¹ Tania howon ecorit jihohoi ijiŋaniere iyiri ijara hohoi ebaŋ, ŋadi obo tehiji hatai ittallik jiŋana iyiri. ² Nyo ittittohini asayyo hun oyiji’to jihohoi ihwa ninya ittittohinierek jihosi, ati obeŋi nya nekyanita hunia olwahi isi nyo obeŋi nya isi iruhi. ³ Ati ejiŋak hohoi hul eruk’to jyo nayiri. Nyo ikyana nya inyi ojo, “Ellama ni ta ajore jo, Obeŋi adi hya hul omesye’to ojiŋani iyiri hoŋ ’tuŋ.” Ojo inyi ana dwadi ihuhumak inyi amaji jihosi many t’etteri fau. ⁴ Jyo obo amaji ikyana inyi to oloŋ etahattarihi ojo, “To oloŋ itahattarihi oyiri Hollum te egyamita honyi daŋ.” ⁵ Ati ojo inyi, “Obeŋi adi isi ojiŋani iyiri hoŋ ’tuŋ.” ⁶ Arasa ecorit on ojo’to jo ojiŋani adi omuk jyo ayiri honyi, ati hya hul itaniŋuni’to ahosyere asayyo hun oyiji’to ittallihi jiŋana nyo omesye isi. ⁷ Tania inyyak inyi nyimuna oloŋ obo on owon’to ahana. Ihalu ikyana nya inyi to hutuk Davide nekyanita hodwo ojo, “Kuyya al itaniŋuna tai ahana etuk honyi Hetagoloto atajya hatai.” ⁸ Kuyya ara nya an isyo Yosua nayiri jihosi obeŋ dwo Hollum inyyak ikyana to obo oloŋ. ⁹ Tania arasa nayiri on odulo’to fur jyo laati Hollum. ¹⁰ Nyo lya ol ojiŋak’to iyiri Hollum, oyiri inyi te egyamita honyi ihwa ihanio nya Hollum. ¹¹ Tania ijara hohoi egyama ijiŋaniere iyiri ania. Helaha obo okwaharo te ejifatyo honyi amesyo ihwa okwaharai nya hohonyok. ¹² Nyo isui nekyanita Hollum bwo fe iruhuli. Ofiji isi bebe agalihini ademi. Ocuhi isi many jyo ehorit ono oloyiri iko ataji bwo fe iboŋita iko ittulai. Tania italeyehini isi egigilita iko ewahiti hutto taji tulo. ¹³ Bwo fe obeŋ obo eyyet oremik idima jyo Hollum ati oleye erre daŋ bwo fe arai isi ahania ihoŋite Hollum al emanyari hohoi. ¹⁴ Tania hetagoloto neruk hohoi nyo ewon hohoi iko ehumani ol obolo’to al agalik’to daŋ al allaŋ’to edohwo, inyi Yesu Lonyi Hollum. ¹⁵ Nyo obeŋ ehumani hohoi ol obolo’to otimo afyahajita hohoi nyo isusuye nya inyi te ekota daŋ ihwa an isusuyerek hohoi, ati obeŋ nya inyi iyyau. ¹⁶ Tania hehutonia te eŋere ikurus Hollum olo amehino ifwotuniere amuno iko amehino ilwahyere hohoi ta asaa ono esusuyo.