¹ Illarak hoŋ abeŋ ni awak itai itimoti eram ono esyorita huno Oloyiri. ² Imijana tai jo inya herata tai paganohyen ijifatyete nya itai arrijorihyen hun obeŋi’to ikyanai ihwa orihotye isi itai. ³ Tania ajo ni jihatai jo obeŋ obo atulo al ikyana ta adwaran ono Oloyiri olo Hollum oremik ipico Yesu, bwo obeŋ obo oremik jaran jo ara Yesu Hobu arari ta adwaran ono Oloyiri ol Olibo. ⁴ Ihwania owoni esyorita hun olufaji bwo Oloyiri abotye isyoryo isi. ⁵ Owoni bwo fe egyamita hun olufaji ati ara Hobu hohoi abotye. ⁶ Owoni bwo fe ekota hun olufaji igyamari ati ara Hollum abotye al igyama’to erre daŋ jyo laati daŋ. ⁷ Ati isyori jyo laati daŋ ababo Oloyiri ilwahyere omuk. ⁸ Isyo Oloyiri jyo obo atulo olofyoro ikyanari, bwo jyo obo amijana hirre. ⁹ Isyo Oloyiri jyo obo neruk, bwo jyo obo etaŋidaryo wati. ¹⁰ Isyo inyi jyo obo ihaniere edwariti, bwo jyo obo ettittoyo, bwo jyo obo amijana oloyirihyen hun oyiji’to iko hun orrohoji’to. Isyo inyi jyo obo ikyanari ekyanita hun olufaji, bwo jyo obo itahutaniere awoi hiram ono nekyanita hwa. ¹¹ Ati igyama Oloyiri abotye erre huna daŋ, bwo aharak inyi jyo laati daŋ ababo ihwa awak inyi. ¹² Nyo ihwa owon ahwan abotye ati owoni jihonyi aŋaco arryai, bwo aŋaco arryai hunia inosoni isi ahwan abotye. Ara ihwania jyo Kristo. ¹³ Nyo to Oloyiri abotye ibatisye hohoi itwa hwan abotye, dwadi era hohoi Yudea kuyya Grik, kuyya apiti, kuyya ebeŋ era apiti, ewon hohoi daŋ iko Oloyiri abotye. ¹⁴ Nyo obeŋ ahwan ara aŋati abotye ati ara inyi aŋaco arryai. ¹⁵ Kuyya ojo eju jo, Abeŋ ni ara aŋati hwan ana nyo abeŋ ni ara ahani. Tania obeŋ inyi ara aŋati hwan ahode? ¹⁶ Kuyya ojo eyyok jo, Abeŋ ni ara aŋati hwan ana nyo abeŋ ni ara ahonyek. Tania obeŋ inyi ara aŋati hwan ahode? ¹⁷ Kuyya ara ahwan daŋ ahonyek, aŋai adi itaniŋyo inyi? Kuyya ara ahwan daŋ ahiyyok, aŋai adi iŋwada inyi? ¹⁸ Ati ihwania ihanak Hollum aŋaco daŋ huno ahwan ihwa awak inyi. ¹⁹ Kuyya arai isi daŋ aŋati abotye, owon adi ahwan aja? ²⁰ Tania ihwania owoni aŋaco arryai ati ara ahwan abotye. ²¹ Obeŋ onyek oremik jaran jyo aani jo, Obeŋ eram hoi ikoŋ. Obeŋ bwo fe ahou oremik jaran jyo eju jo, Obeŋ eram hoi ikoŋ. ²² Ati ewak hohoi aŋaco huno ahwan hun ilihi’to. ²³ Bwo aŋaco huno ahwan hun obeŋi oleye, ewak hohoi isi agalik, bwo aŋaco hun obeŋi ilamani, emuhok hohoi isi. ²⁴ Aŋaco hwan hun ilamani obeŋi awahi emuhonio. Ati inosok Hollum ahwan arabotye jo oŋida aŋaco hun obeŋi’to ilamani ifwotuni etahabuta agalik, ²⁵ jo oŋida obeŋ abwanya ihwan, ati oŋida aŋaco daŋ olwak obo obo. ²⁶ Kuyya odyaha aŋati abotye, odyahai aŋaco hwan daŋ ikonyi. Kuyya itahabuye aŋati abotye omunoi adi isi daŋ. ²⁷ Ihwania irata tai ihwa ahwan Kristo, bwo irata tai daŋ ihwa aŋaco huno ahwan honyi. ²⁸ Tania onyimu Hollum laati igyamari iklesya; ahosyere lefahat, etarrihi ettittok, etahunihi ettiyanak. Onyimu inyi bwo fe hul ihanie edwariti, etaŋidarak, alwak, aŋotok hirre, iko laati hul ikyanai ekyanita hun olufaji. ²⁹ Arai isi daŋ alefahat? Arai isi daŋ ahettittok? Arai isi daŋ ahettiyanak? Arai isi daŋ ahegyamak edwariti? ³⁰ Oremehini laati daŋ itaŋidaryo aŋwak? Ikyanai isi daŋ ekyanita hun olufaji’to? Oremehini isi daŋ iloico ekyanita? ³¹ Ati ottifyati on ogol esyorita hun oyiji’to agalihini. Bwo etahutak ni jihatai ekoi on oyyu’to agalik.