¹ Ani lefahata. Abeŋ ni ara apit olo obo atulo. Egonyu nya ni Yesu Hobu hohoi bwo fe irata tai egyama hoŋ to Hobu. ² Kuyya abeŋ ni ara alefahata jyo omuk, ati jihatai ara ni alefahata nyo irata tai etamijani hoŋ ono egyama hoŋ to Hobu. ³ Ara ana etarraŋi hoŋ jyo hul awahi’to itisyahyo ani. ⁴ Abeŋ so ni aremik ŋiyo bwo amata? ⁵ Kuyya ayama ni aŋotte, abeŋ so ni aremik iyaro inyi ta adaha hoŋ ihwa ihanie lefahat omuk iko illarak Hobu bwo Kefa? ⁶ Oŋida ani iko Barnaba hama egyama ta agurusi itamanyere ahwattek hohoi? ⁷ Ŋai al igyama’to egyama ono oseŋer bwo inyi inyyaŋa erre honyi ta agurusi honyi? ŋai ol oromo’to amana bwo obeŋ oŋiyo ema hwa? ngai al iyyahatyo anyanya bwo obeŋ amata ale hosi? ⁸ Abeŋ ni ekyana ihwa igigiloi laati hama. Obeŋi so igyoroni erre huna ifahita? ⁹ Nyo igyoroni ifahita huno Mose ojo, “Hefitata etuk hiteŋ al igisa’to ema.” Igigilo so Hollum te esuŋ hama? ¹⁰ Obeŋ so honyi ikyana ihwania tohohoi? Afe, tohohoi igyoroni ihwania nyo jo oŋida lya ol oromo’to hotoromoi te eyihina bwo fe lya al igisa’to hetegisai te eyihina jo ifwotu adi inyi. ¹¹ Kuyya ettiyenio hohoi erre huno oloyiri jihatai, ara inyi eram on obolo al efwotu hohoi erre huno ahwattek to has hatai? ¹² Kuyya ifwotuni ettiyanak omuk erre huna jihatai, ebeŋ adi hohoi eremik ifwotuna agalik? Ati ebeŋ hohoi ettifya omuk erre jihatai. Edihu hohoi erre daŋ jo oŋida hohoi ebeŋ etik asayyo huno Kristo. ¹³ Ibyaŋata tai imijana jo hul igyamai egyama ihaji imojit eneittok ifwotuni aŋiyo hosi teyya? Bwo hul igyamai’to itityek ono ehuma aharani ehumita jihosi iŋiyere? ¹⁴ Ihwania ifak nya Hobu jo hul ittiyenie asayyo hun oyiji, ifwotuni adi isi erre huno ahwattek hosi ta asayyo hun oyiji. ¹⁵ Ati abeŋ nya ni eyaro omuk erre bwo abeŋ ni egyoro erre huna ifwotuniere omuk erre. Nyo oyyu jihoŋ iyeri ta ahure, ŋadi obo atulo itafyaha etahabuyo hoŋ asai. ¹⁶ Nyo kuyya ettittoyo ni asayyo hun oyiji abeŋ ni aremik itadara nyo inef Hollum ani ittittoyere. Tania orroho jihoŋ bebe kuyya abeŋ ni ettittoyo asayo hun oyiji. ¹⁷ Nyo kuyya ettittoyo ni ta awahan hoŋ owon edumit hoŋ, ati dwadi abeŋ ni awak ettittoyo oŋida ani egyama egyama ana. ¹⁸ Anyo adi edumit hoŋ? Ara ihwania jo, amuno ni ittittoyo asayyo hun oyiji ta abyaŋan idumit, dwadi aremik ni ifwotuna edumit te egyama hoŋ. ¹⁹ Dwadi ohohi Hollum ani to homomite wati, esyarak ni ahwan hoŋ ihwa apit jyo laati daŋ, jo oŋida ani arrehu hul omuk agalik. ²⁰ Jyo laati Yudea ara ni ihwa Ayudetanani jo oŋida ani arrehu omuk hulo Yudea. Jyo hul adahai te efahita, adaha ni bwo fe te efahita dwadi obeŋi ifitani ani te efahita jo oŋida ani arrehu hul adahai te efahita. ²¹ Jyo hul obeŋi omijani efahita adaha ni ihwa atulo ol obeŋ’to omijak efahita, dwadi amijak ni efahita nyo adaha ni te efahita Kristo, jo oŋida ani arrehu hul obeŋi’to omijani efahita. ²² Jyo laati hul ilihi attu ni rahan ihwa al elik, jo oŋida ani arrehu hul ilihi’to. Attu ni rahan ihwa aati daŋ te erre daŋ jo oŋida ani etalahu hul omuk. ²³ Ehanio ni erre daŋ ilwahyere asayyo hun oyiji jo oŋida ani iko hul iruhi’to eŋiŋarak emuniti daŋ. ²⁴ Ibyaŋata tai imijana jo al arracari omuk laati oŋeri isi daŋ ati irwat abotye bwo ifwotu inyi esyoryo honyi? Oŋyoroto bebe jo oŋida ifwotuna tai esyoryo. ²⁵ Laati daŋ hul oŋeri’to, irrirryai isi ahwattek hosi te erre daŋ. Ihanie isi ihwania ifwotuniere edumit on otuhuno adi, ati jihohoi owon edumit an arasa’to fur. ²⁶ Tania te eram ania abeŋ ni aŋer asai. Abeŋ ni aluhyo ihwa atulo ol oluhyo’to oyyami asai. ²⁷ Ati abak ni ahwan hoŋ bwo ette hanana inyi apit hoŋ, ŋadi ihalu ettittoyo hoŋ laati omuk, iha Hollum ani.