¹ Tania hagaluna ettiyenita hunya tetteri huno Kristo bwo fe haboboloroti. Oŋida hohoi ebeŋ erasa ikyana ettiyenita hunya tetteri ihwa eloituna taji addi t’egyamita hun ofyahaji’to bwo fe ihwa neruk jyo Hollum, ² kuyya bu ettiyenio te ellillayo, eyyabana has, nebuhuna ono ayak, iko aŋoco on ottu’to. ³ Ahode ebobolororo adi hohoi kuyya aŋatak Hollum jihohoi. ⁴ Nyo ittallik obo atulo cohuno jyo Hollum ihalu honyi mijana eram Hollum bwo iniŋ inyi esyoryo ono edou iko Oloyiri ol Olibo, ⁵ bwo fe omijak inyi ayiji ono nekyanita Hollum iko adwaran ono afau on ottu’to; ⁶ kuyya iloit atulo alya ataji honyi addi jyo Hollum, obeŋ inyi oremik cohuno jyo eloituna taji nyo isihok inyi Lonyi Hollum inyyak bwo fe isyarak inyi Yesu ariri tohosyere wati. ⁷ Nyo afau on ojuryo’to ahide an asayo’to gagaga, ette ŋijuna erre hun oyiji’to jyo laromok, onyurak adi afau ania amuno ono Hollum. ⁸ Ati kuyya isuruni ekwa iko eŋoro to fau, orroho adi afau ania bwo fe ipitani adi inyi, bwo esidi honyi ara adi aswahino. ⁹ Ati itai hul emuno hohoi, dwadi ekyana hohoi ihwa hodwo, emijak hohoi ihaniete tai erre hun oyiji’to agalihini hunia, nyo ihaniete tai erre huno etalahuna. ¹⁰ Ihanio Hollum erre daŋ hun obisi, tania obeŋ inyi opwak imijyere egyama hatai bwo fe amuno hatai jihonyi an itahutana tai ta alwahyo hatai aati Hollum ihwa ihaniete tai ihwania. ¹¹ Bwo fe ewak hohoi jo oŋida itai daŋ ababo itahutana efiriwa hatai itasiruniere neyihina hatai many isidi. ¹² Heboyojoto ati ijifatyete hya hul orutani ecoriti ta neruk iko nadihan tajya hosi. ¹³ Al ocorok nya Hollum necoriti jyo Abramo ittuŋo inyi ta ahwan honyi nyo obeŋ obo agalik inyi. ¹⁴ Ette inyi jaran, “Ahode esyo adi ni emuniti daŋ jihoi bwo fe etalwaj adi ni lonyirok hoi ahode.” ¹⁵ Tania itila nya Abramo ta adihan, ette ifwotuna ecoriti hunia. ¹⁶ Nyo ittuŋoi laati ta afure an agalik’to isi bwo ara ettuŋo esidi ono aŋalafa. ¹⁷ Ittuŋo Hollum, nyo awak inyi itahutana jyo laati hul orutani adi ecoriti jo, ahode obeŋ adi awahan honyi oyito. ¹⁸ Ihanio Hollum ihwo nya, nyo awak inyi itagol hohoi te erre arrihai, ecoriti honyi iko ettuŋo honyi, hun obeŋi adi oyitoi nyo ittallik Hollum gesemi, tania oŋida hohoi hul eris’to jihonyi ehum inef neyihina on owon’to ihosyere hohoi. ¹⁹ Ara neyihina ana ihwa naririk hun ifitanierek oloyirihyen hohoi ta agolon bwo ittallihi futo. Ara inyi neyihina on ojiŋak’to imaji Hollum on odwa’to. ²⁰ Ikyomoro Yesu dia tohohoi nyo ottu inyi rahan ahehumani ol obolo’to ta awoyo ba Melekisedek.