¹ Ihwania ekyana ni te erre hunya igyoroti tai jihoŋ. Oyyu al obeŋ atulo ayama aŋotte. ² Ati ihanie laati arryai erre somon tania oŋida aati ababo ayamai aŋorwo ababo bwo oŋida aŋorwo owoni iko habiak hosi ababo. ³ Oŋida habi isyo jyo ŋorwoi honyi erre hun osiruni jihonyi bwo fe ŋorwoi isyo jyo habi honyi. ⁴ Nyo obeŋ ŋorwoi ilettohori ahwan honyi ati ara habi eleittok honyi. Bwo fe obeŋ habi ilettohori ahwan honyi ati ara ŋorwoi eneittok. ⁵ Hehara enosonia ahwattek hatai do arari al iruhoto tai arabotye isyoryere ahwattek hatai ta amojo, ati ihalu inyyahata inosonia ahwattek hatai ŋadi Sitan isusuyo itai. ⁶ Ekyana ni ihwania nyo aŋatak Hollum ani ikyanari ati obeŋ ara efahi. ⁷ Hara dwo arai laati daŋ ihwo ani amuno dwo ni. Ati owoni laati daŋ iko esyorita hosi hun olufaji hun isyo Hollum jihosi ababo. ⁸ Ati ajo ni jyo hul obeŋi’to ayamai iko obiloŋi, oyyu itoŋori abotye ihwa ani. ⁹ Ati kuyya obeŋi isi oremehini itoŋori ababo oremehini isi yama. Oyyu ayama agalik itoŋori te ewahiti huno ahwan. ¹⁰ Ati jyo hul ayamai’to esyo ni efahi, obyaŋara ani esyo ati Hobu isyo, jo oŋida aŋotte obeŋ opyaharo jyo habi honyi. ¹¹ Ati kuyya opyahai isi ijara inyi itoŋo abotye arari al acaharo inyi jyo habi honyi. Bwo fe oŋida habi obeŋ opyaharo jyo ŋorwoi honyi. ¹² Bwo fe jyo hul omuk ekyana ni, obyaŋara Hobu ikyana, jo kuyya owon obo iko ŋorwoi on obeŋ’to iruk jyo Yesu bwo iruk ŋorwoi itoŋori ikonyi oŋida inyi obeŋ opyaharo jihonyi. ¹³ Kuyya owon obo aŋotte iko habi ol obeŋ’to iruk jyo Yesu bwo awak habi amanya ikonyi, helaha aŋotte opyaharo jihonyi. ¹⁴ Nyo alle ol obeŋ’to iruk jyo Hollum itaniŋu adi jyo ŋorwoi honyi, bwo fe labeŋ ŋorwoi iruk itaniŋu adi inyi jyo habi honyi. Kuyya opyahai isi obeŋi adi aduri hosi itaniŋuni eram Hollum, ati abeŋi isi opyahai itaniŋuni isi. ¹⁵ Ati kuyya lawak lya ol obeŋ’to iruk jyo Yesu apyaha, ijara inyi hetelo. Ihwo jo eruhoni, kuyya ara inyi aŋotte kuyya alle, oŋida inyi obeŋ orrosok ebotye itoŋori ikonyi nyo iloŋo Hollum hohoi itoŋori ta nelik tajya. ¹⁶ Aŋotte, imijak iye hara bwo hetalahu adi iye habi hoi? Alle, imijak iye hara bwo hetalahu adi iye ŋorwoi hoi? ¹⁷ Ijara laati daŋ adahai ihwa aharak Hobu jihosi idahari bwo fe ihwa iloŋo Hollum isi. Ara ana efahi hoŋ iklesyahyen daŋ. ¹⁸ Kuyya iloŋo Hollum obo atulo inya oŋoto’to,x helaha lya igigilo jo orroho aŋoto. Kuyya iloŋo Hollum obo atulo olo hobeŋ’to oŋoto, helaha inyi ottifya aŋoto. ¹⁹ Nyo ara aŋoto ariŋ asai bwo fe abyaŋan ŋoto ara ariŋ asai, ati lifahari jyo efahita huno Hollum ara ariŋ on obolo. ²⁰ Ijara laati daŋ odulori manya ihwa amanyai nya isi iholoŋ an iloŋori Hollum isi. ²¹ Kuyya ira nya iye apit iholoŋ inya iloŋori Hollum iye, obeŋ eram. Ati kuyya owon asiruna miji jihoi ihouniere ahwan hoi oyyu ifwotuniere ahohina. ²² Nyo apit al iloŋo Hobu, ara inyi ihwa ol ohohino’to jyo Hobu; bwo ol ohohino al iloŋo Hollum, ara inyi apit olo Kristo. ²³ Inyyaŋuni nya itai te edumit tania heyitoti irari apiti wati. ²⁴ Tania illarak hoŋ, oŋida itai daŋ ababo iduloro manya ihwa imanyati nya itai iholoŋ an iloŋorik itai, bwo oduloro jyo Hollum. ²⁵ Ihwania te eram ono nodwo hun hobeŋi ayamai, obeŋ Hobu isyo ani obo efahi ati eramak ni itai egigilita hoŋ, nyo efwotu nya ni amehino ono Hobu ikyanari on obis. ²⁶ Egigilo ni te eram ono ettigemita hun ofwonni’to, oyyu kuyya odulo atulo ihwa owon inyi. ²⁷ Kuyya iyamuna tai aŋorwo hettifyati apyaha. Kuyya hebyaŋata tai iyamati hettifyati aŋorwo. ²⁸ Ati kuyya iyamati tai obeŋ ana ara eyyau. Bwo fe kuyya obo ayama odwoti obyaŋara ana eyyau. Ati hul ayamai owoni adi iko ettigemita huno afau, bwo ajo ni etik ettigemita jihatai. ²⁹ Illarak hoŋ ajo ni jo omutari oŋitek. Tania ijara hul ayama’to amanyai ihwa obeŋi isi ayamai. ³⁰ Ijara hul atarihai’to amanyai ihwa obeŋi isi atarihai bwo fe hul omunoi’to ihwa obeŋi isi omunoi. Ijara asamak amanyai ihwa atulo ol obeŋi hirre, ³¹ bwo hul opocouni erre hutta fau ana, ijara hawanahi ihwa obeŋi isi opocouni hirre. Nyo otuhuno adi afau ana. ³² Awak ni jo oŋida imanyati tai ta abyaŋan ihawwa. Atulo ol obeŋ’to ayama igigilo inyi te erre huno Hobu iko te ekoi itamunoyere Hobu. ³³ Ati al ayama’to igigilo inyi te erre huno afau nyo awak inyi itamuno ŋorwoi honyi. ³⁴ Tania igigilo inyi te erre arrihai. Ati aŋotte an hobeŋi oyemuni kuyya bu odwoti, igigiloi isi te erre huno Hobu bwo ottifyai isi imanyari hun olibori ta ahwattek hosi iko oloyirihyen hosi. Ati aŋotte on oyemuni igigilo te erre hutta fau nyo awak inyi itamuno habi honyi. ³⁵ Ekyana ni ihwania ilwahyere itai obyaŋara itihotyere itai, nyo awak ni itai imanyati on obis itamunoyere Hobu bwo fe igyamari jihonyi ta ataji abotye. ³⁶ Ati kuyya igigilo obo atulo jo ehanio inyi on orroho jyo ŋarri honyi nyo allaŋi aŋasi honyi, ijara inyi ihanio ihwa awak inyi bwo haŋatak odwoti iruhori lya al awak inyi. Obeŋ ana ara eyyau. ³⁷ Ati kuyya onyimu monye hito ta ataji honyi, obyaŋara te esuswa ati ta awahan honyi jo oŋida ŋarri honyi obeŋi ayamai, ihanio inyi on oyyu bwo fe. ³⁸ Tania lya al isyo ŋarri honyi oyemuni ihanio on oyyu, ati lya ol obeŋ isyo ŋarri honyi oyemuni ihanio on oyyu agalik. ³⁹ Itihok efahi aŋotte jyo habi honyi al hesu inyi, ati kuyya oye habi honyi oremik inyi iruk obo al awak inyi kuyya ara alya Akristyani. ⁴⁰ Ati egigilo ni jo omuno adi inyi agalik kuyya itoŋo inyi ahania, bwo egigilo ni jo ara ana awahan ono Oloyiri olo Hollum.