¹ Tania obusana aliwa daŋ iko enyobita daŋ, agesemita, ahaini, bwo fe amwaŋa daŋ. ² Ihwa awahi olodolyo ale, itai bwo fe ottifyati ale hun olibori’to huno oloyiri jo oŋida itai iboboloroti jyo etalahuna, ³ nyo imijana tai amehino ono Hollum. ⁴ Ifwanna jihonyi al ara’to Amorwo an isu’to inya ihari laati ati onyimu Hollum inyi ette muno inyi. ⁵ Itai bwo fe, irata tai amorwoi hun isui’to hun oduhorik naji ono oloyiri. Bwo fe irata tai ehumak hul olibori’to, hul isyori ehumita huno oloyiri hun osiruni jyo Hollum to Yesu Kristo. ⁶ Nyo igyoroni igyerita ojo, “Imijyete, ehanak ni amorwo etteri lohitir imiji Sion, Inyi amorwo on onyimuni on oyyu’to agalik, Bwo lya al iruk’to jihonyi obeŋ adi iloriri ’tuŋ.” ⁷ Itai hul iruhoto’to, oyyu inyi jihatai agalik, ati jyo hya hul ihari’to ikyanai egyerita jo, “Amorwor ninya ihari aduhok, Ottu ratan etteri lohitir.” ⁸ Bwo fe igyoroni igyerita, “Ara inyi amorwo an itikosyo’to laati Iko nebak an itakwahyo’to laati.” Ikosoroi laati nyo omesye isi nekyanita Hollum nyo onyimuni isi ihaniere. ⁹ Ati irata tai awoi wati hul onyimuni, hul arai’to ehumak hulo Hobu. Irata tai eluluŋ wati hul olibori, hul arai’to awati Hollum luŋa, jo oŋida itai italeyehina ehanita hun obolori huno lya al iloŋo’to itai t’edumele many jyo afaŋan honyi on oyyu’to bebe. ¹⁰ Beryen irata nya itai awati asai, ati ihwania irata tai awati Hollum. Beryen ibyaŋata nya itai amorwoAra amorwo ania Kristo. inyurana amehino, ati ihwania inyurana tai amehino. ¹¹ Itai hul amuno ni, elolya ni jihatai hul irata’to ewatak iko atamonok jo oŋida itai ihara ewahiti huno ahwattek hatai nyo orrem erre hunia iko oloyirihyen hatai. ¹² Amanyati on osiru ihiji paganohyen, jo dwadi ikyanai isi on orroho tetai, igonyuni adi isi ehanita hatai hun oyiji ette isi itahabuyo Hollum iholoŋ on ottuniere inyi. ¹³ Ta afure Hobu oniŋyete okumahyen daŋ huno laati ara dwo bu jyo hobu al ara’to eleittok, ¹⁴ kuyya bu jyo mandiri hul ifahini ibahyere arrohojak bwo fe ilwahyere ayijok. ¹⁵ Nyo ara awahan ono Hollum tetai jo te ehanita hatai hun oyiji’to iremehina tai itadwayere abuyaŋak hul otimoi’to erre. ¹⁶ Amanyati ihwa laati hul ohohini bwo hemuhonia arrohojita hatai ta ahohina hatai, ati amanyati ihwa apiti hulo Hollum. ¹⁷ Itahabuyete laati daŋ. Omunoti illarak hulo eklesya. Abaŋata Hollum. Itahabuyete hobu olo okuma. ¹⁸ Apiti, ifahati ta abaŋi eleittaha hatai hul oyiji’to iko hul anyalami’to ati ifahati bwo fe eleittaha hul orrohoji’to. ¹⁹ Nyo oyyu ana al odihu atulo te eram ono Hollum ettigemita hun obeŋi osiruni jihonyi. ²⁰ Tani ati ayiji al idihuna tai ettigemita iko abahyo te eyyata hatai? Ati kuyya inyurana tai abahyo te ehanita hatai hun oyiji bwo idihuna tai ettigemita hunia, oyyu ana ihosyere Hollum. ²¹ Inyi ana inya iloŋunierek itai, jo odihu nya Kristo ettigemyo tetai isyaraniere etamijani jihatai ijifatyere. ²² Inyi alya ol obeŋ nya iyyau bwo fe obeŋ obo enyobyo to hutuk honyi. ²³ Al omorye laati inyi obeŋ inyi omoru isi. Al ittigemye isi inyi obeŋ inyi ikyana, ati iyihi inyi jyo aŋotoni ol obis’to. ²⁴ Inyi alya ol odihu nya eyyata hohoi ta ahwan honyi ihitoi jo oŋida hohoi eye jyo eyyata ette manya ihaniere alibori. Ta atoŋos honyi inyurana tai aŋidari. ²⁵ Isyabara nya itai addi ihwa akyoro, ati ihwania icohuniete tai jyo Leyyahani iko Errirryani olo oloyirihyen hatai.