¹ Onyimuni ehumani ol obolo’to t’ehiji wati igyamari jyo Hollum ta laati, bwo fe isyoryere esyorita iko ehumita jyo Hollum te eyyata wati. ² Inyi alya ol oremik’to dihuna ta anyalami atimok iko eyyak nyo ara inyi bwo fe atulo al ilik’to. ³ Tania oŋida inyi isyo ehuma te eyyata honyi luŋa bwo fe te eyyata wati. ⁴ Obeŋ obo atulo oremik ’tifya egyama on oyyu’to ania ta ahwan honyi ati Hollum onyimu inyi ihwa onyimu nya inyi Arone. ⁵ Ihwo nya obeŋ Kristo itahuyo ahwan honyi irari ahehumani ol obolo’to, ati onyimu Hollum inyi bwo ojo jihonyi jo, “Iye Lonyi hoŋ, Ahana attu ni rahan amonyohoi.” ⁶ Ojo inyi bwo fe jyo obo amaji jo, “Ira adi iye ehumani ol obolo’to fur Ta awoyo ba Melekisedek.” ⁷ To oŋitek hunya amanyari Yesu ifau ihwan tulo, omojo inyi bwo fe ilolya ta nayyo on okwat iko neyyo jyo lya ol oremik’to italahuna inyi to ye, bwo fe itaniŋyo Hollum jihonyi nyo itahabuyo Yesu inyi ta abaŋi. ⁸ Dwadi ara inyi o Lonyi ittiyenu nya inyi efaha te ettigemita honyi. ⁹ Bwo fe al obis inyi, ottu nya inyi rahan ahesyarani ono etalahuna jyo hya daŋ hul ifahai’to inyi. ¹⁰ Onyimu Hollum inyi irari ahehumani ol obolo’to ta awoyo ba Melekisedek. ¹¹ Ewak hohoi ikyana erre arryai ta Melekisedek ati ogoli isi bwo ettallik hohoi itahutaniere isi jihatai nyo ottuhoi ayyaha hatai. ¹² Iruhoto tai ta aŋasi arryai tania oŋida dwo irata tai ahettiyanak ati oŋida obo atulo inyyak ittiyenio itai ettiyenita Hollum hunya t’etteri. Hewahata tai ale hama obyaŋara eriŋo. ¹³ Laati daŋ hul amatai’to ale hama otimoi isi awoyo hiram ono ekyanita huno abisan nyo arai isi olodolyo. ¹⁴ Ati ara eriŋo ta laati hul obolori’to hul omijani ayiji iko arrohoji nyo odulori isi nyimuta ayiji.