¹ Ihalu erre huna allaŋ Yesu aari tole an anya’to Galilea, ifurani inyi bwo fe Tiberia. ² Bwo fe ijifatye aati arryai nehalu honyi, nyo igonyuni isi etamijanita hun obolori hun ihanio inyi jyo hul oŋwai’to. ³ Odok ati Yesu jyo obo adoŋe bwo isugai inyi iko leyiyanak honyi. ⁴ Ihwania ilyaha neyom ono Allaŋan Anjelo, inyi neyom eneittok ono laati Yudea. ⁵ Ofyala Yesu ette igonyuna aati hul olwaji bebe ofwonni jihonyi ette jaran jyo Filipo, Aja adi enyyaŋa hohoi emunio oŋida laati hulo oŋiye? ⁶ Ikyana Yesu ihwania ikemyere Filipo nyo omijak inyi nanyo on ojo inyi ehanio. ⁷ Itarraŋ Filipo ojo, Ara dwadi bu arobia hun olwaji obeŋi fe oremehini inyyaŋari emunio jo oŋida isi daŋ ababo omojuni minoŋ, minoŋ. ⁸ Abotye olo leyiyanak honyi al anya Andrea illa Simone Petro ojo, ⁹ Owon dini obo leito iko emunio honyi miet bwo naham arrihai. Oremehini ati hunia jyo aati arryai ihwa hulo? ¹⁰ Attati Yesu jaran, Iramana aati hetetoŋohi. Obolo amaji miyaŋ dia, tania itoŋoi laati ifau. Arai alyawa esiha atomwana miet. ¹¹ Omoju Yesu hodwo imunio ette jaran humo jyo Hollum ette harana jyo hul owoniari’to iko aham bu ihwa an awaharik isi. ¹² Al ifoŋi aati ojo Yesu jyo leyiyanak honyi, Osuduhana ofitot, hotobyaŋahi orrohojari. ¹³ Osuduhani ati isi ette itafutana nafejin ’tomon harrihai to ofitot huno emunio miet hun ofituni jyo hyodwo wati oŋiye. ¹⁴ Ninya igonyuni isi etamijani eneittok an ihanio Yesu, ojori laati hulya, Ahode atulo alya inyi eyani sayyo ol ottu adi lifau. ¹⁵ Ati omijak Yesu jo ofwonni adi isi inefuna inyi ihananiere inyi ahobu. Tania ette inyi iluny lidoŋe hama. ¹⁶ Ara akikai ette leyiyanak honyi fwatan ihari eneittok. ¹⁷ Teyya ette isi dahina itogol bwo itterye isi allaŋan hari many imiji Kapernaum. Iryok attari ati hobeŋ Yesu afany jihosi. ¹⁸ Bwo fe itteryo aari efolyahita nyo ohuco oyyami bebe. ¹⁹ Al iguroroi isi alamarai ihiji hari igonyuni isi Yesu adaha ta ahide hari ol ottu ajihosi. Ette isi baŋi bebe. ²⁰ Ati ojo inyi jihosi, Hebaŋata, ani alya. ²¹ Ette isi ŋatana inyi hettu itwa togol. Teyya teyya ette atogol fanyan ilotifor hari jyo amaji an awahi isi ifwarri. ²² Nya motye igonyuni laati hul arasai’to aŋati hari tole atogol abotye on odiha’to hama. Ette isi mijana hobeŋ Yesu olo iko leyiyanak honyi ati leyiyanak hama ofwoi ta ahwattek hosi. ²³ Ofwonni omuk atogoli to Tiberia ette isi isid jyo amaji oŋole oŋiyerek aati emunio ihalu isyarana Hobu ahumo jyo Hollum. ²⁴ Ninya igonyuni eluluŋ wati jo abeŋi Yesu iko leyiyanak honyi teyya, ette isi isuruna itogoli, ette fwatan Kapernaum ittifyari Yesu. ²⁵ Ninya orumani isi inyi aŋati hari tolya ojori isi jihonyi, Hettiyanani, dwo baya ifany iye dini? ²⁶ Itarraŋ Yesu jihosi ojo, Eramak ni itai ahode ahode, ibyaŋata tai ittifyati ani te eram ono etamijanita ati ara te eram ono emunio hun iŋiyete tai ittata ifoŋ. ²⁷ Hegyamati ta aŋiyo on otuhuno adi ati igyamati ta aŋiyo an ara’to ta nesu on osyo fur. Isyo adi Lonyi tulo aŋiyo ania jihatai, nyo isyo Hollum Monye jihonyi adwaran. ²⁸ Ifiye isi inyi ojori, Aŋai adi egyama hohoi egyama ono Hollum? ²⁹ Itarraŋ Yesu jihosi ojo, Egyama ono Hollum ana, oŋida iruhoto jyo alya al ifahu inyi. ³⁰ Ati ojori isi jihonyi, Anani etamijani an ilo iye ihanio oŋida hohoi egonyu ette iruk jihoi? Anani egyama an ijo iye ihanio? ³¹ Oŋiye nya hohonyok hohoi emune itimore ihwa igyoroni nya ojo, “Isyo Hollum jihosi emune on ottu’to t’edou iŋiyere.” ³² Ojo Yesu jihosi, Ahode ahode eramak ni itai, obyaŋara Mose isyo jihatai emune on ottu’to t’edou, ati Monyoŋ isyo jihatai emune ania an ara’to ahode. ³³ Nyo emune an isyo Hollum ottu t’edou ette isyarana esu ifau. ³⁴ Ojori isi jihonyi, Hobu oduloi isyoryo jihohoi emune ania fur. ³⁵ Itarraŋ Yesu jihosi ojo, Ani emune ono nesu. Ol ottu’to jihoŋ obeŋ adi inyyak niama bwo fe al iruk’to jihoŋ obeŋ adi inyyak ibwoto. ³⁶ Ati ihwa eramak dwo ni itai dwadi igonyuna tai ani ibyaŋata tai iruhoto. ³⁷ Laati daŋ hul isyo Monyoŋ jihoŋ ofwonni adi jihoŋ bwo fe ol ottu’to jihoŋ abeŋ adi ni efuha addi. ³⁸ Abeŋ ni attu t’edou ifau ihaniere awahan hoŋ ati attu ni ihaniere awahan ono lya al ifahu’to ani. ³⁹ Awahan ono lya al ifahu’to ani ana, jo oŋida ani abeŋ etalitohi hulya daŋ hul isyo inyi jihoŋ. Ati oŋida ani isi etubuhu iholoŋ an isidori afau. ⁴⁰ Nyo awahan ono Monyoŋ ana, jyo hulya hul omijye’to Lonyi bwo fe iruhi jihonyi owoni iko nesu on osyo fur bwo etubuhu adi ni isi iholoŋ an isidori afau. ⁴¹ Tania ette laati Yudea itteryo amwaŋa Yesu nyo ojo inyi jo, Ani emune on ottu’to t’edou. ⁴² Ette isi jaran, Obyaŋara Yesu olo lonyi Yosefo? Ebeŋ hohoi emijak monyonyi iko honyonyi? Aŋai ojo inyi ihwania jo attu inyi t’edou? ⁴³ Itarraŋ Yesu jihosi ojo, Anyo ihahayati tai ta ahwattek hatai? ⁴⁴ Obeŋ obo ottu jihoŋ arari Monye al ifahu’to ani orihu inyi. Attadi ni itubuhuna inyi iholoŋ an isidori afau. ⁴⁵ Igyoroni nya eyak sayyo jo, “Ittiyenio adi Hollum isi daŋ.” Hul itaniŋuni bwo fe iyiyanai jyo Monye, ofwonni hya jihoŋ. ⁴⁶ Obeŋ obo atulo igonyu Monye arari lya ol ottu’to jyo Hollum, inyi hama igonyu Monye. ⁴⁷ Ahode ahode eramak ni itai, al iruk’to owon iko nesu on osyo fur. ⁴⁸ Ani emune ono nesu. ⁴⁹ Oŋiye nya hohonyok hatai emune itimore ati oyei isi. ⁵⁰ Oremehini laati ŋiyo emune ana on ottu’to t’edou ifau bwo obeŋi isi oyei. ⁵¹ Ani emune ono nesu on ottu’to t’edou ifau. Ol oŋiyo’to emune ana isu adi tulaŋ, bwo fe ahwan hoŋ inyi emune an esyo ni ta nesu ono laati. ⁵² Tania ette Yudea mwaŋa ta ahwattek hosi ojori, Aŋai oremik atulo olo isyo ahwan honyi iŋiyere? ⁵³ Ojo Yesu jihosi, Ahode ahode eramak ni itai al ibyaŋata tai iŋiyete ahwan ono Lonyi tulo bwo fe ibyaŋata imatati nooto honyi, obeŋ obo nesu itwajin hatai ’tuŋ. ⁵⁴ Alya ol oŋiyo’to eriŋo hwan hoŋ bwo fe amata nooto hoŋ owon iko nesu on osyo fur, bwo fe etubuhu adi ni inyi iholoŋ an isidori afau. ⁵⁵ Nyo eriŋo hwan hoŋ inyi aŋiyo an ara’to ahode, bwo fe nooto hoŋ ara ariŋ an amatai ahode. ⁵⁶ Alya ol oŋiyo’to eriŋo hwan hoŋ, bwo fe amata nooto hoŋ ogolik inyi jihoŋ bwo fe ni agolik jihonyi. ⁵⁷ Ihwa ifahu Monye al isu’to ani bwo ni ette isu to Monye, bwo ol oŋiyo’to ani isu toni. ⁵⁸ Ara ana emune on ottu’to t’edou ifau. Obeŋ inyi orrijori iko emune ono hohonyok hatai inya oŋiye isi bwo arasai yetyo. Ol oŋiyo’to emune ana isu adi fur tulaŋ. ⁵⁹ Ikyana Yesu ekyanita huna al ittiyenio inyi ihaji imojit imiji Kapernaum. ⁶⁰ Ninya itaniŋuni isi ana ojori omuk hulo leyiyanak honyi jo, Ogol ekyana ana. Ngai adi itaniŋu inyi? ⁶¹ Omijak Yesu ta ahwan honyi jo omwaŋai leyiyanak honyi inyi te ettiyenio ana ette inyi jaran jihosi, Itamedeyuk ekyana ana atajya hatai? ⁶² Aŋai adi al igonyuna tai Lonyi tulo odok jyo amaji inya awanari inyi beryen? ⁶³ Isyo oloyiri nesu. Obeŋ ahwan ihanio obo ariŋ. Nekyanita hodwo ekyana ni jihatai arai isi huno oloyiri iko nesu. ⁶⁴ Ati hobeŋi omuk hulatai iruhi. Nyo omijak Yesu t’etteri hul obeŋi’to iruhi jihonyi bwo fe omijak inyi lya ol ottu adi itinyyaŋana inyi. ⁶⁵ Tania ojo inyi jo, Te eram ana eramak ni itai obeŋ obo ottu jihoŋ arari al orihuno Monyoŋ inyi. ⁶⁶ Tania ette omuk leyiyanak honyi bwanyaru bwo obeŋi inyyahi daha ikonyi. ⁶⁷ Ifiyo Yesu hulo ’tomon harrihai ojo, Ara bwo itai, iwahata bwo fe itai acaharu? ⁶⁸ Itarraŋ Simone Petro ojo, Jyo ŋai adi efwo hohoi, Hobu? Owoni nekyanita huno nesu on osyo fur jihoi. ⁶⁹ Bwo fe eruk hohoi bwo emijak jyo, iye Aliboroni olo Hollum. ⁷⁰ Itarraŋ Yesu jihosi ojo, Abeŋ nya ni itai anyimu ’tomon harrihai bwo fe obo alatai ihanio ehanita huno Sitan? ⁷¹ Ikyana Yesu ihwania to Yuda lonyi Simone Iskariote nyo ara Yuda obo olo ’tomon harrihai al ara’to adi ahetinyyaŋani Yesu.