¹ Tania oŋida hohoi ehum irrirrya erre hunya etaniŋu hohoi ŋadi hohoi ebuluhusaro addi jihosi. ² Nyo kuyya nekyanita hunya ikyanai anejelohyen arai ahode bwo fe oŋot Hollum epalita iko emesiti daŋ, ³ aŋai adi eris hohoi kuyya eha hohoi etalahuna on obolo’to ihwa ana? Nyo ittittoyo nya Hobu inyi t’etteri, bwo ihalu hya hunya itaniŋuni’to eram ana itahutani jihohoi. ⁴ Bwo ara Hollum ahetamijanani jyo nekyanita hosi te etamijanita bwo te ellillihita iko te edwariti arryai, bwo fe ara inyi ahetamijanani hosi te esyorita huno Oloyiri ol Olibo hun isyo inyi ihwa awak inyi. ⁵ Ati obeŋ adi Hollum isyo anjelohyen ilettohorik afau on ottu’to an ekyana hohoi. ⁶ Ati igyoroni jyo obo amaji ojo, “Anyo igigilo iye ta atulo, ara inyi anyo? Kuyya bu lonyi tulo, nyo ilwak iye inyi? ⁷ Iyyeu nya iye inyi do olomuta jyo anjelohyen, Isyo iye akwatan iko adwaran jihonyi. Ihanak iye inyi eleittok olo erre daŋ hunya iyyeu iye. ⁸ Ihanak iye erre daŋ iwoyo hejek honyi iniŋyere inyi.” Ninya ihanak Hollum erre daŋ iniŋyere atulo obeŋ bu inyi obusak obo ariŋ. Ati ihwania hebeŋ hohoi egonyu erre daŋ oniŋye inyi. ⁹ Ati egonyu hohoi Yesu al itamutari jyo anjelohyen to obo asaa kai jo ta amehino ono Hollum oŋida inyi oye ta aati daŋ. Ifwotu inyi akwatan iko etahabuyo nyo odihu nya inyi naye. ¹⁰ Nyo ara ania egyama on osiru jyo Hollum ol oyyeu’to erre daŋ bwo fe adanyaro inyi isi daŋ, jo oŋida inyi ihuhumak Ekyomoni olo etalahuna ol obis te ettigemita iyaŋuniere lonyirok arryai jyo akwatan honyi. ¹¹ Ara Yesu ahataliboroni hosi bwo hya hul italibori owoni isi daŋ iko Monye abotye. Te eram ania obeŋ inyi iloriri iloŋori isi illarak honyi. ¹² Nyo ojo inyi, “Etahutak adi ni afure hoi jyo illarak hoŋ. Edolo adi ni itahabuyere iye ihiji heruhok.” ¹³ Ojo inyi bwo fe, “Eyihi adi ni jyo Hollum.” Inyyak inyi ikyana ojo, “Ani olo iko aduri hul isyo Hollum jihoŋ.” ¹⁴ Tania ihwa owoni aati honyi iko ahwattek bwo nooto ottu nya inyi bwo fe rahan atulo iko ahwan ihwa hunosi, jo ta naye honyi oŋida inyi itattur etisyahani ol owon’to iko adwaran ono naye. ¹⁵ Oremik adi inyi bwo fe houna laati daŋ hul ifitani ihwa apiti to oŋitek daŋ hun hesworik isi nyo abaŋi isi naye. ¹⁶ Nyo ahode obeŋ inyi ottu ilwahyere anjelohyen ati ottu inyi ilwahyere awoi Abramo. ¹⁷ Tania oŋida inyi ottu rahan atulo al iyyalu illarak honyi te erre daŋ, jo oŋida inyi ara ehumani ol obolo’to ol owon iko amehino bwo abijon taji. Ara inyi ehumani ol obolo’to jyo illarak honyi tohosyere Hollum itimwaraniere isi t’eyyata hosi. ¹⁸ Nyo onyurak inyi adyaha te ettigemita iko te esusuta, tania oremik inyi ilwahyere hya hul onyurani esusuta.