¹ Illarak hoŋ, abeŋ ni awak itai itimoti jo, adahai nya monyye hohoi daŋ iwoyo idis bwo allaŋi isi daŋ te ehiji hari. ² Ibatisye nya isi daŋ te edis iko aari ijifatyere Mose. ³ Oŋiye isi daŋ emune ono oloyiri, ⁴ bwo amatai isi daŋ aari huno oloyiri. Nyo amatai isi daŋ te ebak ono oloyiri an ijifatyo’to isi bwo ara nya ebak ania Kristo. ⁵ Ati obeŋi nya omuk hulosi arryai itamunoi Hollum bwo itattur inyi isi to mur. ⁶ Arai erre huna ihwa iramani nya jihohoi jo oŋida hohoi ebeŋ epolo ihaniere eyyata ihwa opolori nya isi. ⁷ Bwo fe helaha hohoi etahabuyo arrijorihyen ihwa ihanie nya omuk hulosi. Nyo igyoroni igyerita jo, “Itoŋoi laati iŋiyere bwo imatari ette isi dyoto ihyari itahabuyere arrijori.” ⁸ Oŋida hohoi ebeŋ ehanio erre somon ihwa ihanie nya omuk hulosi bwo to oloŋ abotye oyei isi alif atomwana arrihai hohunihoi. ⁹ Helaha hohoi bwo fe ekemyo Hobu ihwa ihanie nya omuk hulosi attati amunok ’tohoro isi. ¹⁰ Helaha hohoi eŋuŋunita jyo Hollum ihwa ihanie nya isi bwo ottoho attohoni isi. ¹¹ Ihanie nya erre huna jihosi te etamijani iramyere hohoi, bwo igyoroni igyerita isiŋyere hohoi, nyo ilyaha esidi fau. ¹² Tania ijara lya al igigilo’to jo awotya inyi, ihum irrirrya ŋadi inyi okwaharo. ¹³ Obeŋ obo esusuyo ottu jihatai an agalik agolon wati, ati obis Hollum bwo obeŋ adi inyi aŋatak obo esusuyo ottu jihatai an agalik adi agolon hatai, ati al attu obo esusuyo isyo adi inyi jihatai obo ekoi irisari jo oŋida iremehina tai idihuna. ¹⁴ Tania, itai hul amuno ni, ofuhotyete etahabuyo ’rijorihyen. ¹⁵ Ekyana ni jihatai ihwa laati aloferejok. Oŋocete ekyanita hoŋ ta ahwattek hatai. ¹⁶ Al etahabuyo hohoi Hollum ta akos ono emuniti,y? ebeŋ so hohoi erryaha iko Kristo ta nooto ono naye honyi? Bwo al ebeny hohoi emune, ebeŋ so hohoi erryaha iko Kristo ta ahwan honyi? ¹⁷ Dwadi elwaja hohoi era hohoi ihwa ahwan abotye nyo owon emune abotye bwo eŋiyo hohoi emune ania. ¹⁸ Imijyete laati Israele. Obeŋi so laati hul oŋiye ehumita orryahai arabotye te eram ono etityek? ¹⁹ Anyo awoyo hiram? Ara aŋiyo an isyori te ehuma jyo arrijorihyen ariŋ on odwa’to? Kuyya arrijori, ara inyi ariŋ an isu’to? ²⁰ Obeŋ. Ati ajo ni jo, isyorye paganohyen ehumita jyo ajohin bwo obyaŋara jyo Hollum, tania abeŋ ni awak itai irryahati iko ajohin. ²¹ Ibyaŋata tai iremehina matari ta akos ono Hobu iko ta akos ono ajohin. Ibyaŋata tai iremehina ŋiyo iteremeja ono Hobu iko iteremeja ono ajohin. ²² Ettadduhyo so hohoi Hobu iloŋojitari? Egol hohoi egalik inyi? ²³ Oremehini laati ihaniere erre daŋ ati obeŋi erre hunia olwahye isi. Oremehini laati ihanio erre daŋ ati obeŋi erre hunia itaboloruni isi. ²⁴ Helaha obo ottifya erre hun oyiji ta ahwan honyi hama, ati oŋida inyi ottifya erre hun oyiji te illanyi. ²⁵ Oŋiyete erre hun itinyyaŋai laati isuk bwo te eram ono atajya hefiyete jo ofwonni isi tai. ²⁶ “Nyo ara afau daŋ ahono Hobu iko erre daŋ hun owoni’to dia.” ²⁷ Kuyya ojo obo jihatai ol obeŋ’to iruk, Ifwanna eŋiyo, bwo iwahata tai fwatan iŋiyere ikonyi, oŋiyete erre hun isyo inyi jihatai bwo hefiyete jo iyaŋunie isi tai te eram ono atajya. ²⁸ Ati kuyya ojo obo jihatai, Isyori dwo ana te ehuma, heŋiyete, te eram ono lya al iramak’to itai bwo te eram ono atajya. ²⁹ Obyaŋara ta atajya hatai ati ta ataji ono lya al iramak’to itai. Ati ifiyete tai jo, Nyo oŋida hohoi ebusak ehanio erre hun igigilo obo itaji honyi jo orrohoji isi? ³⁰ Kuyya eŋiyo hohoi ta ahumo, nyo omoryo obo hohoi te erre hun eŋiyo hohoi ta ahumo? ³¹ Tania kuyya iŋiyete tai kuyya bu imatati bwo fe te erre daŋ hun ihaniete tai ihaniete itahabuyere Hollum. ³² Hehaniete obo ariŋ itipalyere laati, kuyya Yudea, kuyya Grik, kuyya eklesya ono Hollum. ³³ Ati ihaniete ihwa ehanio ni itamunoyere laati daŋ te erre daŋ, nyo abeŋ ni attifya erre hun olwahye ani ati hun olwahye laati arryai, jo oŋida isi italahunie.