¹ Kuyya owon obo atulo iko obo eram jyo illanyi, aŋai, obeŋ inyi abaŋ ilari ilokiko ihosyere wati hul orrohoji, obyaŋara jyo laati Hollum? ² Ibyaŋata tai imijana jo arai laati Hollum ahaŋotok fau? Bwo kuyya iŋocete adi itai afau, ittallihoto tai ŋoco erre hun omutari’to? ³ Ibyaŋata tai imijana jo era hohoi ahaŋotok hulo anjelohyen? Tania ebeŋ so hohoi eremik ŋoco erre huno nesu ana? ⁴ Tania kuyya owoni erre ihiji hatai, nyo ifwatta tai jyo laati hutto let iŋocere? ⁵ Ekyana ni ihwania itiloririjyere itai. Obeŋ obo al ilofyoro tehiji hatai ol oremik’to ŋot erre tehiji hatai? ⁶ Ati itiwwahyo illa illanyi, bwo ara ana ihosyere wati hul obeŋi’to iruhi. ⁷ Ati orroho bebe al iwanata tai iko olokikohyen ihiji hatai. Nyo ibyaŋata tai idihuna arrohoji? Nyo ibyaŋata tai idihuna enyobyo? ⁸ Ati itai ta ahwattek hatai ihaniete tai on orroho jyo illarak hatai bwo inyobyete tai isi. ⁹ Ibyaŋata tai imijana, jo obeŋi adi laati hul orrohoji’to orutani olobye ono Hollum? Ati henyobyete atajya hatai. Obeŋi adi laati hul ihanie erre somon, kuyya hul itahabuye arrijorihyen, kuyya arotok, kuyya afarak, ¹⁰ kuyya ahahalak, kuyya hul adayai’to erre daŋ, kuyya arumak, kuyya hul omorye laati, kuyya ahorok, obeŋi adi isi orutani olobye ono Hollum. ¹¹ Bwo omuk hulatai ihanie nya erre huna. Ati illilla nya Hollum itai, bwo ittaŋu inyi itai bwo ihenio inyi itai ahabisak ta afure ono Hobu Yesu Kristo bwo fe to Oloyiri olo Hollum hohoi. ¹² Aremik ni ihanio erre daŋ ati obeŋi isi daŋ olwahye ani. Aremik ni ihanio erre daŋ ati abeŋ ni awak rahan apit hosi. ¹³ Ara aŋiyo to ohe bwo ohe ta aŋiyo ati itabeŋ adi Hollum isi daŋ arrihai. Obeŋ ahwan ara te erre somon ati ara inyi ono Hobu, bwo Hobu tenyi. ¹⁴ Itubuhu nya Hollum Hobu bwo fe itubuhu adi inyi hohoi ta adwaran honyi. ¹⁵ Ibyaŋata tai imijana jo arai ahwattek hatai aŋaco huno Kristo? Eduhu ati ni aŋaco huno Kristo ette inosonia isi iko huno asomok Obeŋ ’tuŋ. ¹⁶ Ibyaŋata tai imijana jo lya al inosoi’to iko asomoni arai isi ahwan abotye? Ojo Hollum, “Ofwonni adi isi arrihai rahan ihwa ahwan abotye.” ¹⁷ Ati lya al inosoi’to iko Hobu arai isi ihwa oloyiri abotye. ¹⁸ Ofuhoti jyo erre somon addi. Ati eyyata hun omuk daŋ hun ihanio atulo obeŋi isi arai ahuno ahwan, ati lya al ihanio erre somon iyyau inyi jyo ahwan honyi luŋa. ¹⁹ Ibyaŋata tai imijana jo arai ahwattek hatai asik hun olibori huno Oloyiri ol Olibo ol owon itwajin hatai al isyo Hollum jihatai? Obeŋi ahwattek hatai arai ahunatai, ²⁰ nyo inyyaŋuni nya itai te edumit. Tania itahabuyete Hollum ta ahwattek hatai.