¹ Tania, ihwa odihu nya Kristo ettigemita ihwan honyi, ijara egigilo ihwa ana hatawana jihatai jo, lya ol odihu’to ettigemita ihwan honyi, obeŋ eyyau inyyak ilettohori inyi. ² Tania to oŋitek huno harasai’to jihonyi amanya adi inyi ta awahan ono Hollum obyaŋara te ewahiti hutto hwan honyi. ³ Beryen ihaniete nya itai ewahiti huno paganohyen itatta tai daha te esomiti, te ewahiti hwattek, ta aruma, ta abala asai, te ecaforo, bwo fe iko litahabuyere arrijorihyen. ⁴ Ati ihwania illillihai paganohyen nyo ibyaŋata tai ibalati ikosi te erre hun orrohoji’to, tania ikyanai isi on orroho tetai. ⁵ Ati ofwoi adi isi lyauna hunosi jyo lya ol oŋot’to adi leswok iko layyak. ⁶ Nyo te eram ana ittittoye nya asayyo hun oyiji jyo laati ara dwo bu jyo layyak, dwadi oŋot Hollum ahwattek hosi amanyai adi isi to oloyiri ihwa Hollum. ⁷ Ilyaha esidi hirre daŋ, tania igigiloti on obis bwo fe ihumata irrirrya ahwattek hatai limojori. ⁸ Bwo fe agalik daŋ, oduloro amuno illarak hatai, nyo oremik namuno imuhonia eyyata arryai. ⁹ Olwahata illarak hatai ta amuno. ¹⁰ Ihwa ifwotuna tai esyorita ababo jyo Hollum oŋida itai ilwahata illarak hatai te esyorita hunia ihwa abusi hul oyiji’to hulo amehino Hollum. ¹¹ Al ittittoyo obo atulo, ijara inyi ittittoyo efahita huno Hollum. Al olwak obo atulo obo, ijara inyi ihanio ta agolon an isyo Hollum jihonyi, jo oŋida erre daŋ itahabuye Hollum to Yesu Kristo. Ijara akwatan iko adwaran hatawana jihonyi tulaŋ. Amen. ¹² Itai hul amuno ni hellillihati te ettigemyo on obolo’to on owon ihiji hatai ikemyere itai ihwa idwoŋi erre hun olufaji’to jihatai. ¹³ Ati omunoti al irryahati tai iko Kristo te ettigemita honyi, bwo fe imunoti adi itai agalik ta aleyo ono akwatan honyi. ¹⁴ Oŋida itai imunoti al omorye laati itai ta afure Kristo nyo itoŋo Oloyiri olo akwatan jihatai, inyi Oloyiri olo Hollum. ¹⁵ Helaha obo alatai odihu ettigemyo ta attohyo, kuyya bu ta ahoho, kuyya ta arrohoji, kuyya te edyefer. ¹⁶ Ati kuyya odihu obo ettigemyo ta arahan honyi aheruhoni hetebyaŋa inyi iloriri, ati ijara inyi itahabuyo Hollum ta afure Kristo. ¹⁷ Nyo idwoŋ asaa an itteryere Hollum ŋocere aati honyi. Bwo fe kuyya itteryo inyi ikohoi, anyo adi esidi ono hya hul obeŋi’to oniŋye asayyo hun oyiji huno Hollum? ¹⁸ Ojori egyerita, “Al agol bebe italahuniere abisak, Ehan ’tadi aŋai jyo hul otimoi’to Hollum iko leyyak?” ¹⁹ Tania ijara hya hul odihuni’to ettigemyo ta awahan Hollum heteyihiniehe atajya hosi jyo lya ol oyyeu’to isi bwo fe hetehaniehe on oyyu.