¹ Tania itai illarak hul iliboroto’to hul onyimu Hollum, ikemijyete Yesu Efahata iko Ehumani ol obolo’to al ejifatyo hohoi. ² Ifaha Yesu lya ol onyimu’to inyi ihwa ifaha nya Mose Hollum ihiji wati honyi, hul iloŋoi ahaji honyi. ³ Ati osiru akwatan jyo Yesu agalik ono Mose nyo lya ol oduho’to aji osiru inyi etahabuyo agalik aji. ⁴ Owoni asik daŋ ababo iko aduhok hosi ati lya ol oyyeu’to erre daŋ inyi Hollum. ⁵ Bwo fe igyama nya Mose ahode on oyyu ihwa apit ihiji wati Hollum itamijananiere erre hun ikyanai adi. ⁶ Ati ilettok nya Kristo on oyyu ihaji Hollum ihwa lonyi. Bwo fe era hohoi aji ania kuyya egolik hohoi jyo neyihina hohoi te eŋere many isidi. ⁷ Tania ihwa ojo nya Oloyiri ol Olibo ojo, “Kuyya al itaniŋuna tai ahana etuk honyi, ⁸ Hetagoloto atajya hatai ihwa laati hunya beryen Hul omesye’to to oŋitek hunya okemyerek isi to mur. ⁹ Okemye nya monyyatai ani Bwo igonyuni isi egyamita hoŋ ta aŋasi atomwana aŋwan. ¹⁰ Tania ittadduhye nelahaji ania ani Ette ni jaran, Isyabitai atajya hosi oŋitek daŋ Bwo fe obeŋi isi omijani ekota hoŋ. ¹¹ Tania ellama ni ta ajore ojo, Obeŋi adi isi ojiŋani iyiri hoŋ ’tuŋ.” ¹² Illarak hoŋ ihumata irrirrya, ŋadi obo owon ihiji hatai iko ataji on orroho, on obeŋ’to iruk, an itadihu’to inyi addi jyo Hollum al isu’to. ¹³ Isiŋyete illarak hatai oŋitek daŋ howoni asahyen jihatai, ŋadi obo tehiji hatai itadwa ataji honyi te eyyata hun inyobye’to. ¹⁴ Tania era hohoi mottyarak hulo Kristo al egolik hohoi jyo neyihina hohoi many isidi, inyi neyihina inya eyihi hohoi t’etteri. ¹⁵ Nyo ojori nya, “Kuyya al itaniŋuna tai ahana etuk honyi, Hetagoloto atajya hatai Ihwa laati hunya beryen hul omesye’to.” ¹⁶ Haŋai isi hul itaniŋuni ette mesyo Hollum? Arai isi hya daŋ hul ofwonni addi to Masir hul orihoro Mose. ¹⁷ Haŋai isi hul ittadduhye Hollum ta aŋasi atomwana aŋwan? Arai isi hya hul iyyauni bwo fe oyei imur. ¹⁸ Illama inyi jyo baŋai ojo, Obeŋi adi isi ojiŋani iyiri hoŋ ’tuŋ? Arai isi hya hul omesye’to. ¹⁹ Tania egonyu hohoi jo, ittallihi isi jiŋana iyiri nyo obeŋi isi iruhi.