¹ Ijifatyete ani ihwa ejifatyo ni Kristo. ² Ajo ni jihatai oyyu bebe nyo igiluna tai ani te erre daŋ bwo ijifatyete tai ettiyenita hunya ettiyenio ni jihatai. ³ Ati awak ni itai itaniŋuna ahode jo ara Kristo ahou lyawa daŋ bwo ara alle ahou ŋotte bwo ara Hollum ahou Kristo. ⁴ Kuyya imuhok obo atulo ahou honyi al omojo inyi kuyya bu ittiyenio, iyaŋuno inyi ariri ihou honyi. ⁵ Ati kuyya omojo obo aŋotte kuyya bu ittiyenio, bwo obeŋ imuhok ahou honyi, iyaŋuno inyi ariri ihou honyi, orrijo ihwa ogit inyi ofir honyi. ⁶ Nyo kuyya obeŋ aŋotte awak imuhonia ahou honyi ijara inyi ogit ofir honyi. Kuyya ara ariri jyo aŋotte on oŋer kuyya ogit ofir honyi, ijara inyi imuhok ahou honyi. ⁷ Oŋida alle obeŋ imuhok ahou honyi nyo ara inyi arrijori iko akwatan ono Hollum ati ara aŋotte akwatan ono alle. ⁸ Nyo obeŋi nya alle oyyeuni ta aŋotte ati oyyeuni aŋotte ta alle. ⁹ Obeŋi bwo fe oyyeuni alle ilwahyere aŋotte ati oyyeuni aŋotte ilwahyere alle. ¹⁰ Te eram ana oŋida aŋotte imuhok ahou honyi bwo fe igonyuni adi anjelohyen. ¹¹ Ati itwa Hobu obeŋ aŋotte itoŋo hama, bwo obeŋ alle itoŋo hama. ¹² Nyo ihwa oyyeuni nya aŋotte to ’le, isiuni bwo fe alle jyo aŋotte bwo ofwonni isi daŋ jyo Hollum. ¹³ Oŋocete ta ahwattek hatai, oyyu jyo aŋotte imojori jyo Hollum iko ahou on obeŋ imuhonio? ¹⁴ Ibyaŋata tai imijana te erre hutta fau jo ara ariri jyo alle al ohodori ofir honyi, ati ara akwatan jyo aŋotte? ¹⁵ Nyo isyori ofir jyo aŋotte imuhoniere inyi. ¹⁶ Ati kuyya awak obo atulo etarisa te eram ana, ara ana emohit jihohoi iko iklesyahyen huno Hollum daŋ. ¹⁷ Esiŋyo ni itai te eram ana, abeŋ ni etahabuyo itai, nyo al ittubati tai ibyaŋata tai ihaniete on oyyu ati ihaniete tai on orroho. ¹⁸ Nyo ahosyere etaniŋu ni jo al ittubati tai iklesya owon aŋalafa ihiji hatai bwo egigilo ni ara ahode. ¹⁹ Nyo oŋida owon aŋalafa ihiji hatai jo oŋida hul oyiji oleye tehiji hatai. ²⁰ Al ittubati tai ta ahwattek hatai ibyaŋata tai iremehina ŋiyo iteremeja ono Hobu ²¹ nyo itterye laati omuk aŋiyo hosi kokwak, tania oniama obo bwo obo oruma. ²² Nyo ihaniete tai ihwania? Obeŋi asik jihatai iŋiyere bwo imatari? Imyanati tai eklesya ono Hollum bwo iyaŋuniete eloriri jyo alocaŋak? Ajo adi ni anyo jihatai? Etahabuyo adi ni itai? Abeŋ ni etahabuyo itai. ²³ Nyo efwotu ni jyo Hobu erre hun esyarak ni itai jo inya ta attari an isyaranierek Hobu Yesu iyeri, iduhu inyi emune, ²⁴ ojo inyi humo jyo Hollum ette beny ette jaran, Ara ana ihwa ahwan hoŋ on owuro’to tetai. Ihaniete ihwania igiluniere ani. ²⁵ Ninya atuhuno aŋiyo iduhu inyi bwo fe akos ette jaran, Ara ana ihwa nooto hoŋ an itagol ecorit aŋejuk. Amatati igiluniere ani. ²⁶ Nyo al iŋiyete tai emune ana bwo imatati ta akos itahutana tai naye ono Hobu many ocohuniere inyi. ²⁷ Tania lya ol oŋiyo emune bwo amata ta akos ono Hobu ta abyaŋan igigilo owon aŋoco ono ahwan iko nooto Hobu jihonyi. ²⁸ Ati ijara atulo hotottifyai erre taji honyi bwo ihalu oremik inyi ŋiyo emune bwo amata ta akos. ²⁹ Nyo lya ol oŋiyo bwo amata ati obeŋ ihum igigilo ta ahwan Hobu, iyauno inyi aŋoco ihwan honyi ta aŋiyo iko amata honyi. ³⁰ Te eram ana ilihi omuk bwo omuk oŋwai ihiji hatai bwo omuk oyei. ³¹ Ati kuyya ettifya hohoi erre tajya hohoi obeŋ adi aŋoco jihohoi. ³² Ati oŋot Hobu hohoi bwo fe abak hohoi jo oŋida hohoi ebeŋ enyurak aŋoco ihwa ono laati hutta fau. ³³ Tania illarak hoŋ, al ittubaniete tai iŋiyere, itilati laati omuk. ³⁴ Kuyya oniama obo ijara inyi oŋiyo ihaŋ honyi, jo oŋida attubanio hatai arabotye obeŋ iyaŋuno aŋoco. Ekyana adi ni erre omuk al attu ni.