¹ Ihwania ekyana ni te eram ono eriŋo an isyori laati te ehuma jyo arrijorihyen. Emijak hohoi jo ewon hohoi daŋ iko ofyoro, bwo iyaŋunie ofyoro etadara ati iyaŋuno amuno agolon tajya. ² Kuyya igigilo obo atulo jo amijak inyi erre daŋ ati hobeŋ inyi omijak on oyyu ahode. ³ Ati kuyya omuno obo atulo Hollum omijak Hollum atulo alya. ⁴ Tania te eram ono ahonya eriŋo an isyori te ehuma jyo arrijorihyen, emijak hohoi jo obeŋi arrijorihyen arai a Hollum nyo ara Hollum abotye hama. ⁵ Ati owoni omuk erre idou iko lifau hun iloŋoi laati ajohin, owoni bwo fe ajohin arryai iko hobwok arryai. ⁶ Ati jihohoi owon Hollum abotye inyi Monye, bwo fe jihonyi ofwonni erre daŋ bwo esu hohoi tenyi. Owon bwo fe Hobu abotye inyi Yesu Kristo bwo esu hohoi iko erre daŋ tenyi. ⁷ Ati obeŋi laati daŋ omijani erre huna, bwo omuk hulosi hul iruhi nya jyo arrijorihyen ohonyai isi eriŋo ihwa ara inyi ehuma jyo ajok al isu’to, bwo itarrohoji isi atajya hosi nyo obeŋ agolon jihosi. ⁸ Ati obeŋ Hollum ifwotu hohoi te eram ono aŋiyo. Obeŋ orroho kuyya eŋiyo hohoi bwo obeŋ orroho kuyya ebeŋ hohoi eŋiyo. ⁹ Ati ihumata ŋadi egigilita ihwa huna itipalari obo ol obeŋ’to iko agolon. ¹⁰ Nyo kuyya igonyu obo atulo illanyi al ilofyoro, itoŋo iteremeja ihaji ono arrijori ottu adi inyi bwo fe ihonyari eriŋo an isyori jyo arrijori, ati ikuyya adi inyi ta ataji honyi. ¹¹ Tania itarroho amijana hoi atulo alya ol obeŋ iko agolon, bwo ara inyi illa hoi nyo oye nya Kristo tenyi. ¹² Tania ta neyyau hoi jyo illarak hoi bwo fe te etarrohojo hoi atajya hosi hun obeŋi ogoli, iyyau iye jyo Kristo. ¹³ Tania kuyya itipal eriŋo illaŋ, abeŋ adi ni enyyak honya eriŋo ’tuŋ, ŋadi ani etipal illaŋ.