¹ Tania ettittoyo ni itai amarwak klesya. Ara ni amarwani klesya ikatai, bwo fe etamijanani olo ettigemita Kristo. Bwo fe erryaha adi ni iko akwatan on oleyo adi. ² Irrirryati anyanya Hollum hun isyori jihatai irrirryari. Ihaniete ta awahan hatai ihwa awak Hollum, on obeŋ ara ta arrosonia kuyya bu ta agurusi ati ta amuno. ³ Helettohoti ta agolon laati hul isyori jihatai irrirryari, ati irata ahetamijanak jihosi. ⁴ Al aleyo Leyyahani Eleittok’on ifwotuna adi itai egorya ono akwatan an ilaman an iyyafaniere ihou bwo odulo adi inyi fur. ⁵ Bwo fe itai monyomiji, oniŋyete jyo amarwak hatai. Bwo itai daŋ luŋa, iyyafana anyalami ilwahyere illarak hatai, nyo ojori igyerita, “Iha Hollum etadarak ati omehino inyi jyo anyalamak.” ⁶ Itamutarata ahwattek hatai ihosyere Hollum bwo itadet adi inyi itai ta asaa honyi. ⁷ Isyatta ehawwata hatai daŋ jihonyi nyo omuno inyi itai. ⁸ Ihumata mijo, ihumata ’ra, nyo oretya amyotononi hatai, al ara’to ahetisyahani, ihwa elemye al amala’to ittifyari lya ol oremik inyi hony. ⁹ Ihara inyi ta agolon ono neruk hatai, nyo imijana tai jo owoni ettigemita ihwa hunia jyo illarak hatai hul owoni ifau. ¹⁰ Ati itabisak adi Hollum olo amehino daŋ itai ta ahwan honyi. Itagolyo inyi itai bwo fe itawoj inyi itai al attuhuno ettigemyo hatai. Inyi Hollum inya iloŋo’to itai jyo akwatan honyi on odulo’to fur to Kristo. ¹¹ Ijara adwaran hatawana jihonyi fur tulaŋ. Amen. ¹² Egyorok ni jihatai kai ta naani Silivano bwo amijak ni jo ara inyi illa hohoi ol obi hwan. Egyorok ni isiŋyere itai bwo fe itamijaniere itai jo ara ana amehino ono Hollum ahode. Owotyati on ogol tenyi. ¹³ Itifonya aŋottet on owon’to imiji Babolona itai. Onyimuni nya inyi ikatai. Bwo fe itifonya lonyi hoŋ Marko itai. ¹⁴ Itifonyana illarak hul owoni’to ihiji hatai ta namuno. Ijara nelik tajya hatawana jihatai daŋ hul iwanata’to itwa Kristo.