ajalaŋi byaŋan bwo honye Yesu ikyana jihonyi ojo, Abeŋi aari ajalaŋi jihosi. ⁴ Itarraŋ ati Yesu jihonyi ojo, Iyaŋ, heramak ani egyama hoŋ. Hobeŋi oŋitek hoŋ ottubai. ⁵ Ojo honyonyi jyo legyamak ojo, Ihaniete nerre daŋ hun iramak adi inyi jihatai. ⁶ Osyehini fe dia amoco ille hun ofiniarik ihwa an ihanierek aati Yudea. Oremehini isi ababo ta asofia miet kuyya bu ille. ⁷ Ikyana Yesu jihosi ojo, Itufutana naari limoco. Ette isi itufutana many lihala bebelet. ⁸ Ette Yesu jaran jihosi ojo, Ihwania owohuniete, iyatti jyo labusuti. Ette isi iyaro. ⁹ Iniŋ labusuti naari hun olwoi ahari ajalaŋi ati otimo inyi tai ofwonni aari hwa, ati omijani legyamak hyodwo owohunie’to aari. Tania iloŋo inyi layamani, ¹⁰ ette jaran ojo, Aati daŋ isyori do aari ajalaŋi hun oyiji’to bwo fe al ifoŋi laati isyori hun ofyahaji’to. Idehi dwadi iye aari ajalaŋi hun oyiji’to many iko ihwania. ¹¹ Ihanio Yesu etamijani netteri ana imiji Kana ono Galilea italeyeuniere etahwo honyi bwo leyiyanak honyi ette iruk jihonyi. ¹² Latuhunie erre hunia alo inyi Kapernaum iko honyonyi. Ofwoi bwo fe illarak honyi iko leyiyanak ikonyi attati isi itoŋo dia oŋitek kai. ¹³ Ihwania ilyaha neyom ono Yudea an ifurani Allaŋan ono Anjelo, ette Yesu leten Yerusalem. ¹⁴ Itwa haji imojit eneittok orumak inyi etinyyaŋak itinyyaŋai esuŋ, akyoro iko awolosin bwo atobok gurusi itoŋoi iger teremejahyen. ¹⁵ Ihuhum inyi allyoto to ofi ette inyi ifuhara isi addi to haji. Ifuha inyi akyoro iko nesuŋ bwo itisarrahi agurusi ette sulara ateremejahyen. ¹⁶ Ojo inyi jyo etinyyaŋak wolosin, Iyatti daŋ addi. Heloitoto aji Monyoŋ ahaji hahalak. ¹⁷ Attati leyiyanak honyi giluna jo igyoroni nya jojo, “Ifut adi inyi iko efiriwa ta aji honyi.” ¹⁸ Ette Yudea ifiye inyi ojori, Anani etamijani an itahutak jihohoi elaballok hoi ihaniere erre huna? ¹⁹ Itarraŋ Yesu jihosi, Al itatturoto tai aji ana aduhok adi ni inyi to oŋitek hunihoi. ²⁰ Itarraŋi Yudea ojori, Oduhoni nya aji imojit eneittok ana ta aŋasi atomwana aŋwan heille. Aŋai ijo iye jo aduhok adi ni inyi to oŋitek hunihoi? ²¹ Ati ikyana inyi ta ahwan honyi an ara’to ihwa aji. ²² Ihalu ebuhuna honyi to ye ette leyiyanak honyi giluna nekyana ania ette isi iruk nekyanita hunya igyoroni igyerita bwo nekyanita hunya ikyana Yesu. ²³ Ninya awanari inyi Yerusalem te eyom ono Allaŋan Anjelo iruhi arryai ifure honyi nyo igonyuni isi etamijanita hun ihanio inyi. ²⁴ Ati obeŋ inyi itiyihi ahwan honyi jihosi nyo omijak inyi aati daŋ. ²⁵ Obeŋ inyi owak obo iramak inyi eram wati nyo inyi ta ahwan honyi omijak anyo owon itwa tulo.