¹ Aŋorwo, ifahati habiak hatai jo dwadi obeŋi isi oniŋye nekyanita huno Hollum ofwonni adi isi iruk, obyaŋara ta nekyanita ati te ehanita huno aŋorwo hosi, ² nyo igonyuni isi ehanita hatai hun oyiji iko aniŋyo hatai. ³ Ijara aŋorwo obeŋi igigiloi te elamani hosi, ta ayeo hofir, kuyya aŋata ta ayyel, kuyya bu ta aboŋojin, ⁴ ati ijara atajya hosi ilamani ta anyalami iko abiji nyo odulo adi elamani ana fur bwo fe itamuno Hollum. ⁵ Nyo nya beryen iyihitai aŋorwo hun oyiji jyo Hollum ette iyyafana elamani ihwa ania. Ifahai isi bwo fe habiak hosi. ⁶ Ifaha nya Sara Abramo te ekoi ana bwo iloŋo inyi Abramo hobu. Irata adi itai ŋarryok Sara al ihaniete tai on oyyu ati obyaŋara ta abaŋi. ⁷ Bwo fe habiak, amanyati iko aŋorwo hatai to ofyoro bwo fe irrirryu aŋotte ihwa atulo on ofyaha’to nyo irata tai daŋ aharutak huno amehino ono nesu. Al ihaniete tai ihwania obeŋi adi itihi emojiti hatai jyo Hollum. ⁸ Te ettubit itoŋoti daŋ te egigilo abotye, omehiniete, omunoti illarak, itoŋoti ta atajya hun anyalami iko egigilita hun obeŋi itadarai. ⁹ Hehaniete on orroho jyo hul itarrohojye’to itai, hemoryete hun omorye’to itai, ati omunoti isi nyo iloŋoi itai irutaniere ayiji. ¹⁰ Nyo igyoroni igyerita, “Lya al awak’to inyuraniere ayiji ta nesu ana Bwo fe igonyuniere oŋitek hun oyiji, Ijara inyi itik arrohoji to ŋadyef honyi Iko enyobyo to hutuk honyi. ¹¹ Ijara inyi oyito addi jyo arrohoji ette ihanio ayiji. Ijara inyi ottifya nelik taji inefuniere inyi. ¹² Nyo igonyuni oŋite huno Hobu abisak Bwo fe itaniŋuni ayyaha honyi emojiti hosi, Ati ijorya omom Hobu jyo laati hul ihanie arrohoji.” ¹³ Ŋai ol oremik’to itarroho itai al ijifatyete tai te efiriwa erre hun oyiji? ¹⁴ Ijara itai imunoti dwadi inyurana tai ettigemyo te ehanita hatai hun oyiji. Hebaŋata eŋerejanio hosi bwo fe helafuhoti. ¹⁵ Ati itahabuyete Kristo itajya hatai ihwa Hobu. Ihumata itarraŋ ta asahyen daŋ jyo hul ifiye’to itai te eram ono neyihina on owon’to itwajin hatai. Ikyanati jihosi ta anyalami iko ta abaŋi, ¹⁶ bwo fe ta atajya hun oyiji’to, jo dwadi omorye isi itai, iloririji adi amorok hulya ta amanya hatai on obis’to itwa Kristo. ¹⁷ Al ittigemye laati itai te ehanita hatai hun oyiji, oyyu ana agalik ettigemyo hosi itai te ehanita hatai hun orrohoji, kuyya ara ana awahan ono Hollum. ¹⁸ Nyo odihu nya Kristo ettigemita ette ye enyyahi abotye te eyyata iyaŋuniere hohoi jyo Hollum. Oye labisani ta leyyak. Oye ahwan honyi ati isu oloyiri honyi. ¹⁹ Bwo alo nya Kristo to oloyiri honyi ittittoyere oloyirihyen hutto babus. ²⁰ Isi laati hinya omesye’to bwo odihu Hollum isi fur to oŋitek huno Noa ol oduho’to atogol. Italahuni nya laati hun omutari’to to hari, arai isi laati hottohunik ijai. ²¹ Ara ana etamijani ono batisimo an italahu itai, ta nebuhuna ono Yesu Kristo. Obyaŋara ana te ellillayo ono eboti hwan, ati itahutak inyi ataji on ottifya’to Hollum inyuraniere alibori. ²² Acaharu nya Kristo lidou ati ihwania itoŋo inyi oŋyatai Hollum, bwo fe oniŋye inyi anjelohyen iko abolok bwo edwariti.